Lefitiko 24:1-23
24 Jehofa a tšwela pele a bolela le Moshe a re:
2 “Botša Baisiraele gore ba tle le makhura a mohlware ao a sego a tswakwa le selo, gore a tlo dirišwa go laeta mabone, e le gore mabone ao a dule a tuka.
3 Mantšiboeng a mangwe le a mangwe Arone a laete mabone, gomme a netefatše gore a dula a tuka pele ga Jehofa go fihlela mesong ka pele ga gareteine yeo e lego kgauswi le areka ya kgwerano ka taberenakeleng. Wo ke molao wa go ya go ile melokong ya lena ka moka.
4 A beakanye mabone ao godimo ga sehlomelamabone seo se dirilwego ka gauta yeo e hlwekilego, a a beakanye pele ga Jehofa ka mehla.
5 “O tšee folouru yeo e šitšwego gabotse o apee dinkgwa tša nkgokolo tše 12. Senkgwa se sengwe le se sengwe sa nkgokolo o se apee ka folouru ya go tlala sebjana sa dilithara tše nne le seripa.
6 O di hlatlaganye o di bee ka dihlopha tše pedi. Sehlopha se sengwe le se sengwe se be le dinkgwa tše tshelelago. Ke moka o di bee pele ga Jehofa godimo ga tafola yeo e dirilwego ka gauta yeo e hlwekilego.
7 O bee seorelo seo se sego sa tswakwa ka selo godimo ga sehlopha se sengwe le se sengwe. Ke moka o fiše seorelo seo gore se gopotše Jehofa ka dinkgwa tšeo.
8 Moperisita a dule a beakanya dinkgwa tšeo gabotse pele ga Jehofa ka sabatha e nngwe le e nngwe. Yeo ke kgwerano ya go ya go ile yeo ke e dirilego le Baisiraele.
9 Dinkgwa tšeo e be tša Arone le barwa ba gagwe, gomme ba di je ba le lefelong le lekgethwa ka gobane ke selo se sekgethwakgethwa sa moperisita seo se tšwago dibegong tša Jehofa tša go fišwa. Ye ke taelo ya go ya go ile.”
10 Bjale go be go na le morwa yo mongwe wa mosadi wa Moisiraele yoo tatagwe e bego e le Moegepeta. O ile a ya ditenteng tša Baisiraele, ke moka ge a le moo, yena le monna yo mongwe wa Moisiraele ba ile ba lwa.
11 Morwa yoo wa mosadi wa Moisiraele o ile a bolela gampe ka leina la Modimo a ba a roga Modimo. Ka gona ba ile ba mo tliša go Moshe. Leina la mmagwe e be e le Shelomithe morwedi wa Dibiri wa moloko wa Dani.
12 Ke moka ba mo swara go ba go fihlela ge Jehofa a ba boditše gabotse gore ba dire eng ka yena.
13 Ka morago ga moo, Jehofa a botša Moshe a re:
14 “Ntšhetšang motho yo a nthogilego ka ntle ga ditente. Ke moka batho ka moka bao ba mo kwelego ba bee matsogo a bona hlogong ya gagwe gomme setšhaba ka moka se mo kgatle ka maswika.
15 O botše Baisiraele o re: ‘Ge go ka ba le motho yo a ka rogago Modimo wa gagwe, gona motho yoo a ikarabele bakeng sa sebe sa gagwe.
16 Ka gona motho yo a ka bolelago gampe ka leina la Jehofa a bolawe. Setšhaba ka moka se mo kgatle ka maswika. Motho yo e sego Moisiraele yo a dulago nageng ya gabo lena, ge a ka bolela gampe ka leina la Modimo le yena a bolawe go no swana le Moisiraele.
17 “‘Ge e ba motho a ka bolaya motho yo mongwe le yena a bolawe.
18 Motho yo a ka bolayago seruiwa sa motho yo mongwe a se patele, bophelo bo patelwe ka bophelo.
19 Ge motho a ka gobatša motho yo mongwe, le yena a gobatšwe.
20 Ge motho a ka roba motho yo mongwe le yena a robje, leihlo le patelwe ka leihlo, le leino ka leino. A otlwe ka go dirwa seo a se dirilego motho yo mongwe.
21 Motho yo a bolayago phoofolo a patele, eupša yo a bolayago motho yena a bolawe.
22 “‘Le tla ahlolwa go swana, go sa šetšwe gore le Baisiraele goba ga le Baisiraele, ka gobane ke nna Jehofa Modimo wa lena.’”
23 Ka morago ga moo Moshe a bolela le Baisiraele, ke moka ba ntšhetša motho yo a rogilego leina la Modimo ka ntle ga ditente gomme ba mo kgatla ka maswika. Baisiraele ba ile ba dira feela bjalo ka ge Jehofa a be a laetše Moshe.
