Joshua 18:1-28
18 Ke moka setšhaba ka moka sa Baisiraele sa bokana kua Shilo gomme sa hloma tente moo, ka ge bjale se be se laola naga.
2 Eupša go be go sa na le meloko e šupago ya Baisiraele yeo e bego e se ya tšwa e abelwa bohwa bja yona.
3 Ka gona Joshua a re go Baisiraele: “Le sa emetše eng le sa tšee naga yeo Jehofa Modimo wa borakgolokhukhu ba lena a le neilego yona?
4 Kgethang banna ba bararo molokong o mongwe le o mongwe gomme ke ba rome gore ba yo hlola naga, ba thale mmepe wa yona go ya ka bohwa bja bona, ge ba fetša ba boe go nna.
5 Ba swanetše go ikarolela yona ka dikarolo tše šupago. Ditlogolo tša Juda di tla dula nageng ya tšona ka borwa gomme ditlogolo tša Josefa tša dula nageng ya tšona ka thoko ya leboa.
6 Ge e le lena, le ye go hlola naga le e arole ka dikarolo tše šupago, gomme ge le boa le mpontšhe kamoo le e arotšego ka gona, ke moka nna ke tla le direla matengwa mo pele ga Jehofa Modimo wa rena.
7 Eupša Balefi ba ka se abelwe naga gare ga lena ka ge bohwa bja bona e le go hlankela Jehofa tempeleng.* Bagada, Barubeni le seripa sa moloko wa Manase ba šetše ba tšere bohwa bjoo Moshe mohlanka wa Jehofa a ba neilego bjona ka bohlabela bja Noka ya Jorodane.”
8 Ke moka banna bao ba bego ba eya go hlola naga ba itokišeletša go sepela, Joshua a ba laela gore: “Sepelang le yo hlola naga, le e arole gomme le boe go nna, ke moka ke tla le direla matengwa gona mo Shilo pele ga Jehofa.”
9 Ka gona banna bao ba sepela ba yo rarela naga ke moka ba e arola ka metse e šupago, ba ngwala seo ka pukung. Ka morago ba boela go Joshua kampeng kua Shilo.
10 Joshua a ba direla matengwa kua Shilo pele ga Jehofa. Ka gona Joshua a abela Baisiraele naga go ya ka dikarolo tša bona gona moo.
11 Ke moka gwa tšwa letengwa la moloko wa Benjamini ka malapa a lona, naga yeo ba e abetšwego ka matengwa e be e le gare ga ya ba moloko wa Juda le ba moloko wa Josefa.
12 Mollwane wa bona ka leboa o be o tloga Nokeng ya Jorodane wa ya motheogeng wa Jeriko ka leboa, wa rotogela thabeng ka bodikela gomme wa goma lešokeng la Bethe-abene.
13 Le gona mollwane o be o fetela Lutsi, wa ya motheogeng wa ka borwa bja Lutsi, ke gore, Bethele, gomme wa theogela Atharothe-adara thabeng yeo e lego ka borwa bja Bethe-horoni ya Tlase.
14 Mollwane o be o eya ka bodikela ke moka wa rarela go ya ka borwa go tloga thabeng yeo e lebanego le Bethe-horoni go ya ka borwa, wa goma Kiriathe-baali, ke gore Kiriathe-jearima, e lego motse wa moloko wa Juda. Wo ke mollwane wa ka thoko ya bodikela.
15 Mollwane wa ka thoko ya borwa o be o tloga moo Kiriathe-jearima e felelago gona, o leba ka bodikela gomme o leba sedibeng sa Nefotoa.
16 O be o theogela moo thaba yeo e lebanego le Moedi wa Morwa wa Hinomo e felelago gona, yeo e lego Moeding wa Barefaimi ka thoko ya leboa, wa theogela Moeding wa Hinomo o lebile motheogeng wa Bajebusi ka thoko ya borwa gomme wa theogela Ene-rogele.
17 Mollwane o be o thadilwe ka thoko ya leboa o lebile Ene-shemeshe, wa leba Gelilothe yeo e lebanego le mmoto wa Adumima, ke moka wa theogela leswikeng la Bohani morwa wa Rubeni.
18 O be o fetela mmotong wa ka leboa wo o lebanego le Araba gomme o theogela Araba.
19 Mollwane o be o fetela mmotong wa ka leboa wa Bethe-hogola gomme o felela ka leboa moo Lewatle la Letswai le felelago gona e lego moo go felelago Noka ya Jorodane ka borwa. Wo e be e le mollwane wa ka borwa.
20 Mollwane wa ka thoko ya bohlabela e be e le Noka ya Jorodane. Bjo e be e le bohwa bja ditlogolo tša Benjamini go ya ka malapa a tšona le go ya ka mellwane ya dinaga tša tšona.
21 Metse ya moloko wa Benjamini go ya ka malapa a ona e be e le Jeriko, Bethe-hogola, Emeke-ketsitsi,
22 Bethe-araba, Tsemaraima, Bethele,
23 Afimi, Para, Ofura,
24 Kefara-amoni, Ofini le Geba. E be e le metse e 12 le metsana ya yona.
25 Gibeoni, Rama, Beerothe,
26 Mitsipa, Kefira, Motsa,
27 Rekema, Iripiele, Tarala,
28 Tsela, Haelefe, Jebusi, ke gore Jerusalema, Gibea le Kiriathe. E be e le metse e 14 le metsana ya yona.
Bjo e be e le bohwa bja moloko wa Benjamini go ya ka malapa a ona.
Mengwalo ya tlase
^ Goba, “go hlankela e le baperisita ba Jehofa.”
