Lefitiko 17:1-16
17 Jehofa a bolela le Moshe a re:
2 “Botša Arone, barwa ba gagwe le Baisiraele ka moka o re: ‘Jehofa o re:
3 “‘“Moisiraele le ge e le ofe yo a ka hlabago poo goba nku e tona goba pudi ditenteng goba yo a ka e hlabago ka ntle ga ditente,
4 eupša a se e tliše mojakong wa taberenakele gore a e neele go Jehofa e le sebego pele ga taberenakele ya Jehofa, gona motho yoo o tla ba le molato wa madi. O tšholotše madi ka tsela yeo e sa dumelelwego ke molao, ka gona o swanetše go bolawa.
5 Taelo ye ke ya go thuša gore Baisiraele ba se sa direla dihlabelo tša diphoofolo nageng, eupša ba di tliše go Jehofa mojakong wa taberenakele gomme ba di nee moperisita. Dihlabelo tšeo e tla ba tša go dira khutšo le Jehofa.
6 Moperisita a foketše madi godimo ga aletare ya Jehofa mojakong wa taberenakele, a fiše lekhura gore muši wa lona e be monkgo o bose wo o yago go Jehofa.
7 Ka gona ba se sa hlwa ba direla batemona bao ba swanago le dipudi dihlabelo, e lego bao ba ba rapelago.* Wo e tla ba molao wa lena wa go ya go ile, le melokong ka moka ya lena yeo e sa tlago.”’
8 “O ba botše o re: ‘Moisiraele le ge e le ofe goba motho yo e sego Moisiraele yo a dulago nageng ya gabo lena yo a neelago sebego sa go fišwa goba sehlabelo,
9 eupša a se se tliše mojakong wa taberenakele gore a se neele go Jehofa, gona motho yoo o swanetše go bolawa.
10 “‘Ge Moisiraele le ge e le ofe goba motho yo e sego Moisiraele yo a dulago nageng ya gabo lena a ka ja madi a sephedi le ge e le sefe, ke tla lwa le yena gomme ke tla mo fediša setšhabeng sa gabo.
11 Bophelo bja sephedi se sengwe le se sengwe bo mo mading a sona gomme nna ke le neile madi gore le a neele aletareng gore le lebalelwe dibe. Ka ge bophelo bo le mading, madi ao ke ona a dirago gore le kgone go lebalelwa dibe.
12 Ke ka lebaka leo ke rilego go Baisiraele: “Go se be le motho yo a jago madi, le motho yo e sego Moisiraele yo a dulago nageng ya gabo lena a se ke a ja madi.”
13 “‘Moisiraele le ge e le ofe goba motho yo e sego Moisiraele yo a dulago mo go lena, ge a ka re a tsoma a swara phoofolo goba nonyana e jewago, gona a tšholle madi a yona a a khupetše ka mobu,
14 ka gobane bophelo bja sephedi se sengwe le se sengwe bo mo mading a sona. Ke ka baka leo ke boditšego Baisiraele ka re: “Le se ke la ja madi a sephedi sa mohuta le ge e le ofe ka gobane bophelo bja sephedi se sengwe le se sengwe bo mading a sona. Mang le mang yo a a jago o swanetše go bolawa.”
15 Motho le ge e le ofe yo a ka jago phoofolo yeo e hwilego goba yeo e bolailwego ke sebata, e ka ba e le Moisiraele goba e se Moisiraele, o swanetše go hlatswa diaparo tša gagwe e bile a hlape gomme e be yo a sa hlwekago go fihla mantšiboa.
16 Eupša ge e ba a ka se di hlatswe a ba a se hlape, gona o tla otlwa ka baka la molato wa gagwe.’”
Mengwalo ya tlase
^ Phetolelo ya lentšu ka lentšu e re, “bao ba otswago le bona.”
