Maleaki 4:1-6
4 Jehofa wa madira o re: “Tsebang gore go tla letšatši leo go tlago go ba le phišo yeo e swanago le mollo o mogolo gomme batho ka moka bao ba ikgogomošago le bao ba dirago dilo tše mpe ba tla swana le mahlaka. Letšatšing leo ba tla fedišwa gomme gwa se šale modu goba lekala.
2 Eupša lena bao le hlomphago leina la ka, letšatši leo le tlišago dilo tša go loka le tla le hlabela gomme mahlasedi a lona a tla le fodiša. E bile le tla tshelatshela go swana le dinamane tšeo di nontšhitšwego.”
3 Jehofa wa madira o re: “Letšatšing leo ke dirago seo, le tla gatakela ba babe gomme ba tla ba bjalo ka lerole ka tlase ga dinao tša lena.
4 “Gopolang Melao yeo ke e filego Moshe mohlanka wa ka kua Horebe, e lego ditaelo le dikahlolo tšeo ke laetšego Isiraele ka moka gore e di latele.
5 “Ke le romela moporofeta Eliya pele ga ge letšatši le legolo leo le boifišago la Jehofa le etla.
6 O tla dira gore dipelo tša botate di swane le tša bana ba bona gomme dipelo tša bana di swane le tša botatago bona,* e le gore ke se ke ka tla ka otla lefase gomme ka le fediša.”
Mengwalo ya tlase
^ Phetolelo ya lentšu ka lentšu e re, “O tla retollela dipelo tša botate go barwa ba bona gomme a retollele dipelo tša barwa go botatago bona.”
