Numeri 18:1-32
18 Ke moka Jehofa a re go Arone: “Wena le barwa ba gago le ditlogolo tša gago le tla ikarabela ge le ka se latele melao ya mabapi le lefelo le lekgethwa, le gona wena le barwa ba gago le tla ikarabela ge le ka se latele melao ya mabapi le boperisita.
2 Le gona o bitše bana beno ba moloko wa Lefi, e lego ba moloko wa tatago, e le gore ba tle ba šome le wena le go thuša wena le barwa ba gago ge le hlankela pele ga tente yeo e nago le maswika ao a ngwadilwego melao ya ka.
3 Ba tla dira mešomo ka moka yeo o ba abetšego yona e bile ba dire mešomo ka moka ya ka tenteng, eupša ba se ke ba batamela dibjana tša lefelong le lekgethwa goba aletare, e le gore wena le bona le se ke la hwa.
4 Ba tla šoma le wena le go dira mešomo ka moka ya ka taberenakeleng. Le gona go se be le motho yo e sego moperisita yo a batamelago kgauswi le lena.
5 Le direng mešomo ya lena ya lefelong le lekgethwa le ya aletareng, e le gore ke se ke ka galefela setšhaba sa Baisiraele gape.
6 Tsebang gore ke kgethile banababo lena ba Balefi gare ga Baisiraele gore e be mpho ya lena, e tla ba ba Jehofa gomme ba tla šoma ka taberenakeleng.
7 Wena le barwa ba gago le šome mešomo ya boperisita ya mabapi le aletare le sekgethwakgethwa,* gomme yeo e tla ba tirelo ya lena. Ke le nea mošomo wo wa boperisita e le mpho, le gona motho le ge e le ofe yo e sego moperisita yo a batamelago sekgethwakgethwa a bolawe.”
8 Jehofa a tšwela pele a bolela le Arone a re: “Nna ke go kgethile gore o hlokomele meneelo yeo batho ba nntšhetšago yona. Ke neile wena le barwa ba gago karolo ya dilo ka moka tše kgethwa tšeo Baisiraele ba di neelago gore e be ya lena go ya go ile.
9 Le tla hwetša karolo yeo go dibego tše kgethwakgethwa tša go fišwa ka mollo. Sebego se sengwe le se sengwe seo batho ba ntlišetšago sona, go akaretša le sebego sa mabele, sebego sa sebe le sebego sa molato, e tla ba selo se sekgethwakgethwa go wena le go barwa ba gago.
10 Le swanetše go se jela lefelong le lekgethwakgethwa. Banna ka moka ba se je. E tla ba selo se sekgethwa go lena.
11 Dilo tše dingwe tšeo e lego tša lena ke dimpho tšeo ba di neelago gotee le dibego ka moka tša go tšokotšwa tša Baisiraele. Ke di neile wena le barwa ba gago le barwedi ba gago gore e be karolo ya lena go ya go ile. Motho yo mongwe le yo mongwe yo a hlwekilego ntlong ya gago a ka di ja.
12 “Makhura ka moka a makaonekaone le beine e mpsha e kaonekaone gotee le mabele, e lego tšeo di tšwago go dilo tšeo ba di bunnego pele, tšeo ba di neago nna Jehofa, ke le nea tšona.
13 Dienywa ka moka tša mathomo tša dilo tšeo di tšwago nageng ya bona tšeo ba tlago go di tlišetša nna Jehofa, e tla ba tša lena. Motho yo mongwe le yo mongwe yo a hlwekilego ntlong ya gago a ka di ja.
14 “Selo se sengwe le se sengwe seo se kgethilwego gore e be se sekgethwa mo Isiraeleng, e be sa lena.
15 “Bana ka moka ba mathomo le maitšibulo ka moka a diphoofolo, ao Baisiraele ba tlago go a tlišetša nna Jehofa, e tla ba a lena. Eupša le rekolle bana ba mathomo, e bile le rekolle le maitšibulo a diphoofolo tšeo di sa hlwekago.
16 Le rekolle leitšibulo la go tloga ka la kgwedi go ya godimo ka tšhelete yeo e beilwego ya go rekolla maitšibulo, e lego ditšhelete tše hlano tša silifera go ya ka tsela ya go kala tšhelete ya lefelong le lekgethwa. Tšhelete e nngwe le e nngwe ya silifera e lekane le digrama tše 12.*
17 Le se ke la rekolla leitšibulo la poo, goba la nku e tona goba la pudi ka gore ona ke a makgethwa. Le foketše madi a ona aletareng gomme makhura a ona le a thuntšhe muši gore e be sebego sa go fišwa ka mollo sa monkgo o bose wo o yago go Jehofa.
18 Nama ya ona e be ya lena, go swana le leoto la le letona gotee le sehuba sa phoofolo ya sebego sa go tšokotšwa.
19 Meneelo ka moka e mekgethwa yeo Baisiraele ba tlago go e ntšhetša nna Jehofa, ke e nea lena, barwa ba lena le barwedi ba lena gore e be karolo ya lena go ya go ile. Ke kgwerano ya go ya go ile* pele ga Jehofa bakeng sa lena le bana ba lena.”
20 Jehofa a tšwela pele a bolela le Arone a re: “Le ka se hwetše bohwa nageng ya Isiraele, e bile le ka se newe naga gore e be ya lena. Nna ke bohwa bja lena mo gare ga Baisiraele.
21 “Tseba gore barwa ba Lefi ke ba neile karolo ya lesome ya dilo ka moka tšeo di tšweletšwago ke naga ya Isiraele gore e be bohwa bja bona, ka ge ba dira mešomo ya taberenakeleng.
22 Baisiraele ba se ke ba hlwa ba batamela taberenakele gore ba se ke ba dira sebe gomme ba hwa.
23 Balefi bona ba dire mešomo ya bona ya taberenakeleng, e bile ke bona ba tlago go ikarabela ge motho le ge e le ofe a ka direla lefelo le lekgethwa sebe. Molao wa gore ba se ke ba hwetša bohwa nageng ya Isiraele e be wa go ya go ile melokong ya lena ka moka.
24 Ke neile Balefi karolo ya lesome ya dilo tšeo Baisiraele ba tlago go di ntšhetša nna Jehofa gore e be bohwa bja bona. Ke ka baka leo ke ba boditšego ka re: ‘Ba se ke ba hwetša bohwa nageng ya Baisiraele.’”
25 Ke moka Jehofa a re go Moshe:
26 “O botše Balefi o re: ‘Baisiraele ba tla le nea karolo ya lesome yeo ke le neilego yona gore e be bohwa bja lena, gomme mo go yona le neele nna Jehofa karolo ya lesome.
27 Nna Modimo ke tla lebelela karolo yeo ya lesome e le bjalo ka moneelo wa lena, go swana le ge eka ke mabele a lena, beine ya lena goba makhura a lena.
28 Ge le dira bjalo, le tla be le ntšhetša nna Jehofa moneelo dikarolong ka moka tša lesome tšeo le di hwetšago go Baisiraele. Ke moka mo go tšona le ntšhetše Jehofa moneelo gomme le o nee moperisita Arone.
29 Le ntšhetšeng nna Jehofa meneelo ya mehutahuta go tšwa go dilo tše kaonekaone tšeo ba le neago tšona e le dilo tše kgethwa.’
30 “O ba botše o re: ‘Ge le ntšha tše kaonekaone go tšwa go tšeo le di filwego, tšeo di šetšego e tla ba tša lena Balefi, go swana le ge eka ke mabele a lena, beine ya lena goba makhura a lena.
31 Lena le malapa a lena le jeng dilo ka moka tšeo di šetšego tšeo le di filwego ke Baisiraele. Le di jeleng lefelong le ge e le lefe ka ge le šoma taberenakeleng.
32 Le ka se dire sebe ge feela le neela ka tše kaonekaone tša dilo tšeo ba le neilego tšona. Le gona le se ke la diriša gampe dilo tše kgethwa tša Baisiraele, gore le se tlo hwa.’”
Mengwalo ya tlase
^ Phetolelo ya lentšu ka lentšu e re, “ka gare ga gareteine.”
^ Phetolelo ya lentšu ka lentšu e re, “Shekele e swanetše go ba digera tše 20.” Gera e imela ka tlasana ga grama e tee. Bona Dit. B14.
^ Phetolelo ya lentšu ka lentšu e re, “kgwerano ya letswai.”
