Numeri 12:1-16
12 Bjale Moshe o be a nyetše mosadi wa Mokushe, ka baka leo Miriamo le Arone ba ile ba thoma go bolela gampe ka Moshe.
2 Ba be ba re: “Na Jehofa o boletše a diriša Moshe feela? Na ga se a ka a bolela a diriša le rena?” Jehofa yena o be a theeditše.
3 Moshe e be e le motho yo boletaleta go feta batho ka moka mo lefaseng.
4 Gateetee Jehofa a bolela le Moshe, Arone le Miriamo a re: “Etšwang le ye taberenakeleng.” Ka gona ba tšwa ka moka ga bona.
5 Ka morago ga moo Jehofa a theoga a le lerung, a ema mojakong wa taberenakele gomme a bitša Arone le Miriamo. Ke moka bona ba tšwa.
6 Ke moka a re: “Ntheetšeng hle. Ge e ba go na le moporofeta wa Jehofa mo gare ga lena, gona ke tla itsebatša go yena ke diriša pono, e bile ke tla bolela le yena torong.
7 Eupša ga se ka dira bjalo ka Moshe mohlanka wa ka! Yena ke mo kgethile gore a hlokomele setšhaba sa ka ka moka.
8 Ke bolela le yena ka go lebanya, ke bolela le yena ka mo go kwagalago, e sego ka dika le diema, e bile nna Jehofa ke iponagatša go yena. Ka gona, le re’ng le be le sa tšhabe go bolela gampe ka mohlanka wa ka Moshe?”
9 Jehofa a ba galefela ke moka a tloga go bona.
10 Leru la tloga taberenakeleng gomme Miriamo a otlwa ka lephera, a ba yo mošweu bjalo ka kapoko. Ke moka ge Arone a retologela go Miriamo, a bona a otlilwe ka lephera.
11 Gateetee Arone a re go Moshe: “Tshwarelo hle, mong wa ka! O se ke wa dumelela re otlwa ka baka la sebe se, ka gobane re se dirile ka bošilo!
12 Hle o se dire gore Miriamo a tšwele pele a le bjalo ka lesea leo le hwilego, leo le belegwego le jegile dinama tše dingwe!”
13 Ke moka Moshe a llela Jehofa a re: “Modimo, mo fodiše hle!”
14 Jehofa a re go Moshe: “Ge nkabe tatagwe a mo tshwele ka mare sefahlegong, na o be a ka se fetše matšatši a šupago a gobogile? Gona a a bewe a nnoši matšatši a šupago ka ntle ga ditente, gomme ka morago ga moo o tla boa gape ditenteng.”
15 Ka gona Miriamo a bewa a nnoši ka ntle ga ditente matšatši a šupago, gomme setšhaba sa se hlomolle ditente gore se sepele go fihlela ge Miriamo a boile.
16 Ka morago ga moo setšhaba sa hlomolla ditente sa ya Hatserothe, gomme sa fihla sa hloma ditente lešokeng la Parane.
