Mmoledi 12:1-14
12 Gopola Mmopi wa gago yo Mogolo o sa le moswa, pele go etla matšatši a mabe le mengwaga yeo o tla rego: “Bophelo bo ntenne,”
2 pele ga ge letšatši le seetša, ngwedi le dinaledi di swifala gomme maru a pula a boa ka morago* ga gore pula e ne,
3 letšatšing la ge bahlapetši ba ntlo ba thothomela, banna ba matla ba inama, basadi ba go šila ba tlogetše go šila ka ge ba fokotšegile gomme basadi bao ba lebelelago ka mafasetere ba bona leswiswi,
4 ge mejako yeo e lebeletšego tseleng e tswaletšwe, ge modumo wa tšhilo o kwagalela fase, ge motho a tsošwa ke molodi wa nonyana le ge basadi ka moka bao ba opelago ba opela ka lentšu la tlasana,
5 ge motho a tšhaba go namela a ya lefelong leo le lego godimodimo, gomme diterateng go na le dilo tšeo di tšhošago, ge mohlare wa moalemonte o thunya mapolomo ke moka tšie e ikgoga gomme motho a se sa na kganyogo ya dijo* e bile a eya ntlong ya gagwe yeo a tlago go khutša nako e telele go yona, gomme batho ba sepela ba lla diterateng,
6 pele ga ge thapo ya silifera e ka kgaoga le pele ga ge sebjana sa gauta se ka pšhatlega le sebjana se se lego sedibeng se ka thubega le pele ga ge leotwana leo le dirišwago ge go gewa meetse ka sedibeng le ka pšhatlega.
7 Ka nako yeo, lerole le boela lefaseng moo le tšwago gona gomme moya* o boela go Modimo wa nnete yo a o neilego batho.
8 Mokgoboketši o re: “Lefeela la mafeela! Dilo ka moka ke lefeela.”
9 Mokgoboketši o be a hlalefile e bile a tšwela pele go ruta batho dilo tšeo a bego a di tseba. O ile a naganišiša le go nyakišiša e le gore a kgoboketše diema tše dintšhi.
10 Mokgoboketši o ile a ikemišetša go nyaka mantšu a kgahlišago le go ngwala mantšu a therešo ka mo go nepagetšego.
11 Mantšu a batho ba bohlale a swana le mapara* ao a nago le dintlha gomme dilo tšeo ba di bolelago di swana le dipikiri tšeo di kokotetšwego ka go tia. Mantšu ao a tšwa go modiši o tee.
12 Morwa wa ka, ka ntle le ditaba tše, temošo e nngwe še: Go ngwalwa ga dipuku tše dintšhi ga go fele. Go dulela go di bala ka moka go lapiša mmele.
13 Ka morago ga go bolela ditaba tše ka moka, bjale re ka phetha ka go re: Boifa Modimo wa nnete gomme o kwe melao ya gagwe, ka gobane seo ke selo sa bohlokwa seo motho a swanetšego go se dira.
14 Modimo wa nnete o tla ahlola mediro ka moka go akaretša le selo seo se utamego e ka ba se sebotse goba se sebe.
Mengwalo ya tlase
^ Goba mohlomongwe, “maru a neša pula.”
^ Mo go bolelwa ka mohuta wa seenywa sa go dira gore motho a kganyoge dijo.
^ Goba, “matla a bophelo.”
^ Bona Tlhaloso ya Mantšu.
