Numeri 13:1-33
13 Bjale Jehofa a bolela le Moshe a re:
2 “Roma banna gore ba yo hlola naga ya Kanana yeo ke e neago Baisiraele. O rome monna o tee go tšwa molokong o mongwe le o mongwe, gomme o kgethe monna yo e lego kgošana molokong wa gabo.”
3 Ka gona Moshe a ba roma a le lešokeng la Parane go ya kamoo Jehofa a mo laetšego ka gona. Banna bao ka moka e be e le baetapele ba Baisiraele.
4 Maina a bona šea: Molokong wa Rubeni e be e le Shamua morwa wa Sakuri,
5 molokong wa Simeone e be e le Shafata morwa wa Hori,
6 molokong wa Juda e be e le Kalebe morwa wa Jefune,
7 molokong wa Isakara e be e le Igala morwa wa Josefa,
8 molokong wa Efuraime e be e le Hoshea morwa wa Nuni,
9 molokong wa Benjamini e be e le Palati morwa wa Rafu,
10 molokong wa Sebulone e be e le Gadiele morwa wa Sodi,
11 molokong wa Josefa go ba moloko wa Manase e be e le Gaddi morwa wa Susi,
12 molokong wa Dani e be e le Amiele morwa wa Gemali,
13 molokong wa Ashere e be e le Sethuri morwa wa Mikaele,
14 molokong wa Nafutali e be e le Nahabi morwa wa Bofisi,
15 molokong wa Gada e be e le Guwele morwa wa Maki.
16 Ao ke maina a banna bao Moshe a ilego a ba roma go yo hlola naga. Ke moka Moshe o ile a reela Hoshea morwa wa Nuni leina a re ke Joshua.*
17 Ge Moshe a be a ba roma go yo hlola naga ya Kanana, o ile a re go bona: “Rotogang mo le ye Negebe, ke moka go tloga moo le rotogele dithabeng.
18 Le bone gore naga yeo e bjang, le gona le bone ge e ba batho bao ba dulago go yona e le ba matla goba ba fokola, e le ba sego kae goba e le ba bantšhi,
19 le gona le bone ge e ba naga yeo ba dulago go yona e le e botse goba e le e mpe, e bile le bone ge e ba metse yeo ba dulago go yona e le ditente goba e ageleditšwe ka maboto.
20 Le bone ge e ba naga yeo e tšweletša dienywa goba e sa di tšweletše, le ge e ba e na le mehlare goba e se na mehlare. Le beng le sebete gomme le tleng le tše dingwe tša dienywa tša naga yeo.” Bjale nako yeo e be e le ya diterebe tšeo di butšwago pele.
21 Ka gona ba ile ba rotoga ba yo hlola naga go tloga ka lešoka la Tsini go fihla Rehobo, yeo e lego kgauswi le Lebo-hamathi.
22 Ge ba rotogela Negebe, ba ile ba fihla Heburone moo go bego go dula Ahimane, Sheshai le Talamai, e lego bana ba Anaki. Motse wa Heburone o be o agilwe mengwaga e šupago pele go agwa motse wa Tsoane kua Egepeta.
23 Ge ba fihla Moeding wa Eshikolo, ba ile ba rema lekala leo le nago le ntšhuhla e tee ya diterebe, leo banna ba babedi ba ilego ba swanelwa ke go le rwala ka kota. Ba ile ba ba ba tla le digarenate le mago.
24 Ba ile ba reela lefelo leo leina ba re ke Moedi wa Eshikolo,* ka baka la ntšhuhla ya diterebe yeo Baisiraele ba e remilego moo.
25 Ge matšatši a 40 a se na go fela ba ile ba boa ba etšwa go hlola naga.
26 Ba boela go Moshe le Arone le setšhaba ka moka sa Baisiraele lešokeng la Parane, kua Kadeshe. Ba botša setšhaba ka moka gore ba sepetše bjang gomme ba se bontšha le dienywa tša naga yeo.
27 Ba botša Moshe ba re: “Re tsene nageng yeo o re romilego go yona gomme ka nnete e ela maswi le todi ya dinose, gomme tše ke dienywa tša yona.
28 Eupša batho bao ba dulago moo ba na le matla kudu e bile metse yeo ba dulago go yona e šireleditšwe gomme ke e megolo kudu, le gona re bone le Baanaki moo.
29 Baamaleke ba dula nageng ya Negebe gomme Bahethe, Bajebusi le Baamore ba dula tikologong ya dithaba. Ke moka Bakanana ba dula kgauswi le lewatle go bapa le Noka ya Jorodane.”
30 Ke moka Kalebe a leka go homotša setšhaba gore se theetše Moshe, a re: “A re rotogeng kapelapela, gomme re tlo tšea naga yeo ka gobane re ka e fenya.”
31 Eupša banna bao a bego a sepetše le bona ba re: “Re ka se kgone go lwa le ditšhaba tšeo ka gobane di na le matla go re feta.”
32 Ke moka ba dulela go botša Baisiraele dilo tše mpe ka naga yeo ba tšwago go e hlola, ba re: “Naga yeo re sepetšego go yona re tšama re e hlola, ke naga e kotsi kudu yeo ge re ka ya go yona re tlago go hwa, le gona batho ka moka bao re ba bonego nageng yeo ke ditšitširipa.
33 Gona moo re bone Banefilimi, e lego Baanaki bao ba tšwago go Banefilimi. Ke moka re ile ra re ge re ba bona ra ipona re le bjalo ka ditšie, gomme le bona ba re bona re le bjalo ka ditšie.”
Mengwalo ya tlase
^ Goba, “Jehoshua,” yeo e bolelago gore, “Jehofa ke Phološo.”
^ Leina le le ra gore, “Ntšhuhla ya Diterebe.”
