Joshua 20:1-9
-
Metse ya botšhabelo (1-9)
20 Ke moka Jehofa a bolela le Joshua a re:
2 “Botša Baisiraele o re: ‘Ikgetheleng metse ya botšhabelo yeo ke boditšego Moshe gore a le botše ka yona,
3 e le gore motho yoo a bolayago yo mongwe ka phošo a tšhabele moo. Le tla tšhabela metseng ye gore wa leloko* la gabo motho yo a bolailwego a se ke a itefeletša.
4 Mmolai yoo o swanetše go tšhabela go o mongwe wa metse ye gomme a eme keiting ya wona, gomme a botše banna ba bagolo seo a se dirilego. Ke moka bona ba tla mo amogela motseng woo gomme ba mo nea lefelo leo a ka dulago go lona.
5 Ge e ba wa leloko la gabo motho yo a bolailwego a nyaka go mmolaya gore a itefeletše, banna ba bagolo ga se ba swanela go mo dumelela gore a mmolaye, ka gobane o mmolaile ka phošo e bile o be a se a mo hloya.
6 O swanetše go dula moo go fihla a sekišwa pele ga phuthego le go fihla ge moperisita yo a phagamego yo a hlankelago ka nako yeo a hlokofala. Ke moka motho yo a bolailego yo mongwe a ka boela motseng woo a tšhabilego go wona, gomme a ya ntlong ya gagwe.’”
7 Ka gona, ba neela* motse wa Kedeshe kua Galelia dithabeng tša Nafutali le Shikeme kua dithabeng tša Efuraime gotee le Kiriathe-araba, ke gore Heburone, kua dithabeng tša Juda gore e be metse ya botšhabelo.
8 Tikologong ya Noka ya Jorodane ka bohlabela bja Jeriko, ba kgetha Betsera molokong wa Rubeni, yeo e lego lešokeng leo le lego mmotong le Ramothe kua Gileada molokong wa Gada gotee le Golani kua Bashani molokong wa Manase.
9 Ye e be e le metse yeo e kgethetšwego Baisiraele ka moka le bao ba dulago le bona eupša e se Baisiraele, gore motho le ge e le ofe yo a ka bolayago yo mongwe ka phošo a tšhabele moo, e le gore wa leloko la gabo yo a bolailwego a se ke a itefeletša go fihlela motho yo a bolailego yo mongwe a sekišwa pele ga setšhaba.
