Nehemia 1:1-11
1 Se ke seo Nehemia morwa wa Hakalia a ilego a se bolela: Ka kgwedi ya Kisilefe ka ngwaga wa bo-20, ke be ke dula mošate wa Shushani.
2 Ka nako yeo, Hanani e lego yo mongwe wa bomorwarragwe, o ile a nketela a na le banna ba bangwe bao ba tšwago Juda, gomme ka ba botšiša ka Bajuda bao ba bego ba šetše, e lego bao ba bego ba thopilwe e bile ba boile nageng. Ka ba ka ba botšiša le gore dilo di sepela bjang Jerusalema.
3 Ba ile ba re go nna: “Batho bao ba boilego bothopša, bao gona bjale ba dulago tikologong ya Juda, ba bothateng bjo bogolo kudu e bile ba hlabja ke dihlong. Maboto a Jerusalema a phušotšwe gomme dikeiti tša yona di fišitšwe ka mollo.”
4 Ge ke se no kwa mantšu a, ke ile ka dula fase ka lla gabohloko. Ke ile ka fetša matšatši a mantšhi ke nyamile e bile ke itima dijo. Ke ile ka ba ka rapela Modimo wa magodimong.
5 Ke ile ka re: “Joo Jehofa Modimo wa magodimong, wena Modimo yo mogolo le yo a hlomphegago kudu, yo a dulago a tshepagalela kgwerano ya gagwe go bao ba mo ratago le bao ba kwago ditaelo tša gagwe, e bile a ba bontšha botho bja gagwe bjo bogolo,
6 hle anke o ntheetše, o ntebelele, o be o kwe thapelo ya ka nna mohlanka wa gago, yeo lehono ke e rapelago pele ga gago. Mosegare le bošego, ke rapelela bahlanka ba gago e lego Baisiraele, e bile ke rapela mabapi le dibe tšeo ba go diretšego tšona. Nna le ba lapa la tate re go senyeditše.
7 Ruri re go senyeditše, e bile ga se ra kwa ditaelo le melao ya gago yeo o re neilego yona o diriša Moshe mohlanka wa gago.
8 “Hle gopola seo o se boditšego Moshe mohlanka wa gago wa re: ‘Ge e ba le ka se mpotegele, ke tla le phatlalatša ditšhabeng tše dingwe.
9 Eupša ge e ba le ka boela go nna, la kwa ditaelo tša ka le go di latela, gona ke tla le kgobokanya ka le tliša lefelong leo ke le kgethilego gore le ntlhankele go lona, le ge le ka phatlalala go fihla moo magodimo a felelago gona.’
10 Bona ke bahlanka ba gago le batho ba gago, bao o ba phološitšego o diriša matla a gago a magolo.
11 Bjale hle Jehofa, anke o kwe thapelo ya ka nna mohlanka wa gago, le dithapelo tša bahlanka ba gago bao ba hlomphago leina la gago ka dipelo tša bona ka moka. Hle dira gore kgoši e nkwele bohloko e bile e ntumelele go dira seo ke e kgopelago sona lehono.”
Bjale, nna ke be ke šoma go tšhelela kgoši beine.
