Joele 1:1-20
1 Jehofa o laetše Joele* morwa wa Pethuele gore a bolele mantšu a:
2 “Theetšang lena banna ba bagolo,Hlwayang tsebe lena badudi ka moka ba lefase.
Na selo sa mohuta wo se ile sa direga mehleng ya lena,Goba se ile sa direga mehleng ya borakgolokhukhu ba lena?
3 Di anegeleng barwa ba lena,Barwa ba lena ba di anegele barwa ba bonaGomme barwa ba bona ba di anegele moloko o latelago.
4 Seo se šadišitšwego ke ditšie* tša go senya, se jelwe ke ditšie tše dikgolo.Seo se šadišitšwego ke ditšie tše dikgolo, se jelwe ke ditšie tša go hloka maphego.Seo se šadišitšwego ke ditšie tša go hloka maphego, se jelwe ke ditšie tše dingwe.
5 Tsogang lena matagwa gomme le lle!
Llelang godimo lena banwi ka moka ba beine,Ka gobane ga le sa na beine e bose.
6 Nageng ya ka go tlile ditšie tše dintšhi tše e kego ke setšhaba, di na le matla e bile ga di balege.
Meno a tšona a swana le a tau gomme mehlagare ya tšona le yona e swana le ya tau.
7 Di sentše moterebe wa ka gomme tša šia mogo wa ka e le kutu feela.Di kgakgamotše matswamati a mehlare yeo, gomme tša a lahlela fase.Tša tlogela dithabe tša yona e le tše tšhweu.
8 Lena batho ba ka, llang go swana le kgarebe yeo e aperego lesakaE llela monna wa yona yo a e beeleditšego.
9 Dibego tša mabele le tša dino ga di sa išwa ntlong ya Jehofa.Baperisita, e lego badiredi ba Jehofa, ba a lla.
10 Dibjalo tša mašemong di sentšwe, mmu ga o sa mediša selo,Ka gobane mabele a sentšwe. Beine e mpsha e fedile gomme makhura a fedile.
11 Balemi ba nyamile, balemi ba mašemo a diterebe ba a lla,Ka gobane ga go sa na korong le mabele.*Le gona dibjalo tša mašemong di senyegile.
12 Moterebe o omile,Le mogo o ponne.
Mogarenate, mopalema, moapolaLe mehlare e mengwe ka moka ya dienywa e omile.Ruri lethabo la batho le fetogile manyami.
13 Lena baperisita, aparang masaka gomme le lle.Llelang godimo lena bao le hlankelago aletareng.
Etlang tempeleng gomme le fetše bošego ka moka le apere masaka, lena bahlanka ba Modimo wa ka,Ka gobane ga go sa na motho yo a tlišago dibego tša mabele le tša dijo ntlong ya Modimo wa lena, le itshetle dihuba.
14 Tsebišang batho gore ba itokišeletše go ikona dijo.
Bitšang batho gore ba tle sebokeng se sekgethwa.Kgoboketšang banna ba bagolo gotee le badudi ka moka ba naga, gore ba tle ntlong ya Jehofa Modimo wa lena gomme le llele Jehofa le mo kgopele gore a le thuše.
15 Letšatši la Jehofa le batametše,
Ruri letšatši leo le a boifiša!Le tlo baka tshenyo e tšwago go Ramatlaohle!
16 Na ga se ra amogwa dijo re itebeletše?E bile ntlong ya Modimo ga go sa na lethabo.
17 Peu e omeletše ka tlase ga digarafo tša bona.
Dintlo tša polokelo di fetogile lešope.
Mafelo ao go bewago dijo go ona a sentšwe, ka gobane mabele a omeletše.
18 Le diruiwa di a fegelwa!
Mehlape ya dikgomo e ralala e gakanegile, ka gobane ga go sa na mo di fulago!
Le mehlape ya dinku e a tlaišega.
19 Ke tla bitša wena Jehofa,Ka gobane mollo o tšhumile lešoka gomme ga go sa na mafulo,E bile o tšhumile le mehlare ka moka ya naga.
20 Le dibata tša naga di hloka thušo ya gago,Ka gobane mekero ya meetse e pšheleGomme mollo o tšhumile lešoka gwa se sa ba le mafulo.”
Mengwalo ya tlase
^ Leina le le ra gore, “Jehofa ke Modimo.”
^ Seheberu se šomiša maina a mane go hlalosa ditšie tše.
^ Phetolelo ya lentšu ka lentšu e re, “garase.”
