Maleaki 3:1-18
3 Jehofa wa madira o re: “Bonang! Ke roma moromiwa wa ka gomme yena o tla nkgorela tsela. Ke moka Morena wa therešo yoo le mo tsomago o tla tla tempeleng ya gagwe kapelapela. Le gona, moromiwa wa kgwerano o tla tla, yena yoo le felago pelo ya go mmona. Ruri o tla tla.”
2 “Eupša ke mang yo a tlago go kgotlelela letšatšing leo a tlago ka lona, le gona ke mang yo a tlago go ema ge a tšwelela? Ka gobane o tla swana le mollo wa motološi wa tšhipi le sesepe sa mohlatswi.
3 O tla dula go swana le motološi le mosekiši wa silifera gomme a hlwekiša barwa ba Lefi, a ba sekiša go swana le gauta le silifera gomme Jehofa o tla ba lebelela ba le bjalo ka batho bao ba mo tlišetšago sebego sa go loka.
4 Sebego sa Juda le sa Jerusalema se tla kgahla Jehofa go swana le mehleng ya kgale le mengwageng ya bogologolo.”
5 Jehofa wa madira o re: “Ke tla tla go lena go tlo le ahlola. Ke tla tla kapelapela go tlo ahlola baloi, dihlotlolo, bao ba enago ka maaka le bao ba hlalefetšago batho bao ba ba hirilego, bao ba radiago bahlologadi le bana bao ba se nago botatago bona* le bao ba sa nyakego go thuša* batho bao ba tšwago dinageng tše dingwe. Batho bao ba dirago dilo tše ga ba mpoife.
6 “Ka gobane ke nna Jehofa, ga ke fetoge. Lena le barwa ba Jakobo e bile ga se la fedišwa.
7 Le tlogetše ditaelo tša ka go tloga mehleng ya borakgolokhukhu ba lena, ga se la di latela. Boelang go nna, le nna ke tla boela go lena,” o realo Jehofa wa madira.
Eupša lena le re: “Re boele go wena bjang?”
8 “Na motho a ka radia Modimo? Eupša lena le a nthadia.”
E bile le re: “Re go radiile bjang?”
“Le nthadiile ka go se tliše dikarolo tša lesome le meneelo.
9 Ruri le rogakilwe* ka gobane le a nthadia, e bile le setšhaba ka moka se dira bjalo.
10 Tlišang dikarolo ka moka tša lesome tempeleng,* gore go be le dijo ka ntlong ya ka. Hle, ntekeng tabeng ye le bone ge e ba nka se le bulele mašoba a legodimo gomme ka le šegofatša kudu go fihlela le se sa hlaela selo,” o realo Jehofa wa madira.
11 “Ke tla thibela ditšie gore di se senye dienywa tša nageng ya lena, e bile nka se di dumelele di dira gore meterebe ya lena e hloke diterebe,” o realo Jehofa wa madira.
12 “Ditšhaba ka moka di tla re le thabile ka gobane naga ya lena e tla ba naga e kgahlišago,” o realo Jehofa wa madira.
13 Jehofa o re: “Le boletše gampe ka nna.”
Lena le re: “Ke’ng seo re se boletšego gampe ka wena?”
14 “Le re: ‘Ga go na mohola go hlankela Modimo. Re holegile bjang ka go dira dilo tšeo a re laetšego tšona le ka go bontšha Jehofa wa madira gore dibe tša rena di re kweša bohloko?
15 Ga bjale re re batho bao ba ikgodišago ba thabile. Le gona bao ba dirago dilo tše mpe, dilo di ba sepelela gabotse. Ba leka Modimo ba sa hlabje ke dihlong gomme ba se diragalelwe ke selo.’”
16 Nakong yeo bao ba boifago Jehofa ba be ba boledišana, yo mongwe le yo mongwe a boledišana le wa gabo gomme Jehofa a tšwela pele a ba theeditše gabotse. Ke moka Jehofa a laela gore bao ba mmoifago le bao ba dulago ba naganne* ka leina la gagwe ba ngwalwe ka pukung ya kgopotšo.
17 Jehofa wa madira o re: “Letšatšing leo ke tlago go ba dira batho ba ba kgethegilego,* e tla ba ba ka. Ke tla ba kwela bohloko go no swana le ge tate a kwela bohloko morwa wa gagwe yo a mo kwago.
18 Lena le tla boela la bona phapano magareng ga moloki le yo mobe le magareng ga yo a hlankelago Modimo le yo a sa mo hlankelego.”
Mengwalo ya tlase
^ Goba “ditšhiwana.”
^ Goba, “bao ba gatakelago ditokelo tša.”
^ Goba mohlomongwe, “le rogakilwe ka thogako yeo le nthogago ka yona.”
^ Phetolelo ya lentšu ka lentšu e re, “ntlong ya polokelo.”
^ Goba mohlomongwe, “bao ba tšeelago godimo.”
^ Phetolelo ya lentšu ka lentšu e re, “thoto e kgethegilego,” goba “thoto e bohlokwa.”
