Jobo 32:1-22
32 Bjale banna ba ba bararo ba ile ba tlogela go leka go araba Jobo, ka gobane o be a ipona a lokile.
2 Eupša Elihu morwa wa Barakele wa go tšwa Busi wa leloko la Rame a galefa kudu. O ile a galefela Jobo kudu ka gobane Jobo o be a leka go bontšha gore o lokile go feta Modimo.
3 O ile a galefela le bagwera ba Jobo ba bararo, ka gobane ga se ba kgona go araba Jobo eupša ba be ba re Modimo ke yo mobe.
4 Elihu yena o be a letetše gore ba fetše go bolela gore a tle a arabe Jobo, ka gobane banna bao ka moka ba be ba mo feta ka bogolo.
5 Ge Elihu a bona gore banna bao ba bararo ga ba arabe o ile a galefa le go feta.
6 Ka gona Elihu morwa wa Barakele wa go tšwa Busi a bolela a re:
“Nna ke yo monyenyane,Gomme lena le ba bagolo.
Ke ka baka leo ke ilego ka itshwara gomme ka se le botše seo ke se tsebago,Ka gobane ke a le hlompha.
7 Ke ile ka ipotša gore: ‘A go bolele batho ba bagolo,Gomme bao e lego kgale ba phela ba bontšhe bohlale.’
8 Eupša moya o mokgethwa wo Modimo a o neago batho,E lego wona moya wa Ramatlaohle, ke wona o dirago gore batho ba be le kwešišo.
9 Motho ga a be le bohlale feela ka gobane e le yo mogolo,Le gona ga se bakgalebje feela bao ba kwešišago seo se lokilego.
10 Ka gona ke re: ‘Ntheetše,Gomme le nna ke tla go botša se ke se tsebago.’
11 Ke be ke emetše gore le arabe,Ke be ke hlwaile tsebe ge le be le bolela,Ge le be le nyaka mantšu ao le ka a bolelago.
12 Ke be ke le theeditše gabotse,Eupša ga go le o tee wa lena yo a kgonnego go bontšha gore Jobo o na le phošo,Goba yo a kgonnego go mo araba.
13 Ka gona le se ke la re: ‘Re bohlale,Ke Modimo yo a mo phošollago, e sego motho.’
14 Ka ge a be a sa bolele le nna,Nka se mo fetole bjalo ka lena.
15 Ba gakanegile, ga ba tsebe gore ba reng.Ga go sa na seo ba ka se bolelago.
16 Ke letile, eupša ga ba sa bolela.Ba no ema, ba rile tuu!
17 Ka gona le nna ke tla araba,Le nna ke tla bolela seo ke se tsebago.
18 Ka gobane ke na le dilo tše dintšhi tšeo ke nyakago go di bolela.Moya wo o lego ka gare ga ka o a ntlhohleletša.
19 Ka mpeng ya ka go pipitlelaneGo swana le lepotlelo le leswa la mokgopa leo le tletšego beine leo le nyakago go phatloga.
20 Ereng ke boleleng gore ke imologe.
Ke tla bula molomo wa ka gore ke arabe.
21 Nka se kgetholle motho,E bile nka se fo bolela gore ke no thabiša motho.
22 Ka gobane ga ke kgone go bolela dilo feela gore ke no thabiša batho,Ka gore ge nka dira bjalo, Mmopi wa ka o tla mphediša kapejana.
