Joshua 7:1-26
7 Baisiraele ga se ba kwa taelo ya Joshua ya gore ba fediše dilo tšeo di bego di swanetše go fedišwa, ka gobane Akane morwa wa Karami, morwa wa Sabadi, morwa wa Tsera, wa moloko wa Juda, o ile a utswa dilo tšeo di bego di swanetše go fedišwa. Ka baka leo, Jehofa o ile a galefela Baisiraele kudu.
2 Ke moka Joshua a roma banna bao ba tšwago Jeriko gore ba ye Ai yeo e bego e le kgauswi le Bethe-abene ka bohlabela bja Bethele, gomme a re go bona: “Rotogang le yo hlola naga.” Banna bao ba rotoga ba yo hlola Ai.
3 Ge ba boa ba botša Joshua ba re: “Ga go hlokagale gore go ye mašole ka moka. Go hlokega feela mašole a e ka bago a 2 000 (dikete tše pedi) goba a 3 000 (dikete tše tharo) gore re fenye Ai. O se ke wa lapiša mašole ka moka ka go a dira gore a ye moo, ka gobane batho ba Ai ga se ba bantšhi.”
4 Ka gona, mašole a e ka bago a 3 000 (dikete tše tharo) a rotogela moo, eupša ge banna ba Ai ba etla go kopana le bona, ba ile ba tšhaba.
5 Banna ba Ai ba ile ba ba kitimiša go tloga ka ntle ga dikeite tša motse, go fihla motheogeng le go fihla Shebarima, gomme ba bolaya mašole a 36. Setšhaba se ile sa boifa ke moka sa se sa ba le matla a go lwa.
6 Ke moka Joshua le banna ba bagolo ba Isiraele ba gagola diaparo tša bona, ba wela fase ka difahlego pele ga areka ya Jehofa go fihla mantšiboa, ba dulela go itšhela ka lerole dihlogong.
7 Joshua a re: “Joo, Mmuši Morena Jehofa, go re’ng o re tshedišitše Noka ya Jorodane, e le gore re tle re fenywe ke Baamore gore ba re fediše? Nkabe re ile ra no itulela ka mošola wa Noka ya Jorodane!
8 Ntshwarele hle Jehofa, bjale ke tla reng ka ge Isiraele e tšhabile manaba a yona?
9 Ge Bakanana le badudi ka moka ba naga ye ba ekwa se, ba tlo re dikologa ke moka ba re bolaya gomme gwa se sa ba le motho yo a gopolago leina la rena mo lefaseng. Bjale o tla šireletša bjang leina la gago le le hlomphegago?”
10 Ke moka Jehofa a re go Joshua: “Ema! O re’ng o wetše fase ka sefahlego sa gago?
11 Baisiraele ba dirile sebe, ba tshetše kgwerano ya ka yeo ke ba laetšego gore ba e boloke. Ba tšere tše dingwe tša dilo tšeo di bego di swanetše go fedišwa, ba di utswa gomme ba di uta merwalong ya bona.
12 Baisiraele ba ka se kgone go lwa le manaba a bona ba a fenya. Ba tla tšhaba manaba a bona, ka gobane ke itše ba tla fedišwa. Ge le ka se bolaye motho yoo ke rego o swanetše go bolawa, nka se sa le thekga.
13 Ema! Botša setšhaba gore se itokiše,* gomme o re go sona: ‘Itokišetšeng letšatši la gosasa ka gobane Jehofa Modimo wa Isiraele o re: “Baisiraele, go na le monna yo mongwe mo gare ga lena yo a swanetšego go bolawa. Ge le ka se mmolaye, le ka se kgone go lwa le manaba a lena la a fenya.
14 Gosasa mesong le kgobokane go ya ka meloko ya lena, moloko woo Jehofa a o kgethago o batamele pele ga Modimo go ya ka malapa a wona, gomme lapa leo Jehofa a le kgethago le batamele pele ga Modimo go ya ka dintlo tša lona. Ke moka ntlo yeo Jehofa a e kgethago e batametše banna ba yona.
15 Yo a ka hwetšwago a na le dilo tšeo di swanetšego go fedišwa a fišwe ka mollo gotee le dilo tša gagwe ka moka, ka gobane o tshetše kgwerano ya Jehofa e bile o dirile dilo tša go leša dihlong gare ga Baisiraele.”’”
16 Ke moka Joshua a tsoga ka masa a batametša Baisiraele pele ga Modimo moloko ka moloko, gwa tanywa moloko wa Juda.
17 Ka morago a batametša malapa a Juda, gwa tanywa lapa la Tsera, ke moka a batametša lapa la Tsera, monna ka monna, gwa tanywa Sabadi.
18 Mafelelong gwa batametšwa ba ntlo ya Sabadi, monna ka monna, gomme gwa tanywa Akane morwa wa Karami, morwa wa Sabadi, morwa wa Tsera, wa moloko wa Juda.
19 Ke moka Joshua a re go Akane: “Morwa wa ka, anke o nee Jehofa Modimo wa Isiraele letago, o ipobole go yena. Hle mpotše, o dirile’ng? O se ke wa nkutela selo.”
20 Akane a araba Joshua a re: “Ka nnete ke senyeditše Jehofa Modimo wa Isiraele, se ke se dirilego se se:
21 Eitše ge ke bona kobo e botse kudu yeo e tšwago Shineara le dishekele* tše 200 (makgolo a mabedi) tša silifera gotee le gauta ya boima bja dishekele tše 50 dilong tšeo di bego di swanetše go fedišwa, ka di duma gomme ka di tšea. Ke di epetše ka tenteng ya ka gomme le tšhelete e gona moo.”
22 Gateetee Joshua a roma baromiwa ba kitimela ka tenteng ya Akane. Ba hwetša seaparo se utilwe ka tenteng gomme tšhelete e le ka fase ga sona.
23 Ba di tšea ka tenteng ba di tliša go Joshua le Baisiraele ka moka, ba di bea pele ga Jehofa.
24 Joshua le Baisiraele ka moka ba tšea Akane morwa wa Tsera, ba tšea silifera le kobo e botse le gauta le barwa le barwedi ba gagwe, dipoo le ditonki tša gagwe, dinku le dipudi tša gagwe, tente ya gagwe gotee le dilo ka moka tšeo e bego e le tša gagwe, ba di iša Moeding wa Akore.
25 Ke moka Joshua a re: “Ke ka baka la’ng o re tlišeditše madimabe? Lehono Jehofa a ka se go kwele bohloko.” Ka morago ga moo, Baisiraele ka moka ba ba kgatla ka maswika gomme ba ba tšhuma ka mollo. Ka wona mokgwa woo, ba ba kgatla ka moka ka maswika.
26 Ke moka ba kgoboketša maswika a magolo godimo ga gagwe, maswika ao a sa dutše a le gona le lehono. Ka go re’alo, Jehofa a se sa hlwa a ba galefetše. Ke ka lebaka leo go fihla le lehono lefelo leo le bitšwago Moedi wa Akore.
Mengwalo ya tlase
^ Phetolelo ya lentšu ka lentšu e re, “ikgethagatše.”
^ “Shekele e tee” e lekana le digrama tše 11,4. Bona Dit. B14.
