Nehemia 9:1-38
9 Ka letšatši la bo-24 la kgwedi ya bošupa, Baisiraele ba ile ba kgobokana gomme ba ikona dijo, ba apara diaparo tše di bontšhago gore ba nyamile e bile ba itšhela ka mobu hlogong.
2 Baisiraele ba ile ba ikarola go batho ka moka bao e bego e se Baisiraele, ba ema ba ipobola dibe tša bona le melato ya botatago bona.
3 Ke moka ba ema lefelong la bona, ba balela godimo puku ya Molao wa Jehofa Modimo wa bona ka diiri tše tharo mosegare, gomme ka diiri tše dingwe tše tharo ba ipobola dibe e bile ba khunamela Jehofa Modimo wa bona.
4 Jeshua, Bani, Kadimiele, Shebania, Buni, Sherebia, Bani le Kenani ba ema sethaleng sa Balefi ke moka ba rapela Jehofa Modimo wa bona ka go hlaboša.
5 Jeshua, Kadimiele, Bani, Hashabanea, Sherebia, Hodia, Shebania le Phethahia bao e lego Balefi ba re: “Emang gomme le rete Jehofa Modimo wa lena go ya go ile. Anke go retwe leina la gago le le phagamego, le ge o le yo mogolo go feta ka tsela yeo batho ba ka go tumišago le go go šegofatša ka yona.
6 “Wena Jehofa, ga go na Modimo yo a swanago le wena. O dirile magodimo, e lego wona magodimo a phagamego le tšohle tšeo di lego go wona.* O dirile le lefase le dilo ka moka tšeo di lego go lona gotee le mawatle le dilo ka moka tšeo di lego ka go wona. Le gona o dira gore ka moka ga tšona di phele, e bile tšohle tše di lego magodimong di a go khunamela.
7 Ke wena Jehofa Modimo wa nnete, wena yo a kgethilego Aborama wa mo ntšha nageng ya Uri ya Bakaladea gomme wa mo rea leina la Aborahama.
8 O ile wa hwetša pelo ya gagwe e go botegela, ka gona wa dira kgwerano le yena ya gore o tla nea yena le ditlogolwana tša gagwe naga ya Bakanana, Bahethe, Baamore, Baperetse, Bajebusi le Bagirigashe. Le gona o ile wa dira dilo tšeo o bego o tshepišitše gore o tla di dira, ka gobane ka mehla o dira se se lokilego.
9 “O bone borakgolokhukhu ba rena ba hlaka kua Egepeta, gomme wa kwa sello sa bona kua Lewatleng le Lehwibidu.
10 Ke moka o ile wa dira dipontšho le mehlolo gore o otle Farao le bahlanka ba gagwe gotee le batho ka moka ba naga ya gagwe, ka gobane o be o tseba gore ba be ba tlaiša batho ba gago. O ile wa itirela leina leo le lehono o sa tumilego ka lona.
11 O ile wa aroganya lewatle ka bogare pele ga bona, gomme bona ba tshela lewatle ba sepela mo go omilego. O ile wa lahlela batho bao ba bego ba ba rakediša tlasetlase lewatleng go swana le ge leswika le lahlelwa ka lewatleng.
12 Mosegare o ile wa ba eta pele ka leru, gomme bošego wa ba eta pele ka mollo gore ba kgone go bona tsela yeo ba swanetšego go sepela ka yona.
13 O ile wa theogela Thabeng ya Sinai wa bolela le bona o le legodimong, wa ba nea melao ya gore ba kgone go ahlola ka toka, melao ya nnete le ditaelo tše dibotse.
14 O ile wa ba ruta gore ba boloke letšatši la Sabatha e le le lekgethwa, wa ba nea ditaelo le melao o diriša Moshe mohlanka wa gago.
15 O ba neile dijo tšeo di tšwago legodimong ge ba be ba swerwe ke tlala, gomme wa ba nea meetse ao a tšwago leswikeng ge ba be ba swerwe ke lenyora, e bile wa ba botša gore ba tsene nageng yeo o ennego gore o tla ba nea yona gore ba dule go yona.
16 “Eupša borakgolokhukhu ba rena ba ile ba ikgogomoša, ba thatafatša dihlogo tša bona gomme ba se theetše ditaelo tša gago.
17 Ba ile ba gana go theetša, ba lebala dilo tše di makatšago tšeo o ba diretšego tšona, ba thatafatša dihlogo tša bona gomme ba ikgethela moetapele gore ba boele kua Egepeta moo e bego e le makgoba. Eupša wena ga se wa ka wa ba lahla ka ge o le Modimo yo a lebalelago, yo a šokelago, yo a gaugelago, yo a sa galefego kapela le yo a nago le lerato le legolo.*
18 Le ge ba itiretše modimo wa seswantšho wa namane ba re ke Modimo wa bona yo a ba etilego pele a ba ntšha Egepeta, e bile ba dira le dilo tšeo di bontšhago gore ba go nyatša kudu,
19 wena ga se wa ka wa ba tlogela kua lešokeng ka gobane kgaugelo ya gago ke e kgolo. O ile wa tšwela pele o ba hlahla tseleng o diriša leru mosegare, le gona bošego mollo ga se wa ka wa tlogela go ba bonegela tseleng yeo ba swanetšego go sepela ka yona.
20 O ba neile moya wa gago* gore ba be bohlale, e bile ga se wa ka wa ba tima manna, le gona o ile wa ba nea meetse ge ba be ba swerwe ke lenyora.
21 O ile wa ba nea dijo kua lešokeng ka mengwaga e 40. Ba be ba sa hloke selo. Diaparo tša bona ga se tša ka tša hlagala, le gona maoto a bona ga se a ka a ruruga.
22 “O ile wa ba nea mebušo le ditšhaba gomme wa ba abela dinaga, e bile ba tšea naga ya Sihoni le naga ya kgoši ya Heshibone le naga ya Ogo kgoši ya Bashani ba dula go tšona.
23 O ile wa dira gore bana ba bona e be ba bantšhi bjalo ka dinaledi tša magodimong. Le gona o ile wa ba tliša nageng yeo o tshepišitšego borakgolokhukhu ba bona gore ba tla tsena go yona gomme e tla ba ya bona.
24 Ka gona bana ba bona ba ile ba tla ba tšea naga ba dula go yona. O ile wa ba thuša gore ba fenye Bakanana bao ba bego ba dula nageng yeo, le gona wa ba nea dikgoši tša bona le batho ba naga yeo gore ba dire seo ba se ratago ka bona.
25 Ba ile ba thopa metse e šireleditšwego le naga ya mobu o nonnego, le gona ba tšea le dintlo tšeo di tletšego dilo tše dibotse tša mehutahuta, didiba tšeo di epilwego, dirapa tša meterebe, mehlare ya mehlware le mehlare e mentšhi ya dienywa. Ba ile ba ja ba kgotsofala ba ba ba nona gomme ba thabela dilo tše dibotse ka moka tšeo o ba diretšego tšona.
26 “Eupša ba ile ba se go kwe, ba go hlanogela e bile ba se sa latela Molao wa gago. Le gona ba ile ba bolaya baporofeta ba gago bao ba bego ba ba botša gore ba boele go wena, e bile ba dira dilo tšeo di bontšhago gore ba go nyatša kudu.
27 Ka baka la seo o ile wa ba neela go manaba a bona, gomme ona a dulela go ba tlaiša. Eupša nakong ya ge ba be ba tlaišega ba be ba go llela ke moka wena o be o ba kwa o le magodimong, gomme ka baka la ge kgaugelo ya gago e le e kgolo o be o ba nea baetapele bao ba bego ba ba phološa go manaba a bona.
28 “Eupša kapejana ge manaba a bona a be a se sa ba tshwenya ba be ba thoma go dira dilo tše mpe gape, gomme wena o be o ba tlogela gore manaba a bona a ba gatelele. Ka morago ga moo ba be ba boela go wena ba kgopela thušo, o be o ba kwa o le magodimong gomme wa ba phološa gantšhi ka baka la ge kgaugelo ya gago e le e kgolo.
29 Gaešita le ge o be o ba lemoša gore ba boele ba latele Molao wa gago, bona ba ile ba ikgogomoša gomme ba gana go theetša ditaelo tša gago. Ba ile ba dira sebe ka go se latele melao yeo e tlago go dira gore motho a phele ge e ba a e latela. Ba ile ba go hlanogela ba thatafatša dihlogo tša bona gomme ba se theetše.
30 O ile wa fetša mengwaga e mentšhi o sa ba felele pelo, o be o dula o ba lemoša o diriša baporofeta ba gago bao o ba neilego moya wa gago, eupša bona ba gana go ba theetša. Mafelelong o ile wa ba tlogela gore ditšhaba tša dinaga tše dingwe di ba fenye.
31 Ga se wa ka wa ba fediša ka moka goba wa ba tlogela ka ge kgaugelo ya gago e le e kgolo, ka baka la ge o le Modimo yo a šokelago le yo a nago le botho.
32 “Bjale wena Modimo wa rena, o Modimo yo mogolo, yo a nago le matla, yo a hlomphegago, yo a bolokago kgwerano le yo a bontšhago lerato.* O se ke wa lebala mathata ka moka a rena, a dikgoši tša rena, baetapele ba rena, baperisita ba rena, baporofeta ba rena, borakgolokhukhu ba rena le batho ba gago ka moka go tloga mehleng ya dikgoši tša Asiria go ba go fihla lehono le.
33 O ile wa re swara gabotse le ge re ile ra diragalelwa ke dilo tše ka moka ka gobane o a botega, eupša ke rena re ilego ra dira dilo tše mpe.
34 Ge e le dikgoši tša rena, baetapele ba rena, baperisita ba rena le borakgolokhukhu ba rena ga se ba latela molao wa gago goba go theetša ditaelo tša gago, ga se ba latela le dikgopotšo tša gago tšeo o ba neilego tšona.
35 Le nakong ya ge ba be ba bušwa ke dikgoši tša bona ba le nageng ya bona e kgolo le yeo e nonnego e bile ba thabela dilo tše dintšhi tše dibotse tšeo o ba neilego tšona, ga se ba go hlankela e bile ga se ba tlogela go dira dilo tše mpe.
36 Lehono re makgoba, re makgoba nageng yeo o e neilego borakgolokhukhu ba rena gore ba je dienywa tša yona le dilo tša yona tše dibose,
37 dienywa tša naga yeo ke tša dikgoši tšeo o di beilego gore di re buše ka baka la dibe tša rena, dikgoši tše di buša rena* le diruiwa tša rena ka mo di ratago, gomme rena re na le mathata a magolo.
38 “Bjale ka baka la dilo tše ka moka, re dira kwano yeo re e ngwadilego ra ba ra e tiiša ka leswao la baetapele ba rena, Balefi ba rena le baperisita ba rena.”
Mengwalo ya tlase
^ Phetolelo ya lentšu ka lentšu e re, “makoko a legodimo.” Se se ka šupa go barongwa le dinaledi.
^ Phetolelo ya lentšu ka lentšu e re, “lerato le le botegago.”
^ Phetolelo ya lentšu ka lentšu e re, “moya wa gago o mobotse.”
^ Phetolelo ya lentšu ka lentšu e re, “lerato le le botegago.”
^ Phetolelo ya lentšu ka lentšu e re, “mebele ya rena.”
