Numeri 11:1-35
-
Modimo o tliša mollo gore o tšhume bao ba ngongoregago (1-3)
-
Batho ba llela nama (4-9)
-
Moshe o re a ka se kgone go hlokomela setšhaba a nnoši (10-15)
-
Jehofa o nea banna ba bagolo ba 70 moya wa gagwe (16-25)
-
Eledada le Medada; Moshe o re Joshua o tshwenyegile (26-30)
-
Modimo o romela dinonyana; ba megabaru ba a otlwa (31-35)
11 Bjale setšhaba sa thoma go ngongoregela Jehofa o šoro. Ge Jehofa a ekwa seo, a galefa gomme mollo wa Jehofa wa ba tukela ke moka wa tšhuma ba bangwe ba bona go fihlela mafelelong a ditente.
2 Ge batho ba be ba llela Moshe, yena o ile a rapela Jehofa gomme mollo wa hwelela.
3 Lefelo leo le ile la bitšwa Thabera,* ka gobane mollo wa Jehofa o be o ba tšhumile.
4 Lešaba la batho ba mehuta ka moka leo le bego le na le bona la thoma go ba le megabaru, gomme Baisiraele le bona ba lla gape ba re: “Ke mang a tlago go re nea nama ra ja?
5 Re gopola dihlapi tšeo re bego re di ja kua Egepeta re di hwetša mahala, le dikhukhampa, magapu, diliki, dieiye le dikaliki.
6 Bjale re felelwa ke matla. Ga re sa bona selo ge e se manna feela.”
7 Manna a be a swana le pewana e tšhweu gomme mmala wa ona o swana le wa boreku bjo bo bitšwago deliamo.
8 Batho ba be ba tlala gohle ba a topa, ba a šila ka ditšhilo goba ba a setlela ka lehudung, ke moka ba a fufutša ka dipitšeng goba ba apea dinkgwa tša nkgokolo ka ona. Tatso ya ona e be e swana le ya dikuku tše bose tšeo di tswakilwego le makhura.
9 Ge phoka e be e nele ditenteng bošego, manna a be a wela godimo ga yona.
10 Moshe a kwa ka lapeng le lengwe le le lengwe batho ba lla, monna yo mongwe le yo mongwe a lla a le mojakong wa tente ya gagwe. Jehofa a galefa kudu, gomme Moshe le yena a galefela setšhaba.
11 Ke moka Moshe a re go Jehofa: “Ke ka baka la’ng o nkgalefetše? Le gona ke ka baka la’ng o mphile mošomo o thata wa go hlokomela setšhaba se ka moka?
12 Na ke nna ke ilego ka ima batho ba ka moka? Na ke nna ke ba belegego mo e bilego o re go nna: ‘Ba kuke o ba bee sehubeng sa gago go swana le moledi ge a kuka ngwana yo a amušwago,’ ke ba iše nageng yeo o e enetšego borakgolokhukhu ba bona?
13 Ke tla tšea kae nama yeo nka e neago setšhaba se ka moka? Ka gobane se dulela go ntelela se re: ‘Re fe nama re je!’
14 Ga ke kgone go hlokomela setšhaba se ka moka ke nnoši, ka gobane se nkimela kudu.
15 Ge e ba o tlo ntshwara ka tsela ye, gona mpolaye hle. Ge e ba o nkamogela, gona dira gore ke se sa bona masetlapelo a.”
16 Ke moka Jehofa a re go Moshe: “Nkgobokeletše banna ba 70 go banna ba bagolo ba Isiraele, e lego banna bao o tsebago gore ke ba bagolo mo setšhabeng e bile ba a se hlankela, gomme o ba tliše taberenakeleng, ba eme moo le wena.
17 Ke tla theoga gore ke tle ke bolele le wena moo, gomme ke tla tšea o mongwe wa moya wo o lego go wena ka o bea go bona. Ba tla go thuša go rwala morwalo wa setšhaba se gore o se ke wa o rwala o nnoši.
18 O botše setšhaba o re: ‘Ikgethagatšeng ka gobane gosasa le tlo ja nama ka ge le lletše Jehofa a le theeditše, la re: “Ke mang a tlago go re nea nama ra ja, ka gobane re be re iketlile kua Egepeta?” Ruri Jehofa o tla le nea nama gomme la ja.
19 Le ka se e je letšatši letee goba matšatši a mabedi goba a mahlano goba a 10 goba a 20,
20 eupša le tla eja kgwedi ka moka go fihlela e etšwa ka dinko tša lena e bile e le tenne, ka gobane le ganne Jehofa, yena yo a lego gare ga lena, la lla pele ga gagwe la re: “Ke ka baka la’ng re tšwile Egepeta?”’”
21 Ke moka Moshe a re: “Mo setšhabeng se ke nago le sona go na le mašole a 600 000 (dikete tše makgolotshela), eupša wena o itše: ‘Ke tla a nea nama gomme a eja kgwedi ka moka’!
22 Ge e ba mašole ao a be a ka hlabelwa mehlape ya dipudi, dinku le ya dikgomo, na nama yeo e be e tla a lekana? Goba ge e ba a be a ka swarelwa dihlapi ka moka tša lewatle, na nama yeo e be tla a lekana?”
23 Ke moka Jehofa a re go Moshe: “Na seatla sa ka nna Jehofa ke se se kopana? Bjale o tlo bona ge e ba seo ke se bolelago se tla go diragalela goba se ka se go diragalele.”
24 Ka morago ga moo Moshe a ya a botša setšhaba mantšu ao a Jehofa. Ke moka a kgoboketša banna ba 70 go tšwa go banna ba bagolo ba setšhaba gomme a ba emiša go dikologa taberenakele.
25 Ke moka Jehofa a theoga a le lerung, gomme a bolela le yena a ba a tšea o mongwe wa moya wo o bego o le mo go yena a o bea go yo mongwe le yo mongwe wa banna bao ba bagolo ba 70. Ke moka gateetee ge moya woo o dutše godimo ga bona, ba dira dilo tšeo baporofeta ba di dirago, eupša ba se sa dira seo gape.
26 Ba babedi ba banna bao ba be ba šetše ditenteng. Leina la yo mongwe e be e le Eledada gomme la yo mongwe e le Medada. Ke moka moya wa dula godimo ga bona ka ge ba be ba le gare ga bao maina a bona a ngwadilwego, eupša ba be ba se ba ya taberenakeleng. Ka gona ba thoma go itshwara bjalo ka baporofeta ba le moo ditenteng.
27 Lesogana le lengwe la kitima la yo botša Moshe la re: “Kua ditenteng Eledada le Medada ba dira dilo tšeo baporofeta ba di dirago!”
28 Ke moka Joshua morwa wa Nuni, yo a bego a hlankela Moshe go tloga e sa le yo moswa, a fetola a re: “Moshe mong wa ka, ba thibele!”
29 Eupša Moshe a re go yena: “Na o tshwenyegile ka nna? O se ke wa tshwenyega, ka gobane ke duma ge nkabe batho ba Jehofa ka moka e be e le baporofeta ka gobane Jehofa o be a tla bea moya wa gagwe go bona!”
30 Ka morago Moshe a boela ditenteng a na le banna ba bagolo ba Isiraele.
31 Gwa tsoga phefo e tšwago go Jehofa gomme ya ntšha dinonyana* ka lewatleng ya di phatlalatša gohle ditenteng go lekana leeto la letšatši ka thoko ye le leeto la letšatši ka thoko yela. Tša phatlalala gohle ditenteng, gomme mokgobo wa tšona e be e le wa bophagamo bja mo e ka bago mithara o tee* go tloga fase.
32 Batho ba se robale letšatši leo ka moka le bošego ka moka le letšatšing leo le latelago ka moka ba topa dinonyana tšeo. Yo a bego a topile tše dinyenyane o be a tladitše dinkgo* tše 10. Ke moka ba di phatlalatša gohle ditenteng.
33 Eupša e rile nama yeo e sa le menong a bona, le pele ba ka e sohla, Jehofa a ba galefela, gomme Jehofa o ile a bolaya batho ba bantši kudu moo setšhabeng.
34 Ka gona ba ile ba reela lefelo leo leina ba re ke Kibirothe-hatafa, ka gobane ke moo ba ilego ba bolokela batho bao ba ilego ba bontšha megabaru.
35 Setšhaba sa tloga Kibirothe-hatafa sa ya Hatserothe gomme sa dula moo Hatserothe.
Mengwalo ya tlase
^ Leina le le ra gore, “Go Tuka, Mollo o Mogolo goba Kgabo.”
^ Phetolelo ya lentšu ka lentšu e re, “dikhwiri.” Khwiri ke nonyana e nyenyane ya go nona.
^ Phetolelo ya lentšu ka lentšu e re, “mo e ka bago dikubiti tše pedi.”
^ Phetolelo ya lentšu ka lentšu e re, “dihomere.” Homere e lekana le dilithara tše 220. Bona Dit. B14.
