Lengwalo la Juda 1:1-25
1 Nna Juda mohlanka wa Jesu Kriste, e bile ke le ngwanabo Jakobo, ke ngwalela bao ba biditšwego e bile ba ratwa ke Modimo Tatago rena le bao Modimo a ilego a ba kgoboketša gore ba tle ba be le Jesu Kriste, ke re:
2 Eka Modimo a ka le okeletša kgaugelo, khutšo le lerato tšeo a le bontšhago tšona.
3 Banabešo le dikgaetšedi bao ba rategago, mathomong ke be ke nyaka go le ngwalela mabapi le kamoo Modimo a re phološago ka gona, eupša gona bjale ke bona ke swanetše go le ngwalela le go le kgothatša gore le lwele ka matla tumelo yeo e ilego ya fiwa bakgethwa gatee gore e be ya ka mo go sa felego.
4 Lebaka la gore ke le ngwalele ke gore go na le banna bao ba tsenego gare ga lena le sa ba lemoge, bao Mangwalo a boletšego ka bona kgalekgale gore ba tlo ahlolwa. Ke banna ba go se boife Modimo, bao ba dirišago botho bjo bogolo bja Modimo gampe e le lebaka la gore ba itshware ka tsela yeo e feteletšego,* e bile ga ba botegele mong wa rena a nnoši yoo gape e lego Morena wa rena, Jesu Kriste.
5 Le ge le tseba dilo tše ka moka, ke nyaka go le gopotša gore Jehofa* yo a ilego a phološa batho nageng ya Egepeta ka morago o ile a fediša bao ba bego ba sa bontšhe tumelo.
6 Ke moka barongwa bao ba ilego ba tlogela kabelo yeo Modimo a bego a ba file yona le madulo a bona legodimong, o ba lahletše sa ruri leswiswing gore a tle a ba ahlole letšatšing le legolo.
7 Ka mo go swanago, motse wa Sodoma le motse wa Gomora le metse yeo e bego e le kgauswi le metse ye, le yona e ile ya ineela boitshwarong bjo bo šišimišago bja tša thobalano,* le gona e ile ya nwelela dikganyogong tša nama tšeo e sego tša tlhago. E ile ya otlwa ka mollo wa ka mo go sa felego, ka go realo ya ba mohlala wa temošo go rena.
8 Lega go le bjalo, banna ba ba dula ba nagana ka dilo tše mpe, ba dira dilo tšeo di šilafatšago mebele, ba nyatša bolaodi e bile ba bolela gampe ka bao Modimo a ba neago letago.
9 Eupša ge Mikaele morongwa yo mogolo a be a ngangišana le Diabolo ka setopo sa Moshe, ga se a ka a nagana gore o na le tshwanelo ya go mo ahlola, eupša o ile a re: “Anke Jehofa* a go kgalemele.”
10 Le gona, banna ba ba swayaswaya diphošo dilo ka moka tšeo ba sa di kwešišego gabotse. Le gona dilo ka moka tšeo ba di kwešišago ka tlhago go swana le diphoofolo tšeo di sa kgonego go nagana, ba tšwela pele ba ikgobatša ka tšona.
11 Ke ba madimabe ka gobane ba ekišitše dilo tše mpe tšeo Kaine a bego a di dira, e bile ba kitimetše go ekiša tsela e fošagetšego yeo Bileama a bego a phela ka yona gore ba hwetše moputso. Le gona ba ile ba fedišwa ka baka la go bolela gampe ka banna bao ba etelelago pele go swana le ge Kora a ile a dira bjalo.
12 Banna ba ba na le lena menyanyeng ya lena yeo le e dirilego go bontšha gore le rata banababo lena, eupša ba swana le maswika ao a iphihlilego ka fase ga meetse, ke badiši bao ba nagannego ka go fepa dimpa tša bona feela. Ba swana le maru ao a išwago kua le kua ke phefo eupša a sa neše pula. Le gona, ba swana le mehlare yeo e sa enywego dienywa ka nako ya yona, yeo e hwetšego sa ruri e bile e tumotšwe.
13 Ka ge ba sa hlabišwe dihlong ke dilo tšeo ba di dirago, ba swana le maphoto a lewatle ao a galefilego ao a ntšhetšago ditšhila tša lona ka ntle, ba swana le dinaledi tšeo di sa laolegego, tšeo Modimo a tlago go di bea leswiswing le legolo go ya go ile.
14 Le Henoge motho wa bošupa go tloga go Adama o ile a porofeta ka bona ge a be a re: “Bonang! Jehofa* o tlile le barongwa ba gagwe ba bantšhi* kudu ba matla,
15 go tlo ahlola batho ka moka le go utolla bobe bja badiradibe bao ba sa mmoifego. Modimo o dira dilo tše ka moka ka gobane ba dira mehuta ka moka ya bobe e bile ba bolela gampe ka yena.”
16 Banna ba ba dula ba ngongorega e bile ga ba kgotsofalele seo ba nago le sona, ba latela dikganyogo tša bona tše mpe, ba bolela dilo tšeo di bontšhago gore ba a ikgogomoša, ge ba dutše ba reta ba bangwe gore ba ikhole.
17 Ge e le lena banabešo le dikgaetšedi, gopolang dilo tšeo di ilego tša bolelwa e sa le pele ke baapostola ba Morena wa rena Jesu Kriste,
18 ge ba be ba fela ba re: “Mehleng ya bofelo go tlo ba le batho bao ba bolelago gampe ka dilo tšeo e lego tše dibotse, ba latela dikganyogo tša bona tše mpe tšeo Modimo a di hloilego.”
19 Ba ke bona bao ba dirago gore phuthego e arogane, banna ba ba itshwere go swana le diphoofolo, e bile ga ba hlahlwe ke moya wa Modimo.
20 Eupša lena banabešo le dikgaetšedi, imatlafatšeng ka go tiiša tumelo ya lena go Modimo le ka go rapela ka go dumelelana le moya o mokgethwa,
21 e le gore Modimo a dule a le rata,* ge le dutše le letetše gore Morena wa rena Jesu Kriste a le bontšhe kgaugelo yeo e tlago go le thuša gore le hwetše bophelo bjo bo sa felego.
22 Le gona, tšwelang pele le bontšha kgaugelo go bao ba thomago go belaela ditumelo tša bona.
23 Ba phološeng ka go ba ntšha mollong. Eupša le tšwele pele le gaugela ba bangwe, le dira bjalo ka go boifa. Ge le dutše le dira bjalo, le hloye dibe tša bona gomme le kgonthišetše gore ga di le šilafatše.
24 Modimo wa rena o kgona go le šireletša gore le se ke la dira sebe e bile o a le hlwekiša a ba a dira gore le thabe kudu.
25 Modimo wa rena a nnoši, yo a re phološago ka Jesu Kriste Morena wa rena, o swanelwa ke letago, bogolo, matla le bolaodi go tloga mehleng ya kgale, gona bjale le go ya go ile. Amene.
Mengwalo ya tlase
^ Bona Tlhaloso ya Mantšu.
^ Bona Dit. A5.
^ Bona Tlhaloso ya Mantšu.
^ Bona Dit. A5.
^ Bona Dit. A5.
^ Ke gore “ba diketekete.”
^ Phetolelo ya lentšu ka lentšu e re, “e le gore le duleng leratong la Modimo.”
