Joshua 5:1-15
5 Gateetee ge dikgoši ka moka tša Baamore tšeo di bego di le ka bodikela bja Noka ya Jorodane gotee le dikgoši ka moka tša Bakanana tšeo di bego di bapile le lewatle di kwele gore Jehofa o gopišitše meetse a Noka ya Jorodane pele ga Baisiraele ka moka go fihlela ge ba tshetše, tšona tša felelwa ke matla tša hloka sebete sa go lwa le Baisiraele.
2 Ka yona nako yeo Jehofa a re go Joshua: “Itirele dithipa ka maswika gomme o bolotše banna ba Isiraele gape.”
3 Ke moka Joshua a itirela dithipa ka maswika gomme a bolotša banna ba Isiraele kua Gibeathe-haralothe.
4 Lebaka la gore Joshua a ba bolotše ke le: Banna ka moka bao ba tšwilego Egepeta, e lego banna ka moka ba ntwa,* ba be ba hwetše tseleng kua lešokeng ka morago ga gore ba tšwe Egepeta.
5 Banna ka moka bao ba tšwilego Egepeta ba be ba boloditšwe, eupša banna ka moka bao ba belegetšwego tseleng kua lešokeng ge ba etšwa Egepeta ba be ba sa bolotšwa.
6 Baisiraele ba be ba sepetše mengwaga e 40 lešokeng go fihlela ge banna ka moka ba ntwa bao ba tšwelego Egepeta, bao ba sa kago ba kwa lentšu la Jehofa, ba fedišitšwe. Jehofa o be a ba enetše gore a ka se ba dumelele ba bona naga yeo Jehofa a e enetšego borakgolokhukhu ba bona gore o tla e nea batho ba gagwe,* e lego naga yeo e elago maswi le dinose.
7 O ile a e nea barwa ba bona legatong la bona. Joshua o ile a ba bolotša ka gobane ba be ba se ba bolotšwa ge ba be ba le leetong.
8 Ge banna ka moka ba feditše go bolotšwa, ba dula dikampeng tša bona go fihlela ge ba fodile.
9 Ke moka Jehofa a re go Joshua: “Lehono ke tlošitše selo seo se bego se dira gore le ikwe le nyatšega ge le be le le Egepeta.” Ka gona lefelo leo la bitšwa Giligala go fihla le lehono.
10 Baisiraele ba ile ba tšwela pele ba dutše dikampeng kua Giligala leganateng la Jeriko gomme ba keteka paseka ka letšatši la bo-14 la kgwedi e le mantšiboa.
11 Ka morago ga letšatši la paseka, ba ile ba ja ditšweletšwa tša naga, ba ja dinkgwa tše di sa omelwago le dithuthupe lona letšatšing leo.
12 Ke moka letšatšing le le latelago manna a se sa hlwa a eba gona ge ba šetše ba jele ditšweletšwa tša naga, le gona Baisiraele ba se sa hlwa ba hwetša manna, eupša ba thoma go ja ditšweletšwa tša naga ya Kanana ngwageng wona woo.
13 Ka letšatši le lengwe ge Joshua a le kgauswi le Jeriko, o ile a bona monna yo mongwe a eme pele ga gagwe a swere tšhoša seatleng sa gagwe. Ka gona Joshua a mmatamela a re go yena: “Na o eme le rena goba le manaba a rena?”
14 Yena a re: “Aowa, nna ke kgošana ya madira a Jehofa.” Ge a realo Joshua a wela fase ka tlhompho a khunama a re: “Mong wa ka, ke’ng seo o nyakago go se botša mohlanka wa gago?”
15 Ke moka kgošana ya madira a Jehofa ya re go Joshua: “Rola diramphašane, ka gobane lefelo leo o emego go lona ke le lekgethwa.” Joshua a di rola kapelapela.
Mengwalo ya tlase
^ Goba, “banna ka moka bao mengwaga ya bona e bego e ba dumelela go ya ntweng.”
^ Phetolelo ya lentšu ka lentšu e re, “rena.”
