Jobo 9:1-35
9 Jobo a araba a re:
2 “Ke a tseba gore seo se boletšwego ke nnete.
Go kgonega bjang gore motho wa nama le madi a re o lokile pele ga Modimo?
3 Ge Motho a ka nyaka go phenkgišana le Modimo,A ka se kgone go araba le ge e ka ba potšišo e tee go tše sekete tšeo Modimo a ka mmotšišago tšona.
4 Modimo o na le pelo e bohlale e bile o na le matla a magolo.
Ke mang a ka lwago le yena gomme a se gobale?
5 O šuthiša dithaba, ka ntle le gore batho ba tsebe,O di phekgola a galefile.
6 O dira gore lefase le šišinyege,Ke moka metheo ya lona ya thothomela.
7 O botša letšatši gore le se ke la ba le seetša,E bile o khupetša seetša sa dinaledi,
8 O phurolla magodimo bjalo ka lešela,E bile o gatakela maphoto a magolo a lewatle,
9 O dirile sehlopha sa dinaledi seo se bitšwago Ashe, le sehlopha sa dinaledi seo se bitšwago Kesile,Le sehlopha sa dinaledi seo se bitšwago Kima le sehlopha sa dinaledi sa ka Borwa,
10 O dira dilo tše kgolo tšeo di sa kwešišegego,E bile o dira le dilo tše makatšago tše di sa balegego.
11 O feta pele ga ka eupša ka se mmone,O selaganya pele ga ka fela ka se mo lemoge.
12 Ge a ubula selo, ke mang a ka mo ganetšago?
Ke mang a ka rego go yena: ‘O dira’ng?’
13 Modimo ge a galefile, o galefile,Le bao ba thušago Rahaba* ba tla khunamela Modimo.
14 Ka gona ke swanetše go mo hlompha kudu ge ke mo arabaKe kgethe mantšu gabotse ge ke bolela le yena,
15 Le ge e ba ke be ke bolela nnete, ke be nka se mo arabe.
Ke tla kgopela feela gore moahlodi wa ka a nkwele bohloko.
16 Ge nka mmitša, na o tla nkaraba?
Ga ke tshepe gore o tla ntheetša,
17 Ka gobane o nkeketa ka ledimo,E bile o nkokeletša mathata ntle le lebaka.
18 Ga a mphe le nako ya go hema,O no tšwela pele a nkokeletša dilo tše bohloko.
19 Ge e ba re bolela ka matla, gona Modimo ke yena a nago le matla,
Ge re bolela ka toka, Modimo o re: ‘Ke mang a ka ntshekišago?’
20 Le ge nkabe ke se na molato, molomo wa ka wona o be o ka se dumelelane le nna,Le ge nka no dula ke botega, Modimo o tlo fo mpona molato.
21 Le ge nkabe ke dula ke tshepega, ga ke tsebe gore go tlo direga eng ka nna.Ke hloile bophelo bjo bja ka.
22 Go no swana. Ke ka baka leo ke rego,‘Motho yo a lokilego le yo mobe, o ba fediša go swana.’
23 Ge e ba lefula le matla le ka bolaya batho ka tšhoganetšo,O tla kwera motho yo a se nago molato ge a le mathateng.
24 O file batho ba babe lefase,A tswalela mahlo a baahlodi ba lona.
Ge e ba e se yena a dirilego dilo tše, gona di dirilwe ke mang?
25 Bophelo bja ka bo kitima ka lebelo la go feta la mokitimi,Le gona ga se ka ka ka thabela bophelo.
26 Bo kitima go swana le dikepe tšeo di dirilwego ka mahlaka,Le gona bo swana le dintšhu tšeo di theogelago fase ka lebelo ge di bona dijo.
27 Ge nkare: ‘Ke tla itebatša mathata a ka,Ke tla tlogela go nyama gomme ka thaba,’
28 Ke tla no dula ke tšhogile ka baka la dilo ka moka tšeo di nkwešago bohloko,E bile ke a tseba gore o tlo mpona molato.
29 Ke tlo no bonwa ke le motho yo mobe.
Bjale go reng ke swanetše go itapišetša lefeela, go bontšha gore ga ke na molato?
30 Ge nka hlapa ka meetse a kapoko,E bile ka hlapa diatla ka sesepe,
31 Gona o be o tla ntahlela ka moleteng wa ditšhila,E bile ka hlaswa le ke diaparo tša ka.
32 Modimo ga se motho wa nama le madi go swana le nna mo nka mo arabago,E bile nka se ye tshekong le yena.
33 Ga go na motho yo a ka re direlago phetho,Yo e ka bago moahlodi wa rena.
34 Ge a ka tlogela go mpetha,E bile a se sa ntšhošetša, gona ke tla bolela le yena ke sa tšhoge selo.
35 Ka gobane ga ke tšhabe go bolela le yena.
Mengwalo ya tlase
^ Go ka direga gore mo go bolelwa ka sephedi se segologolo sa ka meetseng.
