Joshua 9:1-27
9 Ge dikgoši ka moka tšeo di lego ka bodikela bja Noka ya Jorodane di ekwa seo se ilego sa direga, dikgoši tšeo di dulago metseng yeo e lego tlase ga dithaba,* kgauswi le lebopo ka moka la Lewatle le Legolo* gotee le go lebana le Libanoni, e lego Bahethe, Baamore, Bakanana, Baperetse, Bahefe le Bajebusi,
2 tša kwana gore di yo lwa le Joshua le Baisiraele.
3 Badudi ba Gibeoni le bona ba ile ba kwa seo Joshua a se dirilego Jeriko le Ai.
4 Ka gona, ba ile ba dira dilo ka bohlale gomme ba tšea mefago ya bona ba e tsenya ka masakeng ao a hlagetšego gomme ba a rweša ditonki tša bona, gotee le mapotlelo a mokgopa, ao a bego a palegile e bile a rokilwe.
5 Le gona, ba be ba rwele diramphašane tšeo di hlagetšego e bile di rokilwe, gomme ba apere diaparo tšeo di hlagetšego. Dinkgwa tšeo ba bego ba di swere di be di omeletše e bile di rathagane.
6 Ke moka ba ya go Joshua kampeng kua Giligala, ba bolela le yena le banna ba Isiraele ba re: “Re tšwa nageng ya kgole. Bjale dirang tumelelano ya khutšo le rena.”
7 Eupša banna ba Isiraele ba re go Bahefe:* “Mohlomongwe le dula tikologong ya rena. Ka gona re ka dira bjang tumelelano ya khutšo le lena?”
8 Bona ba re go Joshua: “Re bahlanka ba gago.”
Ke moka Joshua a re go bona: “Ke lena bomang, gona le tšwa kae?”
9 Ge a realo, ba re go yena: “Rena bahlanka ba gago re tšwa nageng ya kgole kudu, gomme re tlile mo ka ge re hlompha leina la Jehofa Modimo wa lena, ka gobane re kwele kamoo a tumilego ka gona le ka tšohle tšeo a di dirilego Baegepeta
10 le tšohle tšeo a di dirilego dikgoši tše pedi tša Baamore tšeo di bego di le ka mošola wa Noka ya Jorodane, e lego Sihoni kgoši ya Heshibone le Ogo kgoši ya Bashani, yeo e bego e le Ashitherothe.
11 Ka gona banna ba bagolo ba gabo rena le badudi ka moka ba naga ya rena ba itše go rena: ‘Tšeang mefago ya leeto le yo ba gahlanetša, le re go bona: “Re tla ba bahlanka ba lena. Bjale dirang tumelelano ya khutšo le rena.”’
12 Dinkgwa tše tša rena di be di sa fiša ge re be re dira mefago ka tšona re etla mo go lena, eupša gona bjale di omile e bile di rathagane.
13 Mapotlelo a a mokgopa re a tladitše beine e sa le a maswa, eupša gona bjale ke a a palegile. Le gona diaparo tša rena le diramphašane di hlagetše ka gobane leeto e be e le le letelele.”
14 Ge ba realo, banna ba Isiraele ba tšea* e mengwe ya mefago ya banna bao, eupša ba se botšiše Jehofa.
15 Ka gona Joshua a dira tumelelano ya khutšo le bona ya gore a ka se ba bolaye, gomme baetapele ba setšhaba le bona ba ba enela.
16 Ka morago ga matšatši a mararo ba dirile tumelelano le bona, ba kwa gore ba dula kgauswi le bona, gona moo tikologong ya bona.
17 Ke moka Baisiraele ba tšwa ba ya metseng ya bona letšatšing la boraro, metse ya bona e be e le Gibeoni, Kefira, Beerothe le Kiriathe-jearima.
18 Eupša Baisiraele ba se ba bolaye, ka gobane baetapele ba setšhaba ba be ba ba enetše ka Jehofa Modimo wa Isiraele. Ka gona setšhaba ka moka sa thoma go ngongoregela baetapele ba sona.
19 Ge baetapele ba ekwa gore setšhaba se a ngongorega, ba re go sona: “Ka ge re ba enetše ka Jehofa Modimo wa Isiraele, ga se ra dumelelwa go ba bolaya.
20 Seo re tlago go ba dira sona ke se: Re ka se ba bolaye, e le gore re se ke ra galefelwa ke Modimo ka baka la keno yeo re ba enetšego yona.”
21 Ka gona, go etša ge baetapele ba setšhaba ba tshepišitše Bagibeoni, ba ile ba oketša ka gore: “Ba leseng ba phele eupša mošomo wa bona e tla ba go rwalela setšhaba dikgong le go se gela meetse.”
22 Joshua a bitša Bagibeoni a re go bona: “Ke ka baka la’ng le re forile la re: ‘Re tšwa nageng ya kgole kudu le lena,’ mola e le gore le dula kgauswi le rena?
23 Bjale le rogakilwe, le tla dula le le makgoba e bile le rwalela ntlo ya Modimo wa ka dikgong le go e gela meetse.”
24 Ke moka ba araba Joshua ba re: “Ke ka gobane rena bahlanka ba gago re boditšwe tsebe-go-kwa gore Jehofa Modimo wa lena o laetše Moshe mohlanka wa gagwe gore o tla le nea naga ye ka moka le go fediša badudi ka moka ba naga ye pele ga lena. Ka gona re ile ra tšhogela maphelo a rena ka baka la lena gomme ra dira sona se.
25 Bjale re diatleng tša gago. Re dire seo o bonago se lokile e bile e le se sebotse mahlong a gago.”
26 Ke moka Joshua a dira ka wona mokgwa woo a ba a ba šireletša, gomme a se dumelele Baisiraele ba ba bolaya.
27 Eupša go thoma letšatšing leo Joshua a dira gore ba rwalele setšhaba dikgong le go se gela meetse, a ba a dira gore ba rwalele aletare ya Jehofa dikgong le go e gela meetse lefelong leo A tlago go le kgetha, e bile go sa le bjalo go fihla le lehono.
Mengwalo ya tlase
^ Goba, “Shefela.”
^ Ke gore, “Mediterranean.”
^ Ka nako yeo Bahefe ba be ba dula Gibeoni.
^ Goba, “ba hlahloba.”
