Mmoledi 3:1-22
-
Selo se sengwe le se sengwe se na le nako ya sona yeo e beilwego (1-8)
-
Go ipshina ka bophelo ke mpho yeo e tšwago go Modimo (9-15)
-
Modimo o dirile gore batho ba nyake go phela go ya go ile (11)
-
-
Modimo o ahlola batho ka moka ka toka (16, 17)
-
Batho ba tlo hwa le diphoofolo di tlo hwa (18-22)
-
Batho ba boela mmung, diphoofolo le tšona di boela go ona (20)
-
3 Selo se sengwe le se sengwe se na le nako ya sona yeo e beilwego.Le gona, dilo ka moka tšeo di dirwago ka tlase ga magodimo di na le nako ya tšona.
2 Go na le nako ya go belegwa* le nako ya go hwa,Nako ya go bjala le nako ya go tumola se se bjetšwego,
3 Nako ya go bolaya le nako ya go alafa,Nako ya go phušola le nako ya go aga,
4 Nako ya go lla le nako ya go sega,Nako ya go lla gabohloko le nako ya go bina,
5 Nako ya go šwalalanya* maswika le nako ya go kgoboketša maswika,Nako ya go gokarela le nako ya go se gokarele,
6 Nako ya go nyaka le nako ya go amogela gore selo se timetše,Nako ya go boloka le nako ya go lahla,
7 Nako ya go gagola le nako ya go roka,Nako ya go homola le nako ya go bolela,
8 Nako ya go rata le nako ya go hloya,Nako ya ntwa le nako ya khutšo.
9 Motho yo a šomago o boelwa ke’ng ge a šoma ka thata?
10 Ke bone mošomo woo Modimo a o neilego batho gore ba dule ba o dira.
11 O dirile gore selo se sengwe le se sengwe e be se sebotse ka nako ya sona, a ba a dira gore batho ba nyake go phela go ya go ile. Eupša batho ba ka se tsoge ba kwešišitše mošomo woo Modimo wa nnete a o dirilego go tloga mathomong go fihla mafelelong.
12 Ke lemogile gore ga go seo se phalago gore batho ba thabe le go dira dilo tše dibotse nakong ya ge ba sa phela,
13 Le gore motho yo mongwe le yo mongwe a je le go nwa gomme a thabišwe ke dilo ka moka tšeo a di šometšego ka thata. Ke mpho ya Modimo.
14 Ke lemogile gore dilo ka moka tšeo Modimo wa nnete a di dirago, di tla dula di le gona go ya go ile. Di ka se oketšwe e bile di ka se fokotšwe. Modimo wa nnete o di dirile ka tsela yeo e le gore batho ba mmoife.
15 Seo se diregago se šetše se kile sa direga gomme seo se tlago se šetše se kile sa ba gona. Modimo wa nnete o tla tliša dilo tšeo batho ba di phegelelago.*
16 Selo se sengwe seo ke se bonego mo lefaseng* ke se: Go e na le gore go be le toka, go be go na le bobe. Le gona go e na le gore go be le dilo tša go loka, go be go na le dilo tše mpe.
17 Ke moka ka re: “Modimo wa nnete o tla ahlola moloki gotee le yo mobe. Ka gona, modiro o mongwe le o mongwe o na le nako ya wona le selo se sengwe le se sengwe seo se diregago se na le nako ya sona.”
18 Ka buša ka bolela ka batho ka re Modimo wa nnete o tla ba leka gomme a ba bontšha gore ba swana le diphoofolo.
19 Ka gobane tšeo di tlelago batho di tlela le diphoofolo. Le gona, tšeo di diragalelago batho di diragalela le diphoofolo. Go no swana le ge batho ba ehwa, diphoofolo le tšona di a hwa. Modimo o file batho le diphoofolo moya* o swanago. Ka gona, ga go na seo motho a fetago diphoofolo ka sona, ka gobane tšohle ke lefeela.
20 Moo batho ba yago gona, le diphoofolo di ya gona. Batho ba bopilwe ka mmu gomme ba boela go ona, diphoofolo le tšona di bopilwe ka mmu gomme di boela go ona.
21 Ke mang yo a tlogago a tseba ge e ba moya wa batho o rotogela godimo gomme moya wa diphoofolo wona o theogela fase lefaseng?
22 Ke bone gore ga go seo se phalago gore motho a thabele mošomo wa gagwe, ka gobane ke seo se mo swanetšego. Ga go na motho yo a ka dirago gore motho yo a hwilego a tle a bone seo se diragalelago bao ba phelago.
Mengwalo ya tlase
^ Goba, “nako ya go belega.”
^ Goba, “go palakantšha.”
^ Goba, “Modimo wa nnete o tla nyaka dilo tšeo batho ba bego ba dutše ba di phegelela.” Goba mohlomongwe, “Modimo wa nnete o tla nyaka dilo tšeo di fetilego.”
^ Phetolelo ya lentšu ka lentšu e re, “ka tlase ga letšatši.”
^ Goba, “matla a bophelo.”
