Nehemia 7:1-73
7 Gateetee ge leboto le feditšwe go agwa leswa, re ile ra tsenya mejako. Ke moka go ile gwa kgethwa batho bao ba letago dikeiting, diopedi le Balefi.
2 Ka morago ga moo ke ile ka kgetha Hanani ngwanešo le Hanania e lego molaodi yo mogolo wa moago o mogolo wa mašole gore ba laole Jerusalema, ke ile ka kgetha Hanania ka gobane o be a tshepega kudu e bile o be a boifa Modimo wa nnete go feta batho ba bangwe ba bantšhi.
3 Ke moka ka re go bona: “Dikeiti tša Jerusalema ga se tša swanela go bulwa go fihlela e eba mosegare ge letšatši le fiša, e bile batho bao ba letago dikeiting ba swanetše go tswalela mejako le go e notlela pele ba ka tšhaiša mošomong. Le gona le kgethe badudi ba Jerusalema, gore ba bangwe ba bona ba lete mafelong ao go letwago motse gomme ba bangwe ba lete pele ga dintlo tša bona.”
4 Motse wa Jerusalema e be e le o mogolo e bile go se na batho ba bantšhi go ona, le gona go be go se na dintlo tšeo di agilwego leswa.
5 Eupša Modimo wa ka o ile a dira gore ke kgoboketše dintona, baetapele le setšhaba gore ba tle ba ingwadiše go ya ka meloko ya bona. Ke moka ke ile ka hwetša puku yeo e ngwadilego meloko ya bao ba boilego bothopša pele. Ka gare ga yona go be go ngwadilwe dilo tše di latelago:
6 Ba ke batho bao ba bego ba dula profenseng yeo* bao ba bego ba etšwa bothopša Babilona bao kgoši Nebukadinetsara wa kua Babilona a bego a ba thopile, gomme ka morago ba boela Jerusalema le Juda, yo mongwe le yo mongwe wa bona o ile a ya motseng wa gabo.
7 Baetapele ba bona e be e le Serubabele, Jeshua, Nehemia, Asaria, Raamia, Nahamani, Morodekai, Bilishana, Misipara, Bigifai, Nehuma le Baena.
Palo ya banna ba Baisiraele ke ye:
8 Barwa* ba Paroshe e be e le ba 2 172 (dikete tše pedi-lekgolo-masomešupa-pedi).
9 Barwa ba Shefatia e be e le ba 372 (makgolotharo-masomešupa-pedi).
10 Barwa ba Eira e be e le ba 652 (makgolotshela-masomehlano-pedi).
11 Barwa ba Pahathe-moaba, bao e bego e le barwa ba Jeshua le Joaba e be e le ba 2 818 (dikete tše pedi-makgoloseswai-lesomeseswai).
12 Barwa ba Elama e be e le ba 1 254 (sekete-makgolopedi-masomehlano-nne).
13 Barwa ba Sathu e be e le ba 845 (makgoloseswai-masomenne-hlano).
14 Barwa ba Sakai e be e le ba 760 (makgološupa-masometshela).
15 Barwa ba Binui e be e le ba 648 (makgolotshela-masomenne-seswai).
16 Barwa ba Bebai e be e le ba 628 (makgolotshela-masomepedi-seswai).
17 Barwa ba Asikadi e be e le ba 2 322 (dikete tše pedi-makgolotharo-masomepedi-pedi).
18 Barwa ba Adonikama e be e le ba 667 (makgolotshela-masometshela-šupa).
19 Barwa ba Bigifai e be e le ba 2 067 (dikete tše pedi-masometshela-šupa).
20 Barwa ba Adine e be e le ba 655 (makgolotshela-masomehlano-hlano).
21 Barwa ba Atere wa leloko la Hesekia e be e le ba 98.
22 Barwa ba Hashuma e be e le ba 328 (makgolotharo-masomepedi-seswai).
23 Barwa ba Betsai e be e le ba 324 (makgolotharo-masomepedi-nne).
24 Barwa ba Harifa e be e le ba 112 (lekgolo-lesomepedi).
25 Barwa ba Gibeoni e be e le ba 95.
26 Banna bao ba tšwago Betlelehema le Netofa e be e le ba 188 (lekgolo-masomeseswai-seswai).
27 Banna ba Anathothe e be e le ba 128 (lekgolo-masomepedi-seswai).
28 Banna ba Bethe-asimafethe e be e le ba 42.
29 Banna ba Kiriathe-jearima, Kefira le Beerothe e be e le ba 743 (makgološupa-masomenne-tharo).
30 Banna ba Rama le Geba e be e le ba 621 (makgolotshela-masomepedi-tee).
31 Banna ba Mikimase e be e le ba 122 (lekgolo-masomepedi-pedi).
32 Banna ba Bethele le Ai e be e le ba 123 (lekgolo-masomepedi-tharo).
33 Banna ba motse o mongwe gape wa Nebo e be e le ba 52.
34 Barwa ba monna yo mongwe gape yo a bitšwago Elama e be e le ba 1 254 (sekete-makgolopedi-masomehlano-nne).
35 Barwa ba Harima e be e le ba 320 (makgolotharo-masomepedi).
36 Banna ba Jeriko e be e le ba 345 (makgolotharo-masomenne-hlano).
37 Banna ba Lodi, Hadidi le Ono e be e le ba 721 (makgološupa-masomepedi-tee).
38 Banna ba Senaa e be e le 3 930 (dikete tše tharo-makgolosenyane-masometharo).
39 Baperisita ke ba: Barwa ba Jedaya wa ntlo ya Jeshua e be e le ba 973 (makgolosenyane-masomešupa-tharo).
40 Barwa ba Imere e be e le ba 1 052 (sekete-masomehlano-pedi).
41 Barwa ba Pashuri e be e le ba 1 247 (sekete-makgolopedi-masomenne-šupa).
42 Barwa ba Harima e be e le ba 1 017 (sekete le lesomešupa).
43 Balefi ke ba: Barwa ba Jeshua, bao e bego e le ba lapa la Kadimiele e bile e le ditlogolo tša Hodefa e be e le ba 74.
44 Diopedi e be e le barwa ba Asafa ba 148 (lekgolo-masomenne-seswai).
45 Batho bao ba šomago go leta dikeiting e be e le ba 138 (lekgolo-masometharo-seswai). Bona e be e le barwa ba Shalume, barwa ba Atere, barwa ba Talamoni, barwa ba Akuba, barwa ba Hatita le barwa ba Shobai.
46 Bao ba bego ba hlankela ka tempeleng e be e le barwa ba Siha, barwa ba Hasufa, barwa ba Tabaothe,
47 barwa ba Kerose, barwa ba Sia, barwa ba Padone,
48 barwa ba Lebana, barwa ba Hakaba, barwa ba Salamai,
49 barwa ba Hanana, barwa ba Gidele, barwa ba Gahara,
50 barwa ba Reaya, barwa ba Retsini, barwa ba Nekoda,
51 barwa ba Gasama, barwa ba Utsa, barwa ba Pasea,
52 barwa ba Besai, barwa ba Meuni, barwa ba Nefushesima,
53 barwa ba Bakabuke, barwa ba Hakufa, barwa ba Harahuri,
54 barwa ba Basilithe, barwa ba Mehida, barwa ba Haresha,
55 barwa ba Barakose, barwa ba Sisera, barwa ba Tema,
56 barwa ba Netsia le barwa ba Hatifa.
57 Barwa ba bahlanka ba Solomone e be e le barwa ba Sotai, barwa ba Soferethe, barwa ba Perida,
58 barwa ba Jaalaa, barwa ba Darikone, barwa ba Gidele,
59 barwa ba Shefatia, barwa ba Hatili, barwa ba Pokerethe-hatsebaimi le barwa ba Amone.
60 Batho ka moka bao ba bego ba hlankela ka tempeleng le barwa ba bahlanka ba Solomone e be e le ba 392 (makgolotharo-masomesenyane-pedi).
61 Batho ba ba latelago ke bao ba ilego ba boa ba etšwa Thele-mela, Thele-harasha, Keruba, Adoni le Imere, eupša ba be ba se na bohlatse bja gore ke bona Baisiraele goba gore ba malapa a gabo bona* e be e le Baisiraele.
62 Bona e be e le barwa ba Delaya, barwa ba Tobia le barwa ba Nekoda, gomme e be e le ba 642 (makgolotshela-masomenne-pedi).
63 Le gona barwa ba baperisita ke ba: Barwa ba Habaya, barwa ba Hakotse, le barwa ba Barasilai yo a ilego a nyala yo mongwe wa barwedi ba Barasilai wa Mogileada gomme a bitšwa ka leina la ratswale wa gagwe.
64 Ba ke bao ba ilego ba nyaka go bona moo maina a malapa a gabo bona a ngwadilwego gona gore ba kgonthišetše meloko ya malapa a gabo bona, eupša ga se ba ka ba a hwetša, ka gona ba ile ba se swanelege gore e be baperisita.
65 Mmuši* o ile a re ba se ke ba ja dijo tše kgethwa go fihlela moperisita a diriša Urime le Thumime* go kwa gore Modimo o reng.
66 Batho ka moka ba setšhaba sa Baisiraele bao ba ilego ba boela morago e be e le ba 42 360 (dikete tše masomenne-pedi-makgolotharo-masometshela),
67 go sa balwe makgoba a bona a banna le a basadi a 7 337 (dikete tše šupa-makgolotharo-masometharo-šupa), le diopedi tša banna le tša basadi tše 245 (makgolopedi-masomenne-hlano).
68 Dipere tša bona e be e le tše 736 (makgološupa-masometharo-tshela), dimeila tša bona e be e le tše 245 (makgolopedi-masomenne-hlano).
69 Dikamela tša bona e be e le tše 435 (makgolonne-masometharo-hlano) gomme ditonki tša bona e be e le tše 6 720 (dikete tše tshela-makgološupa-masomepedi).
70 Ba bangwe ba dihlogo tša malapa a botatago bona ba ile ba ntšha moneelo bakeng sa mošomo wo o bego o dirwa wa go aga. Mmuši yena o ile a neela ka diterakema* tša gauta tše 1 000 (sekete), dikotlelwana tše 50 le diaparo tše 530 (makgolohlano-masometharo) tša baperisita, gomme a di tsenya mo go bolokelwago dilo tše bohlokwa.
71 Le gona go be go na le ba bangwe ba dihlogo tša malapa a botatago bona bao ba ilego ba neela ka diterakema tša gauta tše 20 000 (dikete tše masomepedi) le dimina* tša silifera tše 2 200 (dikete tše pedi-makgolopedi) bakeng sa mošomo wa go aga.
72 Ka gona setšhaba ka moka se ile sa neela ka diterakema tša gauta tše 20 000 (dikete tše masomepedi), dimina tša silifera tše 2 000 (dikete tše pedi) le diaparo tša baperisita tše 67.
73 Le gona baperisita, Balefi, batho bao ba šomago go leta dikeiting, diopedi, batho ba bangwe, batho bao ba hlankelago ka tempeleng gotee le Baisiraele ba bangwe ka moka ba ile ba dula metseng ya gabo bona. Ge kgwedi ya bošupa e fihla Baisiraele ba be ba šetše ba dula metseng ya gabo bona.
Mengwalo ya tlase
^ Mohlomongwe ye ke profense ya Babilona goba profense ya Juda.
^ Kgaolong ye lentšu “barwa” le ka šupa gape le go “ditlogolo.” Le gona mafelong a mangwe le ka šupa le go badudi ba motse.
^ Phetolelo ya lentšu ka lentšu e re, “ba ntlo ya botatago bona.”
^ Goba, “Tirishata,” e lego leina leo dintona tša diprofense tša Peresia di bego di bitšwa ka lona.
^ Bona Tlhaloso ya Mantšu.
^ Terakema e be e lekanywa le tšhelete ya gauta ya Peresia yeo e bego e imela digrama tše 8,4. Yeo ga se terakema yeo e lego ka Mangwalong a Segerika. Bona Dit. B14.
^ “Mina e tee” e be e imela digrama tše 570.
