Nehemia 6:1-19
6 Bjale gateetee ge Sanebalathi, Tobia, Geshema wa Moarabia le manaba a rena ka moka ba boditšwe gore ke agile leboto ka leswa gore le lokišitšwe ka moka (le ge ka nako yeo ke be ke se ka tšwa ke tsenya mejako ya dikeiti),
2 kapejana Sanebalathi le Geshema ba ile ba nthomela molaetša wo: “Etla re kopane go o mongwe wa metse yeo e lego Moeding wa Ono.” Eupša ba be ba ntogetše maanomabe.
3 Bjale ke ile ka romela batho go bona gore ba ba botše ba re: “Nka se kgone go tla go lena, ka gobane ke swaregile ka mošomo o mogolo kudu. Ge e ba nka tla go lena, mošomo wo o tlo ema.”
4 Ba ile ba nthomela molaetša o swanago ka makga a mane, gomme nako e nngwe le e nngwe ka no ba fetola go swana le mathomong.
5 Mafelelong Sanebalathi a romela mohlanka wa gagwe go nna ka lekga la bohlano a swere lengwalo le le butšwego leo le nago le molaetša wo o swanago le wola wa pela.
6 Lengwalo leo le be le ngwadilwe gore: “Go tletše mabarebare ditšhabeng tšeo di lego kgauswi le lena a gore wena le Bajuda le nyaka go tsoša mpherefere, e bile Geshema le yena o hlatsela seo. Ke ka baka leo le agago leboto leswa, e bile go ya ka mabarebare ao, wena o nyaka go ba kgoši ya bona.
7 Le gona o kgethile baporofeta gore ba tšame ba bolela ka wena Jerusalema ka moka ba re: ‘Go na le kgoši kua Juda!’ Bjale kgoši e tla kwa ka mabarebare a. Ka gona etla go rena re tle re boledišane ka taba ye.”
8 Eupša ka mo romela molaetša ka mo fetola ka re: “Dilo tšeo o di bolelago ga se nnete, o no ba o inaganela tšona.”
9 Ka moka ga bona ba be ba leka go re tšhoša, ba ipotša ba re: “Ba tlo nyama* gomme ba se fetše mošomo wa bona.” Bjale wena Modimo, mmatlafatše* hle.
10 Ke moka ke ile ka ya ntlong ya Shemaya morwa wa Delaya yo e lego setlogolo sa Mehetabele nakong ya ge a be a sa kgone go tšwa ka ntlong ya gagwe. Yena a re go nna: “A re kopane ka tempeleng, ntlong ya Modimo wa nnete gomme re tswalele mejako ya tempele, ka gobane ba a tla ba tlo go bolaya bošego.”
11 Eupša nna ka re: “Na monna yo a nago le maemo a go swana le a ka o swanetše go tšhaba? Ke nna mang mo nka tsenago ka tempeleng gomme ka se ke ka bolawa? Aowa nka se tsene ka tempeleng!”
12 Ke moka ka morago ke ile ka hwetša gore e be e se Modimo yo a mo romilego, eupša Tobia le Sanebalathi ba be ba mo hirile gore a tle a mphore.
13 Ba be ba mo hirile gore a tle a ntšhošetše gomme a dire gore ke dire sebe, gore ba be le mabaka a go ntshenya leina e bile ba be le selo seo ba ntsholago ka sona.
14 Ka gona ke ile ka rapela ka re: Wena Modimo wa ka, hle o se ke wa lebala dilo tšeo Tobia, Sanebalathi le Noadia moporofeta wa mosadi ba di dirilego, gotee le dilo tšeo di dirilwego ke baporofeta ka moka bao ba bego ba dula ba leka go ntšhošetša.
15 Leboto le ile la fetšwa go agwa ka di-25 tša kgwedi ya Elula. Le ile la agwa ka matšatši a 52.
16 Gateetee ge manaba a rena ka moka a kwele seo gomme batho ba ditšhaba tšeo di lego kgauswi le rena ba bone seo, ba ile ba hlabja ke dihlong kudu ke moka ba lemoga gore ke Modimo a re thušitšego go fetša mošomo wo.
17 Mehleng yeo dintona tša Juda di be di ngwalela Tobia mangwalo a mantšhi, gomme Tobia le yena o be a di araba.
18 Batho ba bantšhi kua Juda ba be ba ikanne gore ba tla mo thekga, ka gobane e be e le mokgonyana wa Shekania morwa wa Eira, le gona morwa wa gagwe Jehohanani o be a nyetše morwedi wa Meshulama, e lego morwa wa Berekia.
19 Le gona batho bao ba be ba dula ba mpotša dilo tše dibotse tšeo a di dirilego, e bile ba mmotša seo ke se boletšego. Ke moka Tobia yena o be a nthomela mangwalo gore a ntšhošetše.
Mengwalo ya tlase
^ Phetolelo ya lentšu ka lentšu e re, “diatla tša bona di tla tlogela mošomo.”
^ Phetolelo ya lentšu ka lentšu e re, “matlafatša diatla tša ka.”
