Mika 4:1-13
4 Mehleng ya bofelo,Thaba yeo ntlo ya Jehofa e lego go yona,E tla dirwa gore e tie ka godimo ga dithaba tše dingwe,Gomme e tla ba e telele go feta meboto,Batho ba meraforafo ba tla kgobokana go yona.
2 Ditšhaba tše dintšhi di tla ya go yona tša re:
“Etlang re rotogeleng thabeng ya Jehofa,Le ntlong ya Modimo wa Jakobo.
O tla re ruta ditsela tša gagwe,Gomme re tla sepela ka tsela yeo a e nyakago.”
Ka gobane molao o tlo tšwa Tsione,Gomme lentšu la Jehofa la tšwa Jerusalema.
3 O tla ahlola ditšhaba tše dintšhi,Gomme a lokiša ditaba le ditšhaba tše matla tša kgole le kgauswi.
Batho ba tla fetoša ditšhoša tša bona ba di dira megoma,Gomme marumo a bona ba a dira disekela.
Setšhaba se ka se lwe le setšhaba se sengwe,E bile batho ba ka se sa hlwa ba ithuta go lwa.
4 Motho yo mongwe le yo mongwe o tlo dula ka fase ga mohlare wa gagwe wa moterebe le ka fase ga mohlare wa gagwe wa mogo,Gomme go ka se be le yo a ba tšhošago,Ka gobane go boletše Jehofa wa madira.*
5 Ge e le batho ba morafo o mongwe le o mongwe ba tla latela medimo ya bona,Eupša rena re tla latela* Jehofa Modimo wa rena go ya go ile.
6 Jehofa o re: “Letšatšing leo,Ke tla kgoboketša batho ba ka bao ba hlotšago,Ke tla bokanya bao ba bego ba phatlaletše,Le bao ke ilego ka ba swara gampe.
7 Go bao ba bego ba hlotša ke tla dira gore go be le bao ba šalago,Gomme bao ba bego ba raketšwe kgole ke tla ba dira gore e be setšhaba se matla.Jehofa o tla buša e le kgoši ya bona Thabeng ya Tsione,Go tloga gona bjale go ya go ile.
8 Wena tora yeo e šireleditšego mohlape,Wena mmoto wa batho ba Tsione,Mmušo wola wa peleng o tla boela go wena,E lego mmušo wa motse wa Jerusalema.
9 Bjale ke ka baka la’ng o duletše go goeletša?
Na ga o na kgoši,Goba na moeletši wa gago o hwile?Na seo ke sona seo se dirago gore o be le dihlabi go swana le mosadi yo a belegago?
10 Lena batho ba Tsione, ekwang bohloko kudu,Go swana le mosadi yo a belegago,Ka gobane gona bjale le tlo tloga mo motseng la yo dula nageng.
Le tla ba la fihla le Babilona.Ge le le moo Jehofa o tla le phološa.O tla le rekolla go manaba a lena.
11 Ke moka ditšhaba tše dintšhi di tlo kgobokana gore di lwe le lena,Di tlo re: ‘Anke Tsione e šilafatšwe,Gomme mahlo a rena a bone seo se direga.’
12 Eupša tšona ga di tsebe seo Jehofa a se naganago,Gomme ga di kwešiše morero wa gagwe,Ka gobane o tla di kgoboketša go swana le dingatana tša mabele ao a sa tšwago go robja ao a lego seboeng.*
13 Lena batho ba Tsione emang le fole mabele,Ka gobane ke tla dira gore le swane le dipoo tšeo di nago le manaka a tšhipiLe ditlhako tša koporo.Ke tla šilaganya ditšhaba tše dintšhi,
Le tla tšea mahumo ao ba a utswitšego la a fa Jehofa,Gomme dilo tša bona tše bohlokwa le tla di fa Morena wa lefase ka moka.”
Mengwalo ya tlase
^ Phetolelo ya lentšu ka lentšu e re, “go boletše molomo wa Jehofa wa madira.”
^ Phetolelo ya lentšu ka lentšu e re, “go sepela ka leina la.”
^ Bona Tlhaloso ya Mantšu.
