Lefitiko 11:1-47
-
Diphoofolo tšeo di hlwekilego le tšeo di sego tša hlweka (1-47)
11 Ke moka Jehofa a bolela le Moshe le Arone a re:
2 “Botšang Baisiraele le re: ‘Diphoofolo tšeo le ka di jago mo lefaseng ke tše:
3 Le je phoofolo e nngwe le e nngwe yeo e otlago e bile e pharogile ditlhako, gomme ditlhako tšeo di tšwile diripa tše pedi.
4 “‘Eupša diphoofolo tše di latelago, tšeo di otlago e bile di pharogile ditlhako, ga se la swanela go di ja. Ya mathomo ke kamela ka gobane le ge e otla, ga e na ditlhako tšeo di pharogilego. Ka gona ga se ya hlweka.
5 Le pela le se ke la e ja ka gobane e a otla eupša ga e na ditlhako tšeo di pharogilego. Ka gona ga se ya hlweka.
6 Le mmutla le se ke la o ja ka gobane o a otla eupša ga o na ditlhako tšeo di pharogilego. Ga se wa hlweka.
7 Le kolobe le se ke la e ja ka gobane e na le ditlhako tšeo di pharogilego tšeo di tšwilego diripa tše pedi, eupša ga e otle. Ka gona ga se ya hlweka.
8 Le se ke la ja nama le ge e le efe ya tšona, e bile le se ke la di swara ge di hwile, ka gobane mo go lena ga se tša hlweka.
9 “‘Tše ke diphedi tša ka meetseng tšeo le ka di jago: Le ka ja sephedi se sengwe le se sengwe sa ka mawatleng goba dinokeng seo se nago le maphegwana le dikgapetla.
10 Eupša gare ga diphedi tšeo di sepelago ka dihlopha, le diphedi tše dingwe ka moka tša ka meetseng, sephedi se sengwe le se sengwe seo se phelago ka mawatleng le ka dinokeng, e lego seo se se nago maphegwana le dikgapetla, ga se sa hlweka.
11 Ka ge di se tša hlweka, ga se la swanela go ja nama ya tšona. Le gona le se ke la di swara ge di hwile.
12 Diphedi ka moka tša ka meetseng tšeo di se nago maphegwana le dikgapetla, ga se tša hlweka.
13 “‘Tše ke dinonyana tšeo di sa hlwekago tšeo le sa swanelago go di ja. Tšona ke ntšhu, pekwa ya ka lewatleng, le lenong le leso,
14 pekwa e khwibidu, mehuta ka moka ya dipekwa tše ntsho,
15 mehuta ka moka ya magokobu,
16 mpšhe, leribiši, nonyana ya ka lewatleng,* mehuta ka moka ya dipekwa,
17 leribiši le lenyenyane, nonyana e ntsho yeo e jago dihlapi, leribiši la ditsebe tše telele,
18 lepidibidi, mogole, lenong,
19 mogolodi, mehuta ka moka ya kokolohute, nonyana yeo e lekanago le leebana le lesesane, le mankgagane.
20 Diphedi ka moka tšeo di sepelago ka dihlopha tšeo di sepelago go swana le diphoofolo tša maoto a mane, ga se tša hlweka.
21 “‘Go diphedi tšeo di nago le maphego tša maoto a mane tšeo di sepelago ka dihlopha, le jeng feela tšeo di nago le maotwana a matelele tša go tabogataboga.
22 Mo go tšona, le ka ja tše di latelago: Ditšie tša mehutahuta tšeo di sa dulego lefelong letee, ditšie tše dingwe ka moka tšeo di jewago, ditsentsere le mehuta e mengwe ya ditšie.
23 Diphedi tše dingwe ka moka tšeo di nago le maphego tša maoto a mane, tšeo di sepelago ka dihlopha, ga se tša hlweka mo go lena.
24 Ge le ka ja diphedi tšeo, le tlo itšhilafatša. Yo mongwe le yo mongwe yo a di kgwathago ge di hwile, o tla ba yo a sa hlwekago go fihla mantšiboa.
25 Yo mongwe le yo mongwe yo a topago diphedi tšeo ge di hwile, a hlatswe diaparo tša gagwe. E tla ba yo a sa hlwekago go fihla mantšiboa.
26 “‘Phoofolo e nngwe le e nngwe yeo e otlago yeo e pharogilego ditlhako eupša ditlhako tšeo di se tša tšwa diripa tše pedi, ga se ya hlweka. Yo mongwe le yo mongwe yo a di kgwathago, e tla ba yo a sa hlwekago.
27 Ge e le diphoofolo ka moka tšeo di se nago ditlhako tšeo di sepelago ka maoto a mane, ga se tša hlweka mo go lena. Yo mongwe le yo mongwe yo a di kgwathago ge di hwile, e tla ba yo a sa hlwekago go fihla mantšiboa.
28 Yo a di rwalago ge di hwile, a hlatswe diaparo tša gagwe, e tla ba yo a sa hlwekago go fihla mantšiboa. Diphoofolo tšeo ga se tša hlweka mo go lena.
29 “‘Tše ke diphedi tšeo di sepelago ka dihlopha tšeo di sego tša hlweka mo go lena: Legotlo la go epa melete, legotlo, mehuta ka moka ya mekgaditswane,
30 go akaretša le mokgaditswane o monyenyane, mokgaditswane o mogolo, mokgaditswane wa ka meetseng, mokgaditswane wa santeng le leobu.
31 Tše ke diphedi tšeo di sepelago ka dihlopha tšeo di sego tša hlweka mo go lena. Motho yo mongwe le yo mongwe yo a di kgwathago ge di hwile, e tla ba yo a sa hlwekago go fihla mantšiboa.
32 “‘Bjale selo le ge e le sefe seo di hwelago go sona, e tla ba seo se sa hlwekago. E ka ba e le sebjana sa kota, seaparo, letlalo goba lešela la lesaka. Sebjana le ge e le sefe seo le se dirišago seo phoofolo yeo e ka welago ka gare ga sona, se tsenywe ka meetseng, e be seo se sa hlwekago go fihla mantšiboa ke moka e tla ba gona se hlwekago.
33 Ge e ba se ka wela ka sebjaneng sa letsopa, gona le se pšhatlaganye. Selo le ge e le sefe seo se bego se le ka gare ga sona, e tla ba seo se sa hlwekago.
34 Sejo se sengwe le se sengwe seo se ka tšhelwago ke meetse ao a bego a le ka sebjaneng seo, e tla ba seo se sa hlwekago. Le seno le ge e le sefe seo se tla bego se le ka se bjaneng seo, e tla ba seo se sa hlwekago.
35 Selo se sengwe le se sengwe seo phoofolo yeo e hwilego e ka welago go sona e tla ba seo se sa hlwekago. E ka ba sebešo goba setofo se senyenyane, se swanetše go pšhatlaganywa. Ga se tša hlweka mo go lena, le gona e tla dula e le tšeo di sa hlwekago.
36 Mo go tšwago meetse le moo go tšhelwago meetse gona, ke gona feela go tlago go dula go hlwekile. Eupša motho yo mongwe le yo mongwe yo a kgwathago diphoofolo tšeo ge di hwile, e tla ba yo a sa hlwekago.
37 Ge phoofolo yeo e hwilego e ka wela go peu yeo e tlago go bjalwa, gona peu yeo e hlwekile.
38 Eupša ge e ba peu e ka tšhelwa meetse, gomme karolo e nngwe ya phoofolo yeo e hwilego ya wela peung yeo, gona peu yeo ga se ya hlweka.
39 “‘Bjale ge e ba phoofolo yeo e jewago e ka hwa, gona motho yo mongwe le yo mongwe yo a e kgwathago e tla ba yo a sa hlwekago go fihla mantšiboa.
40 Yo a jago nama ya phoofolo yeo e hwilego, a hlatswe diaparo tša gagwe, gomme e be yo a sa hlwekago go fihla mantšiboa. Yo a ka rwalago phoofolo yeo ge e hwile, a hlatswe diaparo tša gagwe gomme e be yo a sa hlwekago go fihla mantšiboa.
41 Diphedi ka moka tšeo di sepelago ka dihlopha, ga se tša hlweka. Le se ke la di ja.
42 Le se ke la ja sephedi se sengwe le se sengwe seo se gagabago ka mpa, le sephedi le ge e le sefe seo se sepelago ka maoto a mane goba diphedi tšeo di sepelago ka dihlopha tšeo di nago le maoto a mantšhi, ka gobane ga se tša hlweka mo go lena.
43 Le se ke la dira gore ke se ke ka le amogela ka go ja diphoofolo le ge e le dife tšeo di sepelago ka dihlopha. Le se ke la itšhilafatša ka tšona gomme la ba bao ba sa hlwekago.
44 Ka gobane ke nna Jehofa Modimo wa lena, le duleng le hlwekile gomme le be ba bakgethwa, ka gobane ke nna yo mokgethwa. Ka gona le se ke la itšhilafatša ka go ja diphedi le ge e le dife tšeo di sepelago ka dihlopha tšeo di lego mo lefaseng.
45 Ka gobane ke nna Jehofa yo a le ntšhitšego nageng ya Egepeta gore ke le bontšhe gore ke nna Modimo wa lena. Ka gona le be ba bakgethwa, ka gobane ke nna yo mokgethwa.
46 “‘Wo ke molao wa mabapi le diphoofolo, dinonyana, diphedi ka moka tša ka meetseng, le diphedi ka moka tšeo di sepelago ka dihlopha,
47 e le gore go be le phapano magareng ga selo seo se hlwekilego le seo se sego sa hlweka, le magareng ga diphedi tšeo di swanetšego go jewa le tšeo di sa swanelago go jewa.’”
Mengwalo ya tlase
^ Goba “kukuku.”
