Numeri 17:1-13
-
Lepara la Arone leo le tšwilego mapolomo ke leswao (1-13)
17 Bjale Jehofa a re go Moshe:
2 “Botša Baisiraele gore moloko o mongwe le o mongwe o tliše lepara letee go tšwa go kgošana e nngwe le e nngwe, e be mapara a 12 go ya ka meloko ya bona. O ngwale leina la kgošana e nngwe le e nngwe lepareng la yona.
3 Lepareng la Lefi o ngwale leina la Arone ka gobane go na le lepara letee la hlogo ya moloko o mongwe le o mongwe.
4 O bee mapara ao ka teberenakeleng ka pele ga areka yeo e nago le maswika ao a ngwadilwego melao ya ka, moo ke dulago ke iponagatša go wena.
5 Lepara la monna yo ke tlago go mo kgetha le tla hloga, gomme ke tla dira gore Baisiraele bao ba ngongoregelago nna le lena, ba se sa ngongorega.”
6 Ka gona Moshe a bolela le Baisiraele gomme dikgošana ka moka tša bona tša mo nea mapara a tšona. Kgošana e nngwe le e nngwe ya mo nea lepara la moloko wa yona gomme ya ba mapara a 12. Lepara la Arone le be le le gare ga mapara a dikgošana tšeo.
7 Ke moka Moshe a bea mapara ao pele ga Jehofa ka arekeng yeo e nago le maswika ao a ngwadilwego melao ya Modimo.
8 Ya re letšatšing le le latelago ge Moshe a tsena ka taberenakeleng, moo go bego go na le areka yeo e nago le maswika ao a ngwadilwego melao ya Modimo, a hwetša lepara la Arone yoo e lego wa moloko wa Lefi le hlogile, le tšwele mapolomo e bile le na le dienywa tšeo di butšwitšego tša dialmonte.
9 Ke moka Moshe a tloša mapara ao ka moka pele ga Jehofa a a ntšhetša ka ntle, gomme a a iša go Baisiraele ka moka. Bona ba a lebelela ke moka kgošana e nngwe le e nngwe ya tšea lepara la yona.
10 Ka morago Jehofa a re go Moshe: “Bušetša lepara la Arone ka pele ga areka yeo e nago le maswika ao a ngwadilego melao ya ka, gore le lotwe le gore e tle e be temošo go Baisiraele ba go se kwe, gore ba se sa ngongorega ka nna le gore ba se tlo hwa.”
11 Kapejana Moshe a dira ka mokgwa wona wo Jehofa a bego a mo laetše. A dira ka wona mokgwa woo.
12 Baisiraele ba re go Moshe: “Bjale gona re tlo hwa, ruri ka moka ga rena re tlo felela gwa se šale motho.
13 Motho yo mongwe le yo mongwe yo a batamelago kgauswi le taberenakele ya Jehofa, o tlo hwa! Na ka moka re swanetše go hwa ka tsela yeo?”
