Mmoledi 2:1-26
2 Nna ka ipotša ka re: “E re ke leke go ithabiša ke bone gore nka hwetša eng se sebotse.” Eupša seo le sona e be e le lefeela.
2 Ka re: “Go sega ke bogaswi,”
Gomme ka ipotšiša gore: “Go thaba go hola’ng?”
3 Ke ile ka phetha ka gore ke bone gore go ipshina ka beine go tla ntlišetša eng se sebotse mola ke nyaka go dula ke le yo bohlale. Ke ile ka ba ka ithuta dilo tša bošilo go bona gore ke eng se sebotse seo motho a ka se dirago ka matšatši a mmalwa ao a nago le ona mo lefaseng.*
4 Ke ile ka thoma mediro e megolo. Ka ikagela dintlo ka ba ka itemela dirapa tša meterebe.
5 Ke itemetše ditšhemo le dirapa, gomme ka bjala mehlare ya dienywa tša mehutahuta.
6 Ke itiretše matamo a meetse gore ke nošetše mehlare e menyenyane yeo ke e bjetšego.*
7 Ke ile ka oketša bahlanka ba banna le ba basadi e bile go na le ba bangwe bao ba belegetšwego lapeng la ka. Ka ba ka reka le diruiwa tše dintšhi, e lego dikgomo, dinku le dipudi. Tša feta tša batho ka moka bao ba ilego ba phela pele ga ka motseng wa Jerusalema.
8 Ke ile ka ikgobokeletša silifera le gauta e lego dilo tše bohlokwa tšeo di swanelago dikgoši le baetapele ba diprofense. Ka ikhweletša diopedi tša banna le tša basadi gotee le seo se thabišago banna, e lego basadi ba bantšhi.
9 Ke ile ka ba le dilo tše dintšhi go feta batho ka moka bao ba kilego ba phela pele ga ka motseng wa Jerusalema. Le gona ka dula ke le yo bohlale.
10 Ga se ka itima selo seo ke bego ke se duma. Ga se ka itima selo seo se bego se tlo nthabiša. Ke be ke thabišwa kudu ke dilo ka moka tšeo ke di šometšego ka thata, gomme se ya ba moputso wa boitapišo bja ka ka moka.
11 Eupša ge ke thoma go nagana ka dilo ka moka tšeo ke di dirilego le kamoo ke šomilego ka thata gore ke di fihlelele, ka hwetša tšohle e le lefeela le go kitimiša phefo, gomme go be go se selo se bohlokwa mo lefaseng.
12 Ke moka, ke ile ka thoma go bapiša bohlale, bogaswi le bošilo. (Ke’ng seo motho yo a hlatlamago kgoši a ka se dirago? A ka dira feela selo seo se šetšego se dirilwe ke ba bangwe.)
13 Ka bona gore bohlale bo hola kudu go phala bošilo, go etša ge seetša se hola kudu go phala leswiswi.
14 Yo bohlale o bona dilo gabotse, eupša setlaela se fo sepela leswiswing. Ke ile ka ba ka lemoga gore bohle ba welwa ke dilo tša go swana.
15 Ke moka ka ipotša gore: “Seo se diragalelago setlaela le nna se tla ntiragalela.” Bjale, ke hotšwe ke’ng ka go ba bohlale kudu? Ka phetha ka gore: “Se le sona ke lefeela.”
16 Yo bohlale le setlaela ba ka se dule ba gopolwa go ya go ile. Matšatšing a tlago, ka moka ga bona ba tla ba ba lebetšwe. Yo bohlale yena o tla hwa bjang? O tla hwa go etša setlaela.
17 Ka gona, ke ile ka thoma go hloya bophelo ka gobane dilo ka moka tšeo di dirwago mo lefaseng di be di nkweša bohloko, ka gobane ka moka ga tšona e be e le lefeela le go kitimiša phefo.
18 Ke ile ka hloya dilo ka moka tšeo ke bego ke di šometše ka thata mo lefaseng ka gobane ke be ke tla di šiela motho yo a bego a tla phela ka morago ga ka.
19 Ke mang yo a tsebago ge e ba motho yoo e tla ba yo bohlale goba lešilo? Lega go le bjalo, o tla laola dilo ka moka tšeo ke di šometšego ka thata le tšeo ke di dirilego ka bohlale mo lefaseng. Se le sona ke lefeela.
20 Ka gona, ke ile ka thoma go nyamišwa ke dilo ka moka tšeo ke di šometšego ka thata mo lefaseng.
21 Ka gobane motho a ka šoma ka thata a diriša bohlale, tsebo le bokgoni, eupša dilo tšeo a di šometšego a di šia tša tla tša tšewa ke motho yo mongwe yo a sa di šomelago. Se le sona ke lefeela e bile se kweša bohloko kudu.
22 Motho o holega bjang ge a šoma ka thata le ge a dira maiteko a gore a šome ka thata mo lefaseng?
23 Nakong ya ge a sa phela, mošomo wa gagwe o mo tlišetša bohloko le tlaišego, le bošego ga a robale.* Se le sona ke lefeela.
24 Ga go se se phalago gore motho a je le go nwa gomme a thabe ka baka la dilo tšeo a di šometšego ka thata. Ke bone gore se le sona se tšwa seatleng sa Modimo wa nnete.
25 Ke mang yo a nago le dijo goba dino tše di kaone go mphala?
26 Modimo wa nnete o nea motho yo a mo kgahlago bohlale, tsebo le lethabo, eupša modiradibe o mo nea mošomo wa go kgoboketša le go kgobelela dilo gore a di nee yo a kgahlago Modimo. Se le sona ke lefeela le go kitimiša phefo.
Mengwalo ya tlase
^ Phetolelo ya lentšu ka lentšu e re, “ka tlase ga letšatši.”
^ Goba, “ya sethokgweng.”
^ Phetolelo ya lentšu ka lentšu e re, “pelo ya gagwe ga e khutše.”
