Joshua 2:1-24
2 Ke moka ge ba le Shithima, Joshua morwa wa Nuni o ile a roma banna ba babedi ka sephiring gore ba yo hlola naga, o ile a re go bona: “Eyang le yo hlola naga, kudukudu Jeriko.” Ka gona, ba ya gomme ba fihla ntlong ya mosadi wa mogweba-ka-mmele yo a bitšwago Rahaba, gomme ba dula moo.
2 Ke moka kgoši ya Jeriko ya botšwa gore: “Banna ba Baisiraele ba tlile bošego go tlo hlola naga.”
3 Bjale kgoši ya Jeriko ya roma banna ba bangwe go Rahaba gore ba mmotše gore: “Ntšha banna bao ba lego ka mo ntlong ya gago ka gobane ba tlile go hlola naga ye ka moka.”
4 Eupša mosadi yoo a uta banna bao ba babedi. Ke moka a re: “Ee, banna ba babedi ba tlile go nna eupša ga ke tsebe gore ba be ba etšwa kae.
5 Banna bao ba sepetše ge leswiswi le swara, nakong ya ge keiti e le kgauswi le go tswalelwa. Ga ke tsebe gore ba ile kae, eupša ge le ka ba rakediša kapelapela le tlo ba swara.”
6 (Lega go le bjalo, o be a ba išitše tlhakeng gomme a ba utile ka gare ga mahlaka ao a bego a a pakile ka godimo ga tlhaka.)
7 Banna bao ba bego ba romilwe ke kgoši ba ile ba rakediša banna bao ba bego ba tlile go hlola naga ba lebile ka thoko ya moo batho ba tshelago Noka ya Jorodane. Ka morago ga gore ba tšwe motseng, keiti e ile ya tswalelwa.
8 Pele banna bao ba bego ba tlile go hlola naga ba ka robala, Rahaba o ile a ya go bona
9 gomme a re: “Ke a tseba gore Jehofa o tlo le fa naga ye le gona re tšhogile ka baka la lena. Badudi ka moka ba naga ba a thothomela ka baka la lena,
10 ka gobane re kwele gore ge le be le etšwa Egepeta, Jehofa o ile a omiša Lewatle le Lehwibidu gore le kgone go feta, ra kwa le ka dikgoši tše pedi tša Baamore e lego Sihoni le Ogo, tšeo le di bolailego ka mošola* wa Noka ya Jorodane.
11 Ge re ekwa seo, re ile ra fela matla e bile ga go na yo a nago le sebete sa go lwa le lena ka gobane Jehofa Modimo wa lena ke Modimo a nnoši magodimong le mo lefaseng.
12 Bjale, ke kgopela le nkeneleng ka Jehofa gore ka ge ke le bontšhitše botho,* le lena le tla bontšha ba lapa la tate botho,* le be le mphe bohlatse bjo bo bontšhago gore le tlo botegela keno ye.
13 Le phološe tate, mma, bana ba gešo le bohle bao ba nago le bona, le re phološe* gore re se ke ra hwa.”
14 Ge a realo, banna bao ba re go yena: “Ge e ba re ka se dire seo re go tshepišitšego sona, gona Modimo a re bolaye!* Ge e ba le ka se botše motho ka taba ye ya rena, gona e tla re ge Jehofa a re fa naga ye le rena re tla le bontšha botho* le go le botegela.”
15 Ka morago ga moo a ba ntšha ka lefasetere a ba theoša ka thapo ka ge ntlo ya gagwe e be e kgomagane le leboto la motse. Ge e le gabotse, ntlo ya gagwe e be e agilwe lebotong.
16 A re go bona: “Eyang dithabeng le ikute moo ka matšatši a mararo, gore bao ba le rakedišago ba se ke ba le hwetša. E tla re ge ba boile le tla kgona le boela morago.”
17 Ke moka banna bao ba re go yena: “Re tla phetha keno yeo o re enišitšego yona ge e ba o ka dira dilo tše di latelago:
18 Ge re etla nageng ye, re hwetše o bofeletše thapo ye ya mmala o mohwibiduhwibidu lefasetereng leo o re ntšhitšego ka lona. O swanetše go kgoboketša mmago, tatago, bana ba geno le ba leloko la tatago ka ntlong ye.
19 Yo mongwe le yo mongwe yo a tšwelago ka ntle gomme a bolawa, molato e tla ba e le wa gagwe* gomme rena re tla be re se na molato. Eupša ge go ka bolawa motho yo a nago le wena ka ntlong, e tla ba e le molato wa rena.*
20 Eupša ge o ka botša batho ka taba ye ya rena, gona re ka se phethe keno yeo o re enišitšego yona.”
21 Yena a re: “Go lokile, ke tla dira seo le mpoditšego sona.”
Ke moka a ba tlogela ba sepela. Ka morago ga moo a bofelela thapo ya mmala o mohwibiduhwibidu lefasetereng.
22 Ke moka ba sepela ba fihla dithabeng, ba dula moo matšatši a mararo go ba go fihla ge bao ba ba rakedišago ba boetše motseng. Banna bao ba bego ba ba rakediša ba be ba ba nyaka ditseleng ka moka eupša ba se ba hwetše.
23 Banna bao ba babedi ba theoga dithabeng ba tshela noka gomme ba fihla go Joshua morwa wa Nuni. Ke moka ba mmotša dilo ka moka tšeo di ba diragaletšego.
24 Bona ba re go Joshua: “Jehofa o re file naga yela ka moka. E bile badudi ba yona ba a thothomela ka baka la rena.”
Mengwalo ya tlase
^ Ke gore, “ka thoko ya bohlabela.”
^ Goba, “lerato le le botegago.”
^ Goba, “lerato le le botegago.”
^ Goba, “le phološe meoya ya rena.”
^ Goba, “go hwe meoya ya rena go e na le gore go hwe meoya ya lena.”
^ Goba, “lerato le le botegago.”
^ Phetolelo ya lentšu ka lentšu e re, “ madi a gagwe a tla ba hlogong ya gagwe.”
^ Phetolelo ya lentšu ka lentšu e re, “madi a gagwe a tla nyakwa dihlogong tša rena.”
