Mmoledi 5:1-20
5 Itshware gabotse ge o eya ntlong ya Modimo wa nnete. Go kaone gore ge o eya moo o ye o ikemišeditše go theetša go e na le gore o ye o ikemišeditše go dira sehlabelo bjalo ka ditlaela, ka gobane ga di lemoge gore seo di se dirago ke se sebe.
2 O se ke wa kitimela go bolela, le gona o se ke wa bolela o se wa nagana ge o le pele ga Modimo wa nnete, ka gobane Modimo wa nnete o magodimong eupša wena o mo lefaseng. Ke ka baka leo o sa swanelago go bolela kudu.
3 Toro e tla ka baka la go tshwenyega kudu gomme ditlaela di ratharatha ka ge di sa kgone go laola melomo ya tšona.
4 Ka mehla ge o direla Modimo keno, o se ke wa diega go e phetha, ka gobane ga a kgahlwe ke ditlaela. Seo o se enago, o se phethe.
5 Go kaone gore o se ke wa ena go e na le gore o ene gomme wa se phethe.
6 O se ke wa dumelela molomo wa gago o go diriša sebe. Le gona o se ke wa bolela pele ga morongwa* gore o dirile keno ka phošo. O se ke wa galefiša Modimo wa nnete ka seo o se bolelago ka gobane ge o ka dira bjalo, Modimo o tla senya seo o se dirago.
7 Go no swana le ge toro e etla ka baka la go tshwenyega kudu, le go bolela kudu go feleletša ka lefeela. Eupša wena boifa Modimo wa nnete.
8 Ge o bona modiidi a gatelelwa gomme batho ba sa swarwe ka toka le go loka nageng ya geno, o se ke wa makatšwa ke seo, ka gobane moetapele yoo yo mogolo o lebeletšwe ke yo mogolo go mo feta, e bile go sa na le ba bagolo go ba feta.
9 Ka moka ga bona ba ja dimela tša lefase, le kgoši e ja tšeo di tšwago mašemong.
10 Motho yo a ratago silifera a ka se tsoge a kgotsofaditšwe ke silifera, le yo a ratago mahumo a ka se tsoge a kgotsofetše. Se le sona ke lefeela.
11 Ge mahumo a motho a oketšega, le bao ba a jago ba a oketšega. Mong wa tšona di mo hola ka eng, ge e se gore a di bogele feela?
12 Boroko bja mohlanka bo bose, go sa šetšwe gore o na le dijo tše dinyenyane goba o na le tše dintšhi, eupša mohumi ga a robale ka baka la dilo tše dintšhi tšeo a nago le tšona.
13 Go na le selo se sengwe seo se kwešago bohloko kudu seo ke se bonego mo lefaseng:* ke motho yoo a ikgobokeletšago mahumo gomme a mo gobatša.
14 Mahumo ao a ile a fela ka baka la mešomo yeo e sa kago ya atlega gomme ge a eba le morwa a hloka seo a ka mo šielago sona.
15 Go swana le ge motho a belegwa a hlobotše, le ge a hlokofala go tla ba bjalo. A ka se kgone go rwala selo le ge e le sefe seo a se šometšego ka thata.
16 Se le sona ke masetlapelo a magolo. Motho o tla tloga go swana le ka tsela yeo a tlilego ka yona. Bjale motho yo a dulago a šoma ka thata a šomela lefeela o boelwa ke’ng?
17 Le gona, letšatši le lengwe le le lengwe o jela leswiswing, a gakanegile kudu, a babja e bile a galefile.
18 Selo se sekaone kudu seo ke se bonego ke se: ke gore motho a je le go nwa gomme a thabišwe ke dilo ka moka tšeo a di šometšego ka thata, tšeo a itapišeditšego tšona mo lefaseng, matšatšing a mmalwa ao Modimo wa nnete a mo filego ona ka gobane seo ke moputso* wa gagwe.
19 Le gona, ge Modimo wa nnete a e fa motho mahumo le dilo tše bohlokwa e bile a mo thuša gore a di thabele, motho yoo o swanetše go tšea moputso wa gagwe gomme a thabele dilo tšeo a di šometšego ka thata. Ye le yona ke mpho ya Modimo.
20 A ka se gopole mathata ao a nago le ona ka gobane Modimo wa nnete o mo file dilo tšeo di mo dirago gore a dule a thabile.
Mengwalo ya tlase
^ Goba, “moromiwa.”
^ Phetolelo ya lentšu ka lentšu e re, “ka tlase ga letšatši.”
^ Goba, “karolo ya.”
