Jobo 3:1-26
3 Ka morago ga moo Jobo o ile a thoma go bolela,
2 gomme a roga letšatši leo a belegwego ka lona a re:
3 “Ke duma okare letšatši leo ke belegwego ka lona nkabe le sa ka la ba gona,Le bošego bjoo motho a rilego: ‘Ngwana wa mošemane o belegwe!’
4 Anke letšatši leo e be la leswiswi.
Anke Modimo a lebale letšatši leo,Le gona, anke letšatši leo le se ke la phadimelwa ke seetša.
5 Anke letšatši leo le aparelwe ke leswiswi le lesoleso.
Anke le khupetšwe ke leru le leso.
Le gona anke le tšhošwe ke selo le ge e le sefe seo se swiswatšago letšatši.
6 Anke bošego bjoo bo aparelwe ke leswiswi,Anke bo se ke bja thaba matšatšing ka moka a ngwaga,Le gona anke bo se ke bja balwa gare ga dikgwedi.
7 Go be go tla ba kaone ge nkabe go se na motho yo a belegwego bošegong bjoo,Anke go se ke gwa kwagala lethabo bošegong bjoo.
8 Anke barogaki ba rogake letšatši leo,E lego bona bao ba kgonago go tsoša kwena.*
9 Anke dinaledi tša masa a bošego bjoo di swiswale,Anke bošego bjoo bo letele seetša sa mosegare, eupša seetša seo se se ke sa tla,Le gona anke bo se ke bja hlabelwa ke seetša sa masa.
10 Ka gobane bošego bjoo ga se bja tswalela popelo ya mma,Gore ke se tlo bona mathata.
11 Go reng ke sa ka ka fo hwela ka popelong?
Go reng ke sa ka ka hwa ge ke se no belegwa?
12 Ke ka baka la’ng mma a ile a nkuka a mpea difarong,*Gomme a nnyantšha matswele a gagwe?
13 Ka gobane ge nkabe ke hwile ka nako yeo nkabe ke robetše ke sa tshwenywe ke motho,Nkabe ke robetše ke khuditše.
14 Ke khuditše le dikgoši tša lefase le baeletši ba tšona,Bao ba ikagetšego mafelo ao gona bjale e lego marope,
15 Goba nkabe ke khuditše le barwa ba kgoši bao ba bego ba na le gauta,Bao dintlo tša bona di bego di tletše ka silifera.
16 Goba go reng ke sa ka ka no ikhwela le pele mma a tseba gore o imile?Go reng ke sa ka ka ikhwela le pele nka belegwa?
17 Le gona ka lebitleng batho ba babe ga ba sa tshwenyega,Ke gona moo bao ba feletšwego ke matla ba khuditšego gona.
18 Gona moo bagolegwa ka moka ba iketlile,Ga ba kwe lentšu la motho yoo a ba gapeletšago go šoma.
19 Gona moo badiidi le bahumi ba no swana,E bile lekgoba le lokologile go mong wa lona.
20 Go reng Modimo a dumelela gore yo a tlaišegago a tšwele pele a phela,*Gomme bao ba tshwenyegilego a ba dumelela gore ba phele?
21 Go reng bao ba dumago go hwa, ba sa hwe,
Gaešita le ge ba nyaka lehu go swana le mahumo ao a utilwego?
22 Bao ba thabago kudu,Ba thabišwa ke gore ba tsene ka lebitleng.
23 Go reng Modimo a dumelela motho yo a timetšego gore a phele,E bile a mo thibetše ditsela ka moka?
24 Go e na le gore ke je, ke dulela go lla,Megokgo ya ka e tšhologa bjalo ka meetse ao a elelago ka nokeng.
25 Tšeo ke di tšhabago, ke tšona tšeo di ntiragalelago,E bile tšeo ke di boifago, ke tšona di ntletšego.
26 Ga ke na khutšo, ke a tshwenyega,E bile ke ferekane, eupša ke dula ke welwa ke mathata.”
Mengwalo ya tlase
^ Ka Seheberu ke “Lebiathane.”
^ Goba “diropeng.”
^ Goba, “Go reng yo a tlaišegago a mo nea seetša?”
