Jona 3:1-10
3 Ke moka Jehofa a bolela le Jona ka lekga la bobedi a re:
2 “Eya motseng o mogolo wa Ninife gomme o o tsebiše seo ke go botšago sona.”
3 Ka gona Jona a kwa Jehofa gomme a ya Ninife. Ninife e be e le motse o mogolo woo motho a bego a ka tšea matšatši a mararo go o dikologa ka moka a sepela ka maoto.
4 Jona a tsena motseng a sepela letšatši ka moka a tšama a re: “Go šetše feela matšatši a 40 gore Ninife e fedišwe.”
5 Ge batho ba Ninife ba ekwa se ba thoma go dumela go Modimo, ba botšana gore ba tlo ikona dijo le go apara masaka, go tloga ka motho yo mogolo go ya go yo monyenyane.
6 Ge kgoši ya Ninife e ekwa molaetša wo, e ile ya ema sedulong sa yona sa bogoši ya apola seaparo sa bogoši gomme ya apara masaka, ke moka ya dula meloreng.
7 Ka morago ga moo, kgoši ya laela badudi ka moka ba Ninife ya re:“Ye ke taelo ya kgoši le matona a yona: Go se ke gwa ba le motho yo a jago selo goba phoofolo yeo e jago selo. Go se ke gwa jewa selo le meetse a se ke a nwewa.
8 Batho ba apare masaka ba a apeše le diphoofolo. Ba bitše Modimo ka dipelo tša bona ka moka, ba tlogele go dira dilo tše mpe le bošoro.
9 Mohlomongwe Modimo wa nnete a ka fetola mogopolo wa gagwe, a se sa re galefela gomme ra se sa fedišwa.”
10 Ge Modimo wa nnete a bona seo ba se dirilego le gore ba fetotše mekgwa ya bona e mebe, a fetola mogopolo gomme a se sa ba fediša bjalo ka ge a be a ba boditše gore o tlo ba fediša.
