Joshua 19:1-51
19 Ke moka letengwa la bobedi la tšwela Simeone, e lego moloko wa Simeone ka malapa a ona. Le gona naga ya bona ya ba ka gare ga naga ya ditlogolo tša Juda.
2 Bohweng bja bona ba ile ba hwetša Beresheba le Sheba, Molada,
3 Hatsara-shuali, Bala, Etseme,
4 Elitholada, Bethuli, Horoma,
5 Tsikilaga, Bethe-marakabothe, Hatsara-susa,
6 Bethe-lebaothe le Sharuhene. E be e le metse e 13 le metsana ya yona.
7 Aini, Rimone, Ethere le Ashani. E be e le metse e mene le metsana ya yona,
8 le metsana ka moka yeo e bego e le kgauswi le metse ye go fihla ka Balathe-bere, e lego Rama yeo e lego ka borwa. Bjo e be e le bohwa bja ditlogolo tša Simeone go ya ka malapa a tšona.
9 Bohwa bja ditlogolo tša Simeone bo be bo ngwathilwe nageng yeo e abetšwego ba moloko wa Juda, ka gobane ba moloko wa Juda ba be ba abetšwe naga e kgolo. Ka gona ditlogolo tša Simeone di ile tša hwetša dikarolo tša naga ka gare ga naga ya bohwa bja bona.*
10 Letengwa la boraro le ile la tšwela moloko wa Sebulone go ya ka malapa a ona, gomme mollwane wa bohwa bja bona wa fihla Saride.
11 Mollwane wa bona o be o rotogela ka bodikela o leba Mareala gomme o leba Dabashethe ke moka wa ya moeding wo o lebanego le Jokoneama.
12 Go tloga Saride o be o leba ka thoko ya bohlabela go fihla mollwaneng wa Khisilothe-thabora, o fetela Deberathe e bile o rotogela Jafia.
13 Go tloga moo o be o fetela ka bohlabela wa fihla Gathe-hefere wa ya Etha-katsini wa fetela Rimone ke moka wa fetela Nea.
14 Le gona ka leboa mollwane wo o be o dikologa gomme o leba Hanathone ke moka wa goma Moeding wa Ifithaele,
15 Naga ya bona e be e akaretša Kathate, Nahalale, Shimerone, Idala le Betlelehema. E be e le metse e 12 le metsana ya yona.
16 Bjo e be e le bohwa bja moloko wa Sebulone go ya ka malapa a ona. Metse ye e be e le ya bona go akaretša le metsana ya yona.
17 Letengwa la bone le ile la tšwela moloko wa Isakara go ya ka malapa a ona.
18 Mollwane wa bona o be o le Jeseriele, Kesulothe, Shunema,
19 Hafaraima, Shioni, Anaharathe,
20 Rabithi, Kishioni, Ebetse,
21 Remetha, Ene-ganime, Ene-hada le Bethe-patsetse.
22 Le gona mollwane wo o be o fihla Thabora, Shahatsuma le Bethe-shemeshe gomme o goma Nokeng ya Jorodane. E be e le metse e 16 le metsana ya yona.
23 Bjo e be e le bohwa bja moloko wa Isakara go ya ka malapa a ona. Metse ye e be e le ya bona go akaretša le metsana ya yona.
24 Ka morago letengwa la bohlano le ile la tšwela moloko wa Ashere go ya ka malapa a ona.
25 Mollwane wa bona e be e le Helekathe, Hali, Betene, Akashafa,
26 Alameleke, Amada le Mishala. O be o fetela ka thoko ya bodikela o eya Karamele le Shihoro-libinathe,
27 wa gomela ka bohlabela wa ya Bethe-dagona gomme wa fihla Sebulone le Moeding wa Ifithaele ka leboa, ke moka wa ya Bethe-emeke le Neiele, wa fetela Kabulu ka lehlakoreng le letshadi,
28 wa leba Eburone, Rehobo, Hamona le Kana gomme wa fihla motseng o Mogolo wa Sidone.
29 Le gona mollwane o be o eya Rama gomme o leba motseng o šireleditšwego wa Tiro, ke moka wa ya Hosa gomme wa goma lewatleng la tikologong ya Akatsibe,
30 Uma, Afeke le Rehobo. E be e le metse e 22 le metsana ya yona.
31 Bjo e be e le bohwa bja moloko wa Ashere go ya ka malapa a ona. Metse ye e be e le ya bona go akaretša le metsana ya yona.
32 Letengwa la botshelela le ile la tšwela moloko wa Nafutali, go ya ka malapa a ona.
33 Mollwane wa bona o be o tloga Helefe le sehlareng se segolo kua Tsaananime, ke moka wa ya Adami-nekebe le Jabiniele go fihla Lakuma, gomme o goma Nokeng ya Jorodane.
34 Ke moka o boela ka bodikela o eya Atsinothe-thabora go tloga moo wa ya Hukoka gomme wa fihla Sebulone ka borwa, wa leba Ashere ka bodikela, mollwane wa ka bohlabela o be o fihla Juda Nokeng ya Jorodane.
35 Le gona metse e šireleditšwego e be e le Tsidima, Tsere, Hamathi, Rakathe, Khinerethe,
36 Adama, Rama, Hatsora,
37 Kedeshe, Edirei, Ene-hatsora,
38 Yironi, Migidalaele, Horema, Bethe-anathe le Bethe-shemeshe. E be e le metse e 19 le metsana ya yona.
39 Bjo e be e le bohwa bja moloko wa Nafutali go ya ka malapa a ona. Metse ye e be e le ya bona go akaretša le metsana ya yona.
40 Letengwa la bošupa le ile la tšwela moloko wa Dani go ya ka malapa a ona.
41 Mollwane wa bohwa bja bona e be e le Tsora, Eshithaolo, Iri-shemeshe,
42 Shaalabini, Ajaloni, Ithala,
43 Elone, Thimina, Ekirone,
44 Eletheke, Gibethone, Balathe,
45 Jehudi, Bene-beraka, Gathe-rimoni,
46 Mejarakoni le Rakoni gotee le mollwane wo o lebanego le Jopa.
47 Naga ya ba moloko wa Dani e be e le e nyenyane kudu go bona. Ka gona ba ile ba ya go lwa le batho ba Leshema, ba ba fenya gomme ba ba bolaya ka tšhoša. Ke moka ba tšea naga yeo ba dula go yona, ba fetoša leina la Leshema ba re ke Dani, ba e reelela ka rakgolokhukhu wa bona Dani.
48 Bjo e be e le bohwa bja moloko wa Dani go ya ka malapa a ona. Metse ye e be e le ya bona go akaretša le metsana ya yona.
49 Ka go realo ba fetša go arola naga e le gore moloko o mongwe le o mongwe o hwetše bohwa bja wona. Ke moka Baisiraele ba fa Joshua morwa wa Nuni bohwa gare ga bona.
50 Ba ile ba mo nea motse wo a o kgopetšego ba laetšwe ke Jehofa, e lego motse wa Thiminathe-sera, woo o bego o le tikologong ya dithaba tša Efuraime, ke moka a tsošološa motse woo gomme a dula go wona.
51 Tše e be e le dinaga tšeo moperisita Eleasara le Joshua morwa wa Nuni le baetapele ba malapa a meloko ya Baisiraele ba di abilego e le bohwa ka matengwa kua Shilo pele ga Jehofa, mojakong wa tente ya kopano. Ka gona ba fetša go aba naga.
Mengwalo ya tlase
^ Ke gore, “moloko wa Juda.”
