Joshua 14:1-15
14 Baisiraele ba ile ba tšea naga ya Kanana gore e be bohwa bja bona. Ba be ba e filwe ke moperisita Eleasara le Joshua morwa wa Nuni gotee le matona a dihlogo tša meloko ya Baisiraele.
2 Meloko e senyane le seripa sa moloko e ile ya arolelwa bohwa go dirišwa matengwa,* go etša ge Jehofa a be a laetše Moshe gore go dirwe bjalo.
3 Moshe o be a šetše a file meloko e mengwe e mebedi le seripa se sengwe sa moloko bohwa ka mošola wa Noka ya Jorodane, eupša Balefi bona ga se a ba fa bohwa.
4 Ditlogolo tša Josefa e be e le meloko e mebedi, e lego moloko wa Manase le wa Efuraime. Balefi ga se ba fiwa naga e le bohwa eupša ba be ba filwe metse yeo ba ka dulago go yona le mafelo ao ba ka fudišetšago diruiwa tša bona le go bea dithoto tša bona.
5 Baisiraele ba ile ba arola naga go ya kamoo Jehofa a bego a laetše Moshe.
6 Ke moka banna ba Juda ba ya go Joshua kua Giligala gomme Kalebe morwa wa Jefune wa Mokenitsi a re go yena: “O tseba gabotse seo Jehofa Modimo wa nnete a se boditšego Moshe mohlanka wa gagwe ka nna le wena kua Kadeshe-baranea.
7 Ke be ke na le mengwaga e 40 ge Moshe mohlanka wa Jehofa a be a nthoma Kadeshe-baranea go yo hlola naga, gomme ge ke boa ke ile ka mmotša dilo ka moka tšeo ke di bonego.
8 Le ge bana bešo bao ke bego ke ile le bona ba ile ba dira gore setšhaba se felelwe ke matla, nna ke ile ka kwa Jehofa Modimo wa ka ka pelo ka moka.
9 Letšatšing leo Moshe a ena a re: ‘Naga yeo maoto a gago a sepetšego go yona e tla ba bohwa bja gago le bja barwa ba gago go ya go ile, ka gobane o kwele Jehofa Modimo wa ka ka pelo ka moka.’
10 Go etša ge Jehofa a tshepišitše, o kgonthišeditše gore ke tšwela pele ke phela mengwaga e 45 ga e sa le Jehofa a botša Moshe tshepišo ye ge Baisiraele ba be ba sepela lešokeng. Lehono ke na le mengwaga e 85.
11 Le gona ke sa na le matla a go swana le nakong ya ge Moshe a be a nthoma go yo hlola naga. Gona bjale ke sa na le matla a go ya ntweng le go dira dilo tše dingwe go swana le nakong e fetilego.
12 Ke ka baka leo ke go kgopelago gore o mphe tikologo ya dithaba yeo Jehofa a ilego a ntshepiša yona letšatšing lela. Letšatšing leo, wena Joshua o ile wa kwa gore ditlogolo tša Baanaki di dula moo, e bile di na le metse e megolo e šireleditšwego. Eupša ke kgodišegile gore Jehofa o tla ba le nna e bile ke tla ba raka go tšona go etša ge Jehofa a tshepišitše.”
13 Ka gona Joshua a šegofatša Kalebe morwa wa Jefune a ba a mo fa Heburone gore e be bohwa bja gagwe.
14 Ke ka baka leo Heburone e ilego ya ba bohwa bja Kalebe morwa wa Jefune wa Mokenitsi go ba go fihla le lehono, ka gobane o ile a kwa Jehofa Modimo wa Isiraele ka pelo ka moka.
15 Pele ga moo, Heburone e be e bitšwa Kiriathe-araba (go ka direga gore Kiriathe-araba e be e reeletšwe Araba yo e bego e le monna wa go tuma gare ga Baanaki). Ke moka nageng gwa se sa ba le ntwa.
Mengwalo ya tlase
^ Bona Tlhaloso ya Mantšu.
