Nahume 1:1-15
1 Wo ke molaetša wa go ahlola Ninife. Ye ke puku yeo e re botšago ka pono ya Nahume* wa Moelikoshe:
2 Jehofa ke Modimo yo a nyakago gore re rapele yena a nnoši e bile o itefeletša go manaba a gagwe.Jehofa o kgona go itefeletša e bile o itokišeditše go bontšha bogale bja gagwe.
Jehofa o itefeletša go bao ba mo ganetšago,Le gona o dula a galefetše manaba a gagwe.
3 Jehofa ga a galefe ka pela e bile o na le matla a magolo.Eupša Jehofa ga a tlogele go otla bao ba swanetšego go otlwa.
Ge a sepela, go tsoga phefo e senyago le ledimoGomme lerole la dinao tša gagwe le bjalo ka maru.
4 O kgalemela lewatle gomme a le gopiša,A gopiša le dinoka ka moka.
Dimela tša Bashani le Karamele di a pona,Mapolomo a Libanoni le ona a a pona.
5 Dithaba di a šikinyega ka baka la gagwe,Meboto le yona e a phušoga.
Lefase le tla thothomela ka baka la sefahlego sa gagwe,Gwa thothomela le naga gotee le dilo ka moka tše di dulago go yona.
6 Ge Modimo a galefile, ke mang yo a ka emago pele ga gagwe?
Gona ke mang yo a ka kgotlelelago bogale bja gagwe bjo bogolo?
Bogale bja gagwe bo tlo tuka bjalo ka mollo,Le maswika a tla kgerega ka baka la gagwe.
7 Jehofa o lokile e bile o swana le lefelo leo motho a ka tšhabelago go lona letšatšing la tlalelo.
Le gona o tseba* bao ba tšhabelago go yena.
8 O tla fediša naga ya Ninife ka mo go feletšego ka mafula a magoloGomme manaba a gagwe a tla aparelwa ke leswiswi.
9 Na le ka logela Jehofa maano a mabe?
O tla le fediša ka mo go feletšego.
Go ka se nyakege gore a le fediše gape.
10 Le ge batho ba Ninife ba raragane bjalo ka mohlare wa meetlwa,E bile ba le bjalo ka batho bao ba tagilwego,Ba tla tšhungwa go swana le mahlaka ao a omilego.
11 Go wena go tla tšwa yo a naganelago Jehofa dilo tše mpe,Yo a neago keletšo ya go se re selo.
12 Jehofa o boletše gore:
“Le ge Baasiria e le ba bantšhi e bile ba na le matla,Ba tlo fedišwa gomme ba se sa ba gona.
Wena Juda ke go kwešitše bohloko, eupša nka se sa go kweša bohloko gape.
13 Ke tla roba joko yeo Asiria e go rwešitšego yonaLe gona ke tla kgaola ditlemo tšeo ba go tlemilego ka tšona.
14 Jehofa o boletše ka wena Ninife* a re:‘O ka se sa ba le ditlogolo tšeo di tlago go tšwetša leina la gago pele.
Ke tlo fediša diswantšho tša gago tšeo di betlilwego le diswantšho tša tšhipi tšeo di lego ka ntlong ya medimo ya gago.
Ke tla go direla lebitla, ka gobane ga o na mohola.’
15 “Bonang! Dithabeng go na le yoo a tlišago ditaba tše dibotseLe yoo a tsebatšago gore go tlo ba le khutšo.
Wena Juda, keteka menyanya ya gago o be o phethe dikeno tša gago,Ka gobane batho ba babe ba ka se sa go hlasela gape.
Ba tlo fedišetšwa sa ruri.”
