Jobo 31:1-40
31 “Ke phethile le pelo ya ka* gore nka se ke ka lebelela kgarebe ka go e kganyoga.
2 Ka gona, ke tla hwetša eng go Modimo yo a lego magodimong,Le gona ke bohwa bofe bjo Ramatlaohle a tlago go nnea bjona?
3 Motho yo a tlwaetšego go dira dilo tše mpe o tlo welwa ke kotsi,Gomme bao ba tlwaetšego go dira dilo tše mpe ba tlo welwa ke madimabe.
4 Na Modimo ga a bone mediro ya kaLe dilo ka moka tšeo ke di dirago?
5 Na nkile ka bolela maaka,
Goba na nkile ka fora motho yo mongwe?
6 Anke Modimo a nkale ka dikala tša nnete,Gomme o tla bona gore ke a tshepega.
7 Ge e ba ke aroga tseleng ya nnete,Goba pelo ya ka e gokeditšwe ke seo ke se bonago,Goba diatla tša ka di se tša hlweka,
8 Gona anke ke bjale peu gomme go je motho yo mongwe,Le gona anke seo ke se bjalago se tumolwe.
9 Ge e ba pelo ya ka e kile ya goketšwa ke mosadi,Gomme ka leta kgauswi le mojako wa moagišane wa ka gore ke dire sebe le mosadi wa gagwe,
10 Gona anke mosadi wa ka a šilele monna yo mongwe mabele,Gomme banna ba bangwe ba robale le yena.
11 Ka gobane ke tla be ke dirile selo seo se lešago dihlong,E lego molato woo baahlodi ba swanetšego go nkahlola ka baka la wona.
12 Seo se tla ba bjalo ka molloWo o tlago go tšhuma le go fediša dilo ka moka tšeo ke nago le tšona.
13 Ge e ba ke gana go swara bahlanka ba ka ba banna le ba basadi ka toka ge ba lla ka nna,
14 Gona ke tla dira’ng ge Modimo a ntshekiša,
Le gona ke tla mo araba ka reng ge a mpotšiša dipotšišo?
15 Na yo a mpopilego ka popelong ga se yena a bopilego le bona?
Na ka moka ga rena ga se ra bopša ke yena?
16 Ge e ba nkile ka gana go nea badiidi dilo tšeo ba di hlokago,Goba ka dira gore mohlologadi a nyame,
17 Ge e ba ke jele dijo tša ka ke nnoši,Gomme ka se ke ka ngwathela ditšhiwana,
18 (Gobane go tloga bosweng bja ka ke godišitše tšhiwana ye bjalo ka ge eka ke tatago yona,Le gona go tloga ke sa le ngwana ke be ke thuša mohlologadi yoo.)
19 Ge e ba ke bone motho a bolawa ke phefo ka ge a hloka diaparo,Goba modiidi a se na seo a ka se aparago,
20 Ge e ba a ka se nteboge*Mola a itutetša ka boya bja dinku tša ka,
21 Ge e ba nkile ka tšhošetša ditšhiwana tšeo di bego di nyaka gore ke di thuše kgorong ya motse,
22 Gona anke letsogo la ka le tšwe legetleng la ka gomme le wele fase,Le gona anke le robege setšung.
23 Ka gobane ke be ke tšhošwa ke kotsi e tšwago go Modimo,E bile bogolo bja gagwe bo be bo dira gore ke boife.
24 Ge e ba ke tshepile gauta,Goba ke boditše gauta e hlwekilego ka re: ‘O dira gore ke ikwe ke šireletšegile!’
25 Ge e ba ke be ke thaba ka ge ke humile kuduLe ka baka la ge ke na le dilo tše dintšhi,
26 Ge e ba nkile ka bona seetša sa letšatši se phadima,Goba ngwedi o tagile o phatša lefaufaung,
27 Gomme pelo ya ka ya thoma go mphora,Ke moka ka di rapela ka go khisa seatla sa ka,
28 Gona seo le sona e tla be e le molato woo baahlodi ba swanetšego go nkahlola ka baka la wona,Ka gobane ke tla be ke latotše Modimo wa nnete.
29 Na nkile ka thaba ka baka la ge lenaba la ka le fedišwa,Goba ka thaba ka ge le wetšwe ke dilo tše mpe?
30 Ga se ka ka ka rogaka lenaba la ka ka go nyaka gore le hwe,Ga se ka ka ka dira sebe sa mohuta woo.
31 Banna ba ntlong ya ka ba itše:‘Batho ka moka bao ba tlago ntlong ya Jobo ba ka ja go fihlela ba khora.’
32 Ke be ke sa dumelele motho le ge e le ofe gore a robale ka ntle bošego le ge ke be ke sa mo tsebe,Ke be ke dula ke amogela baeng ntlong ya ka.
33 Na nkile ka leka go uta melato ya ka go swana le batho ba bangwe,Bjalo ka ge eka ke e uta ka potleng ya seaparo sa ka?
34 Na nkile ka tšhošwa ke gore batho ba bantšhi ba tla reng ka nna,Goba na nkile ka tšhošwa ke gore malapa a mangwe a tlo nnyatšaGomme seo sa dira gore ke homole ke be ke tšhabe go tšwela ka ntle?
35 Ge go ka ba le motho o tee yo a ka ntheetšago,
Ke tla ngwala leina la ka go seo ke se boletšego go bontšha gore ke boletše nnete,
Ge feela Ramatlaohle a ka nkaraba.
Okare nkabe motho yo a mpeago molato a ngwadile dilo tšeo a ntatofatšago ka tšona lengwalong!
36 Lengwalo leo ke be ke tla le rwala legetleng la ka,Ke be ke tla le bea hlogong ya ka go swana le mphapahlogo.
37 Ke be ke tla botša Modimo kgato e nngwe le e nngwe yeo ke e tšeago,Ke be ke tla ya go yena ke sa tšhabe selo bjalo ka ge eka ke nna kgošana.
38 Ge e ba tšhemo ya ka e ka lla ka baka la ka,Le diforo tša yona tša lla di le ka moka,
39 Ge e ba nka ja dienywa tša yona ke se ka patela bao ba e lemilego,Goba ka dira gore beng ba yona ba kwe bohloko,
40 Gona tšhemong yeo a go mele meetlwa go e na le korong,Gomme go mele sekoro seo se nkgago gampe go e na le gore go mele mabele.”*
Mantšu a Jobo a felela mo.
Mengwalo ya tlase
^ Phetolelo ya lentšu ka lentšu e re, “Ke dirile kgwerano le mahlo a ka.”
^ Phetolelo ya lentšu ka lentšu e re, “Ge e ba a ka se ntšhegofatše.”
^ Phetolelo ya lentšu ka lentšu e re, “garase.”
