Jona 1:1-17
1 Wo ke molaetša woo Jehofa a ilego a o botša Jona morwa wa Amitai, a re:
2 “Eya motseng o mogolo wa Ninife, o botše badudi ba moo gore ke tlo ba fediša ka gobane ke bona dilo tše mpe tšeo ba di dirago.”
3 Eupša Jona o ile a se kwe Jehofa gomme a tšhabela Tarashishi. O ile a ya Jopa gomme a hwetša sekepe seo se yago Tarashishi. Ke moka a patela gomme a tsena ka sekepeng seo se yago Tarashishi e le ge a sa nyake go dira seo Jehofa a mmoditšego sona.
4 Ke moka Jehofa a dira gore go be le ledimo le matla ka lewatleng. Ledimo leo e be e le le legolo kudu moo sekepe se bego se le kgauswi le go robega.
5 Basepediši ba sekepe ba be ba tšhogile kudu moo yo mongwe le yo mongwe a ilego a thoma go kgopela modimo wa gagwe gore a mo thuše. Ba ile ba thoma go lahlela merwalo ka lewatleng e le gore sekepe se se ke sa nwelela. Eupša Jona yena o be a theogetše karolong ya ka garegare ya sekepe, a robetše gomme a ile ka boroko.
6 Ka morago molaodi wa sekepe a mmatamela a re go yena: “O robaletše’ng? Tsoga o kgopele modimo wa gago gore a re thuše! Mohlomongwe Modimo wa nnete o tla re kwela bohloko gomme ra se hwe.”
7 Basepediši bao ba sekepe ba boledišana ba re: “Etlang re direng matengwa* gore re tsebe gore ke mang yo a re bakelago mathata a.” Ke moka ba dira matengwa gomme a šupa Jona.
8 Bjale ba re go yena: “Re a go kgopela hle, re botše gore ke mang yo a re bakelago mathata a. O bereka go dira’ng le gona o tšwa kae? O tšwa nageng efe gomme o wa setšhaba sefe?”
9 A re go bona: “Ke Moheberu, e bile ke hlankela* Jehofa Modimo wa magodimong, yo a dirilego lewatle le lefase.”
10 Ge banna bao ba ekwa a realo ba tšhoga kudu ka gobane o be a ba boditše gore o be a tšhabela Jehofa, ke moka ba re go yena: “Ke ka baka la’ng o re baketše mathata a?”
11 Mafelelong ba re go yena: “Re go dire’ng e le gore ledimo le le eme?” Ka gobane ledimo leo le be le eba matla le go feta.
12 A ba araba a re: “Nkukeng gomme le ntahlele ka lewatleng gomme ledimo le le tla ema, ka gobane ke a bona gore ke nna ke bakilego gore go be le ledimo le le legolo.”
13 Eupša banna bao ba ile ba šoma ka thata gore ba bušetše sekepe nageng, fela ba ile ba palelwa ka gobane ledimo le be le mpefala le go feta ka lewatleng.
14 Ba rapela Jehofa ba re: “Hle Jehofa, o se re tlogele re ehwa ka baka la monna yo! Le gona o se ke wa re bona molato ka go bolaya monna yo yoo a se nago molato, ka ge wena Jehofa o dirile seo se go kgahlago!”
15 Ba kuka Jona ba mo lahlela ka lewatleng, gomme lewatle la homola la re tuu!
16 Banna bao ba ile ba tšhoga gomme ba thoma go hlompha Jehofa kudu. Ba ile ba direla Jehofa dihlabelo ba ba ba mo tshepiša gore ba tla mo hlankela.
17 Ke moka Jehofa a romela hlapi e kgolo gore e metše Jona, gomme Jona a ba ka mpeng ya hlapi ka matšatši a mararo le mašego a mararo.
