Joshua 24:1-33
-
Joshua o hlalosa seo se ilego sa diragalela Baisiraele (1-13)
-
Baisiraele ba kgothaletšwa go hlankela Jehofa (14-24)
-
“Ge e le nna le lapa la ka re tla hlankela Jehofa” (15)
-
-
Joshua o dira kgwerano le Baisiraele (25-28)
-
Joshua o a hlokofala gomme o a bolokwa (29-31)
-
Marapo a Josefa a bolokwa Shikeme (32)
-
Eleasara o a hlokofala gomme o a bolokwa (33)
24 Ke moka Joshua a kgobokanya meloko ka moka ya Isiraele kua Shikeme, a bitša banna ba bagolo ba Isiraele, baetapele ba yona, baahlodi le bahlankedi ba yona gomme ba ema pele ga Modimo wa nnete.
2 Joshua a re go setšhaba ka moka: “Jehofa Modimo wa Isiraele o itše: ‘Nakong e fetilego, borakgolokhukhu ba lena, go akaretša le Thera tatago Aborahama le Nahoro, ba be ba dula ka mošola wa Noka ya Eforate, gomme ba be ba hlankela medimo e mengwe.
3 “‘Ge nako e dutše e eya, ka laela rakgolokhukhu wa lena Aborahama gore a tloge ka mošola wa Noka ya Eforate, ke moka ka mo sepediša nageng ka moka ya Kanana gomme ka mo dira gore a be le ditlogolo* tše dintšhi. Ka mo šegofatša, ke moka a ba tatago Isaka.
4 Ke moka Isaka a ba tatago Jakobo le Esau. Ka morago Esau ka mo fa Thaba ya Seire gore e be ya gagwe gomme Jakobo le barwa ba gagwe ba theogela Egepeta.
5 Ka morago ka roma Moshe le Arone Egepeta, ke moka ka tlišetša Egepeta dikotlo gomme ka le ntšha go yona.
6 Ge ke ntšha botatago lena Egepeta gomme ba fihla lewatleng, Baegepeta ba ile ba ba rakediša ka dikoloi tša ntwa le ka mašole a go namela dipere go fihla Lewatleng le Lehwibidu.
7 Ke moka ba thoma go llela nna Jehofa. Ka gona, ka bea leswiswi magareng ga bona le Baegepeta ke moka ka khurumetša Baegepeta ka lewatle gomme la iponela ka mahlo a lena tšeo ke di dirilego Egepeta. Ke moka le ile la dula lešokeng mengwaga e mentšhi.
8 “‘Ka gona, ka le tliša nageng ya Baamore bao ba bego ba dula ka mošola wa Noka ya Jorodane,* gomme bona ba lwa le lena. Ka le thuša gore le ba fenye gore le tšee naga ya bona gomme ka ba fediša pele ga lena.
9 Ka morago Balaka morwa wa Tsiporo, kgoši ya Moaba, a ya go lwa le Baisiraele. Ke moka a laela gore go bitšwe Bileama morwa wa Beoro gore a le rogake.
10 Eupša ka gana go theetša Bileama. Go e na le moo, ka mo dira gore a le šegofatše gantšhintšhi gomme ka le phološa seatleng sa gagwe.
11 “‘Ke moka la tshela Noka ya Jorodane la fihla Jeriko gomme baetapele* ba Jeriko, e lego Baamore, Baperetse, Bakanana, Bahethe, Bagirigashe, Bahefe le Bajebusi, ba lwa le lena, eupša nna ka le thuša gore le ba fenye.
12 Ka gona, ka ba dira gore ba fele matla* pele ga lena, ke moka ba le tšhaba go swana le ge dikgoši tše pedi tša Baamore di ile tša le tšhaba. Ga se la ba fenya ka tšhoša ya lena goba ka bora bja lena.
13 Ka le fa naga yeo le sa kago la e šomela le metse yeo le sa kago la e aga gomme la dula go yona. Ga bjale le ja dienywa tša dirapa tša diterebe le tša mehlware tšeo le sa kago la di bjala.’
14 “Bjale boifang Jehofa gomme le mo hlankele ka go botega* le go rereša. Le gona le tloše medimo yeo borakgolokhukhu ba lena ba bego ba e hlankela ka mošola wa Noka ya Eforate le kua Egepeta gomme le hlankele Jehofa.
15 Ka gona, ge e ba le bona go hlankela Jehofa e le selo se sebe mahlong a lena, gona ikgetheleng lehono yoo le tlago go mo hlankela. Na le tlo hlankela medimo yeo borakgolokhukhu ba lena ba bego ba e hlankela ka mošola wa Noka ya Eforate goba le tlo hlankela medimo ya Baamore bao le dulago nageng ya bona? Le swanetše go itirela phetho. Eupša ge e le nna le lapa la ka re tla hlankela Jehofa.”
16 Ge a realo setšhaba sa re: “Ruri re ka se tlogele Jehofa ra yo hlankela medimo e mengwe.
17 Jehofa Modimo wa rena ke yena a ntšhitšego rena le botatago rena nageng ya Egepeta moo re bego re le makgoba,* e bile ke yena yo a dirilego mehlolo e megolo mahlong a rena gomme a dula a re hlokometše tseleng ka moka yeo re sepetšego go yona le gare ga ditšhaba ka moka tšeo re fetilego go tšona.
18 Jehofa o rakile batho ka moka bao peleng ba bego ba dula mo. Ka gona, le rena re tla hlankela Jehofa ka gobane ke Modimo wa rena.”
19 Ke moka Joshua a re go setšhaba: “Le ka se kgone go hlankela Jehofa ka gobane ke Modimo yo mokgethwa. Ke Modimo yo a nyakago gore le rapele yena a nnoši. Ge e ba le ka se dire bjalo, a ka se le lebalele dikarogo tša lena le dibe tša lena.
20 Jehofa o be a dula a le direla dilo tše dibotse, eupša ge le ka mo tlogela gomme la hlankela medimo e mengwe, o tlo le otla gomme a le fediša.”
21 Eupša setšhaba sa re go Joshua: “Re tla hlankela Jehofa!”
22 Ke moka Joshua a re go setšhaba: “Lena ka noši le dihlatse tša gore le ikgethetše go hlankela Jehofa.” Ge a re’alo sona sa re: “Re dihlatse.”
23 “Bjale tlošang medimo e šele yeo e lego gare ga lena gomme le hlankele Jehofa Modimo wa Isiraele ka dipelo tša lena ka moka.”
24 Ke moka setšhaba sa re go Joshua: “Re tla hlankela Jehofa Modimo wa rena e bile re tla mo kwa!”
25 Ke moka Joshua a dira kgwerano le setšhaba letšatšing leo, a ba a se nea ditaelo le melao kua Shikeme.
26 Ke moka Joshua a ngwala mantšu a ka pukung ya Molao wa Modimo gomme a tšea leswika le legolo a le hloma gona moo ka tlase ga mohlare o mogologolo wo o lego kgauswi le lefelo le lekgethwa la Jehofa.
27 Ke moka Joshua a re go setšhaba: “Bonang! Leswika le le kwele dilo ka moka tšeo Jehofa a re boditšego tšona. Le gona e tla ba hlatse ya gore le ka se latole Modimo wa lena.”
28 Ke moka Joshua a re motho yo mongwe le yo mongwe a boele nageng yeo a bego a e abetšwe.
29 Ka morago ga moo, Joshua morwa wa Nuni, mohlanka wa Jehofa, a hlokofala a na le mengwaga e 110 (lekgolo le e lesome).
30 Ke moka ba mmoloka nageng yeo e bego e le bohwa bja gagwe kua Thiminathe-sera, yeo e lego tikologong ya dithaba tša Efuraime ka leboa la Thaba ya Gaashe.
31 Baisiraele ba tšwela pele ba hlankela Jehofa nakong ka moka ya ge Joshua a sa phela le mehleng ka moka ya banna ba bagolo bao ba phetšego ka morago ga Joshua, le bao ba bonego dilo ka moka tšeo Jehofa a di diretšego Isiraele.
32 Marapo a Josefa ao Baisiraele ba tlogilego le ona Egepeta, a ile a bolokwa kua Shikeme karolong ya tšhemo yeo Jakobo a bego a e rekile ka ditšhelete tša silifera tše 100 go barwa ba Hamoro, tatago Shikeme. Ke moka ya ba bohwa bja barwa ba Josefa.
33 Eleasara morwa wa Arone le yena a hlokofala. Ke moka ba mmoloka Mmotong wa Finease morwa wa gagwe, woo a bego a o filwe tikologong ya dithaba tša Efuraime.
Mengwalo ya tlase
^ Phetolelo ya lentšu ka lentšu e re, “ka atiša peu ya gagwe.”
^ Ke gore, “ka bohlabela.”
^ Goba mohlomongwe, “beng ba naga.”
^ Goba mohlomongwe, “ba tšhoge goba ba tlalelwe”
^ Goba, “ka go hloka molato.”
^ Phetolelo ya lentšu ka lentšu e re, “ntlong ya makgoba.”
