Joshua 17:1-18
17 Go ile gwa dirwa matengwa gomme moloko wa Manase wa abelwa naga ka gobane Manase e be e le leitšibulo la Josefa. Ka ge Makiri, leitšibulo la Manase e bile e le tatago Gileada, e be e le monna wa ntwa, o ile a fiwa naga ya Gileada le ya Bashani.
2 Ke moka ditlogolo tše di šetšego tša Manase tša abelwa naga go ya ka malapa a tšona, e lego barwa ba Abiesere, barwa ba Heleke, barwa ba Asiriele, barwa ba Shikeme, barwa ba Hefere le barwa ba Shemida. Ba e be e le banna bao e lego ditlogolo tša Manase morwa wa Josefa go ya ka malapa a bona.
3 Tselofehadi morwa wa Hefere, morwa wa Gileada, morwa wa Makiri, morwa wa Manase, o be a se na barwa eupša a na le barwedi feela, gomme maina a barwedi ba gagwe šea: Maala, Noa, Hogola, Milika le Thiritsa.
4 Ka gona ba ile ba ya go moperisita Eleasara, Joshua morwa wa Nuni gotee le baetapele ba setšhaba ba re: “Jehofa ke yena a laetšego Moshe gore a re fe naga e le bohwa gare ga banababo rena.” Ke moka ba fiwa bohwa gare ga barwarre ba tatago bona go ya kamoo Jehofa a laetšego ka gona.
5 Le gona Manase o be a abetšwe dinaga tše dingwe tše lesome ka ntle le naga ya Gileada le ya Bashani, tšeo di bego di le ka mošola wa Noka ya Jorodane.
6 Barwedi ba moloko wa Manase le bona ba ile ba hwetša naga e le bohwa gotee le barwa ba Manase, ke moka naga ya Gileada ya abelwa ditlogolo tše di šetšego tša Manase.
7 Mollwane wa Manase o be o tloga Ashere o fihla Mikemethate yeo e lebanego le Shikeme, gomme o leba ka borwa* nageng yeo go dulago batho ba Ene-Thapua.
8 Naga ya Thapua e ile ya ba ya Manase, eupša motse wa Thapua wo o lego mollwaneng wa Manase e be e le wa ditlogolo tša Efuraime.
9 Mollwane wo o be o theogela Moeding wa Kana gomme o leba ka thoko ya borwa ya moedi woo. Go be go na le metse ya Efuraime gare ga metse ya Manase, ke moka mollwane wa Manase o be o le ka leboa la moedi gomme o goma lewatleng.
10 Naga ya ka thoko ya borwa e be e le ya Efuraime, ya ka thoko ya leboa e le ya Manase, gomme mollwane wa Manase o be o goma lewatleng, naga ya Manase ya ka leboa e be e fihla ka Ashere gomme ka bohlabela e fihla ka Isakara.
11 Gare ga dinaga tša Isakara le Ashere, Manase o be a filwe Bethe-sheane le metse ya kgauswi le yona, Ibileama le metse ya kgauswi le yona, Doro le badudi ba yona gotee le metse ya kgauswi le yona, Endoro le badudi ba yona gotee le metse ya kgauswi le yona, Thaanake le badudi ba yona gotee le metse ya kgauswi le yona, Megido le badudi ba yona gotee le metse ya kgauswi le yona, dinaga tše tharo tšeo di lego mebotong e be e le tša gagwe.
12 Eupša ditlogolo tša Manase ga se tša kgona go tšea metse ye, le gona Bakanana ba ile ba tšwela pele ba dutše nageng ye.
13 Ge Baisiraele ba se na go ba le matla, ba ile ba gapeletša Bakanana go šoma, eupša ga se ba ka ba ba raka ka moka.
14 Ditlogolo tša Josefa di ile tša ya go Joshua gomme tša re: “Ke ka baka la’ng o re file karolo e tee ya naga yeo e abilwego ka matengwa le karolo e tee ya naga yeo e segilwego ka mellwane e le bohwa? Re ba bantšhi kudu ka gobane Jehofa o re šegofaditše go ba go fihla ga bjale.”
15 Joshua a re go bona: “Ge e ba le le ba bantšhi kudu, eyang le yo rema mehlare sethokgweng sa naga ya Baperetse le ya Barefaime le dule moo, ka gobane tikologo ya dithabeng ya Baefuraime ke e nyenyane kudu go lena.”
16 Ke moka ditlogolo tša Josefa tša re: “Tikologo yeo e lego dithabeng ga e re lekane, le gona Bakanana ka moka bao ba dulago nageng ya moeding bao ba lego Bethe-sheane le metseng ya yona yeo e e dikologilego gotee le bao ba dulago Moeding wa Jeseriele, ba na le dikariki tša ntwa tšeo di hlometšwego disabole maotwaneng a tšona.”
17 Ke moka Joshua a botša ditlogolo tša Josefa, e lego ba moloko wa Efuraime le wa Manase a re: “Le ba bantšhi kudu, e bile le ba matla kudu. Le ka se hwetše karolo e tee feela ya naga,
18 eupša le tla hwetša le tikologo ya dithabeng. Le ge e le sethokgwa, le tla rema mehlare ya sona gore le dule moo gomme naga ya lena e tla felela moo. Le tla raka Bakanana le ge ba na le matla e bile ba na le dikariki tša ntwa tšeo di hlometšwego disabole maotwaneng a tšona.”
Mengwalo ya tlase
^ Phetolelo ya lentšu ka lentšu e re, “ka go le letona.”
