Mmoledi 4:1-16
4 Ka buša ka bona mediro ka moka ya kgatelelo yeo e dirwago mo lefaseng, ka bona le batho bao ba gatelelwago ba lla eupša go se na motho yo a ba homotšago, mola bao ba ba gatelelago ba na le matla eupša bona go se na yo a ba homotšago.
2 Ka lemoga gore batho bao ba šetšego ba hwile ba kaone go feta bao ba sa phelago.
3 Ka moka ga bona ba phalwa ke yoo a se a hlwago a belegwa, yo a sego a hlwa a bona dilo tšeo di kwešago bohloko tšeo di diregago mo lefaseng.
4 Ke bone le gore go jelana mona ke gona go dirago gore batho ba šome ka thata ba diriša bokgoni bja bona, gomme se le sona ke lefeela le go kitimiša phefo.
5 Setlaela se phuthile matsogo a sona mola se itlhafišetša bophelo.
6 Go kaone gore motho a fele a khutša go e na le gore a šome ka thata* le go kitimiša phefo.
7 Ka buša ka bona selo se sengwe seo e lego lefeela mo lefaseng:
8 Go na le motho yo mongwe yo a phelago a nnoši a se na mogwera, a se na morwa goba ngwanabo, eupša o šoma ka thata a sa khutše. Ga a kgotsofalele mahumo ao a nago le wona, eupša ga a ke a ipotšiša gore: “Ge ke šoma ka thata e bile ke itima dilo tše dibotse, ke direla mang?” Se le sona ke lefeela, le go ipakela masetlapelo.
9 Batho ba babedi ba phala o tee ka gobane ba holega kudu ge ba šomišana.
10 Ka gobane ge yo mongwe a ewa, yo mongwe a ka mo tsoša. Eupša go tla direga’ng ge o tee a ewa gomme go se na yo mongwe yo a ka mo tsošago?
11 Le gona, ge ba babedi ba robala gotee, ba tla ruthetšana, eupša o tee a ka ruthela bjang?
12 Ge motho a ka fenya o tee ka matla, ba babedi ba ka kgona go lwa le yena ba mo fenya. Le gona thapo ya melogo e meraro ga e kgaoge gabonolo.*
13 Ngwana yo a diilago eupša a le bohlale, o phala kgoši ya mokgalabje ya setlaela yeo e se sa nyakago go lemošwa.
14 Ka gobane o* tšwile kgolegong gore a tle a be kgoši, le ge a belegwe a diila ge go be go buša kgoši yeo ya mokgalabje.
15 Ke bone kamoo dilo di sepelelago batho ka moka bao ba phelago mo lefaseng, le kamoo bophelo bo sepelelago kgoši yeo ya moswa yeo e hlatlamilego kgoši yeo ya mokgalabje.
16 Le ge a be a thekgwa ke batho ba bantšhi eupša bao ba tlago go tla ka morago ba ka se mo rate. Se le sona ke lefeela le go kitimiša phefo.
Mengwalo ya tlase
^ Phetolelo ya lentšu ka lentšu e re, “Seatla se se tletšego khutšo se phala diatla tše pedi tše di tletšego boitapišo.”
^ Phetolelo ya lentšu ka lentšu e re, “ga e kgaoge ka pela.”
^ Mohlomongwe go bolelwa ka ngwana yola yo bohlale.
