Numeri 16:1-50
16 Kora morwa wa Itsehara, morwa wa Kohathe e lego morwa wa Lefi, a ema le Dathane le Abirama e lego barwa ba Eliaba, gotee le Oni morwa wa Pelethe, bao e lego ba moloko wa Rubeni.
2 Ba ipopa ngatana e tee gore ba yo lwa le Moshe ba na le banna ba bangwe ba 250 (makgolopedi-masomehlano) ba Baisiraele, e lego dikgošana tšeo di kgethilwego mo setšhabeng, bona banna ba go tuma.
3 Ba kgobokana gomme ba tla go Moshe le Arone ba re go bona: “Re kwele go lekane ka lena ka gobane setšhaba ka moka le sona ke se sekgethwa gomme Jehofa o gare ga sona. Le re’ng le itira ba bakaone go feta phuthego ye ya Jehofa?”
4 Ge Moshe a ekwa seo, gateetee a wela fase ka matolo gomme a inamela fase.
5 Ke moka a bolela le Kora le batho ka moka bao ba mo thekgago a re: “Mesong Jehofa o tla tsebiša yo e lego wa gagwe, yo e lego yo mokgethwa le yo a swanetšego go batamela go yena, gomme motho le ge e le ofe yo a tlago go mo kgetha, o tla batamela go yena.
6 Lena dirang se: Wena Kora le batho ka moka bao ba go thekgago, itšeeleng dibjana tša go swara magala,
7 gomme gosasa le tsenye magala ka go tšona, le be le tsenye le diorelo ka gare ga tšona pele ga Jehofa, gomme motho yoo Jehofa a tlago go mo kgetha, ke yena yo mokgethwa. Lena barwa ba Lefi le ntapišitše!”
8 Ke moka Moshe a re go Kora: “Theetšang hle, lena barwa ba Lefi.
9 Na le nagana gore ke selo se senyenyane ge Modimo wa Isiraele a le kgethile setšhabeng sa Isiraele gore le batamele pele ga gagwe, e le gore le hlankele taberenakeleng ya Jehofa le gore le hlankele setšhaba sa Baisiraele?
10 Le gona na le nagana gore ke selo se senyenyane ge Modimo a batameditše lena le bana babo lena ka moka e lego barwa ba Lefi kgauswi le yena? Bjale na le nyaka le go ba baperisita?
11 Ke ka baka leo wena le batho ka moka bao ba go thekgago le kgobokanego mo go tlo lwa le Jehofa. Ge e le Arone yena o dirile eng moo e bilego le ngongorega ka yena?”
12 Ka morago Moshe a romela molaetša gore go bitšwe Dathane le Abirama e lego barwa ba Eliaba, eupša bona ba re: “Re ka se tle moo!
13 Na o nagana gore ke selo se senyenyane ge o re ntšhitše nageng yeo e elago maswi le todi ya dinose gore o tle o re bolaele mo lešokeng, bjale na e bile o nyaka go itira le kgošana ya rena?
14 E kae naga yeo e elago maswi le todi ya dinose yeo o rilego o tla re iša go yona, gore o re nee mašemo le dirapa tša meterebe? Na o nyaka gore banna bao ba no go latela okare ke difofu?* Re ka se tle moo!”
15 Ke moka Moshe a galefa kudu gomme a re go Jehofa: “O se ke wa amogela sebego sa bona sa mabele. Ga se ka ba tšeela tonki le ge e ka ba e tee e bile ga se ka gobatša le o tee wa bona.”
16 Ka gona Moshe a re go Kora: “Wena le batho ka moka bao ba go thekgago gosasa le tle pele ga Jehofa, e be wena, bona le Arone.
17 Yo mongwe le yo mongwe a tšee sebjana sa gagwe sa go swara magala, gomme a tsenye diorelo ka gare ga sona. Ke moka yo mongwe le yo mongwe a tliše sebjana sa gagwe pele ga Jehofa, e be dibjana tše 250 (makgolopedi-masomehlano). Wena le Arone le lena le tle le dibjana tša lena.”
18 Ka gona yo mongwe le yo mongwe a tšea sebjana sa gagwe sa go swara magala a tsenya magala ka go sona a ba a bea le seorelo ka go sona. Ke moka ba ema kgauswi le mojako wa taberenakele ba na le Moshe le Arone.
19 E rile ge Kora a kgobokantše batho bao ba mo thekgago kgauswi le mojako wa taberenakele gore ba tle ba lwe le bona, setšhaba sa Baisiraele ka moka sa bona letago la Jehofa.
20 Bjale Jehofa a re go Moshe le Arone:
21 “Tlogang mo go banna ba gore ke ba fediše ka ponyo ya leihlo.”
22 Ge a re’alo bona ba wela fase ka matolo gomme ba inamela fase ba re: “Wena Modimo yo a neago batho ka moka bophelo, na go ka senya motho o tee feela gomme wena wa galefela setšhaba ka moka?”
23 Ke moka Jehofa a re go Moshe:
24 “Botša setšhaba ka moka o re: ‘Tlogang kgauswi le tente ya Kora, ya Dathane le ya Abirama!’”
25 Ka morago ga moo Moshe a ema gomme a ya go Dathane le Abirama ke moka banna ba bagolo ba Baisiraele ba sepela le yena.
26 A botša setšhaba a re: “Hle tlogang ditenteng tša banna ba ba babe e bile le se ke la kgwatha selo le ge le sefe sa bona, e le gore le se ke la tla la fedišwa ka baka la sebe sa bona.”
27 Kapejana setšhaba sa tloga pele ga tente ya Kora, ya Dathane le ya Abirama, gomme Dathane le Abirama bona ba tšwa ba ema mejakong ya ditente tša bona ba na le basadi ba bona le bana ba bona.
28 Ke moka Moshe a re: “Le tla tseba ka se gore Jehofa o nthomile go dira dilo tše ka moka le gore ga di tšwe go nna:
29 Ge e ba batho ba ba ka hwa ka tsela yeo gantšhi batho ka moka ba hwago ka yona, gona le tla tseba gore ga se Jehofa a nthomilego.
30 Eupša ge e ba Jehofa a ka dira selo seo se sa kago sa direga gomme lefase la bulega la ba metša le dilo ka moka tša bona, ba theogela Lebitleng* ba sa phela, gona le tla tseba gore batho ba ba nyaditše Jehofa.”
31 Ya re gateetee ge a fetša go bolela dilo tšeo ka moka, lefase la mo ba bego ba eme gona la pharoga.
32 Ke moka lefase la bulega la ba metša gomme la metša bona le malapa a bona le batho ka moka bao ba bego ba thekga Kora, la ba la metša le dithoto tša bona ka moka.
33 Ka gona batho bao ka moka ba ile ba theogela Lebitleng ba sa phela gomme lefase la ba khupetša moo ba ilego ba fedišwa setšhabeng.
34 Baisiraele ka moka bao ba bego ba le kgauswi le bona ge ba ekwa batho bao ba goeletša ba tšhaba, ba re: “A re tšhabeng gore le rena lefase le se ke la tla la re metša!”
35 Ke moka mollo wa tšwa go Jehofa gomme wa tšhuma banna ba 250 (makgolopedi-masomehlano) bao ba bego ba neela diorelo.
36 Bjale Jehofa a re go Moshe:
37 “Botša Eleasara morwa wa moperisita Arone gore a ntšhe dibjana tšeo tša go swara magala mollong ka gobane ke tše kgethwa, le gona o mmotše gore a tšhollele magala ao kgole.
38 Dibjana tšeo tša go swara magala tša banna bao ba ipaketšego lehu ka go dira sebe, di dirwe ditšhipi tše tshesane gomme di bewe godimo ga aletare, ka gobane ba ile ba di tliša pele ga Jehofa gomme seo sa dira gore e be tše kgethwa. Dibjana tšeo e tla ba temošo go Baisiraele.’”
39 Ka gona moperisita Eleasara a tšea dibjana tšela tša go swara magala tša koporo tšeo di bego di tlišitšwe ke banna bale ba tšhumilwego ke mollo, a di dira ditšhipi tša go bewa godimo ga aletare,
40 a dira ka mokgwa wo Jehofa a bego a mo laetše a diriša Moshe. Seo sa gopotša Baisiraele gore go se be le motho yo e sego moperisita yo e sego wa moloko wa Arone yo a tlago go thuntšha diorelo pele ga Jehofa, le gore go se ke gwa ba le motho yo a tlago go ekiša Kora le bao ba bego ba mo thekga.
41 Letšatšing lona le le latelago ke ge setšhaba ka moka sa Baisiraele se ngongoregela Moshe le Arone, se re: “Lena ba babedi, ke lena le bolailego setšhaba sa Jehofa.”
42 Ya re ge setšhaba ka moka se kgobokane go tlo lwa le Moshe le Arone, sa retologa sa lebelela taberenakele gomme sa bona e khupeditšwe ke leru ke moka letago la Jehofa la bonagala.
43 Moshe le Arone ba tla pele ga taberenakele.
44 Ke moka Jehofa a re go Moshe:
45 “Lena tlogang mo pele ga setšhaba se, e le gore ke se fediše ka ponyo ya leihlo.” Ge a re’alo bona ba wela fase ka matolo gomme ba inamela fase.
46 Ke moka Moshe a re go Arone: “Tšea sebjana sa go swara magala gomme o tsenye magala ao a tšwago aletareng le seorelo ka go sona, ke moka kapelapela o ye setšhabeng o kgopele Modimo gore a se lebalele sebe, ka gobane Jehofa o galefile. Batho ba šetše ba ehwa ka baka la go otlwa!”
47 Gateetee Arone a tšea sebjana seo, feela bjalo ka ge Moshe a be a boletše, a kitimela setšhabeng ka gobane batho ba be ba šetše ba thomile go hwa ka baka la go otlwa. Ke moka a tsenya seorelo ka gare ga sebjana sa go swara magala e le gore Modimo a lebalele setšhaba seo sebe.
48 A ema magareng ga batho bao ba hwilego le bao ba phelago, gomme mafelelong batho ba se sa hwa.
49 Bao ba hwilego ka baka la kotlo yeo e be e le ba 14 700 (dikete tše lesomenne-makgološupa), go sa balwe bao ba hwilego ka baka la Kora.
50 Mafelelong ge Arone a boela go Moshe mojakong wa taberenakele, ke ge kotlo e šetše e kgaoditše.
Mengwalo ya tlase
^ Phetolelo ya lentšu ka lentšu e re, “Na o nyaka go gonya mahlo a banna bao?”
^ Bona Tlhaloso ya Mantšu.
