Numeri 20:1-29
20 Setšhaba ka moka sa Baisiraele se ile sa fihla lešokeng la Tsini ka kgwedi ya pele gomme sa dula Kadeshe. Miriamo o hlokofaletše gona moo a ba a bolokelwa gona.
2 Bjale setšhaba se be se se na meetse, gomme sa kgobokana sa omanya Moshe le Arone.
3 Setšhaba sa omanya Moshe sa re: “Nkabe le rena re ile ra no ikhwela ge banababo rena ba be ba ehwa pele ga Jehofa!
4 Le re’ng le tlišitše phuthego ya Jehofa mo lešokeng le, gore rena le diruiwa tša rena re tlo hwela gona?
5 Ke ka baka la’ng le re ntšhitše Egepeta gore le re tliše mo lefelong le la go se kgahliše? Re ka se bjale peu lefelong le, le gona ga go na mago, diterebe le digarenate tšeo di tlago go mela mo, e bile ga go na meetse a go nwa.”
6 Ke moka Moshe le Arone ba tloga pele ga setšhaba ba ya mojakong wa taberenakele, ba khunama ba wela fase ka difahlego gomme ba bona letago la Jehofa.
7 Ke moka Jehofa a re go Moshe:
8 “Tšea lepara la gago gomme wena le Arone butiago le kgoboketše Baisiraele, ke moka le boleleng le leswika leo le lego pele ga bona gore le ntšhe meetse gomme go tla tšwa meetse moo leswikeng. Ke moka le nee Baisiraele le diruiwa tša bona meetse gore ba nwe.”
9 Ka gona Moshe a tšea lepara pele ga Jehofa, go ya le ka mokgwa wo a bego a mo laetše ka gona.
10 Ke moka Moshe le Arone ba kgoboketša setšhaba pele ga leswika gomme a re go sona: “Ntheetšeng lena batho ba go se kwe! Na re le ntšhetšeng meetse mo leswikeng le?”
11 Ka gona Moshe a emišetša seatla sa gagwe godimo a itia leswika leo ka lepara la gagwe gabedi, gomme gwa tšwa meetse a mantšhi ke moka gwa nwa setšhaba le diruiwa tša sona.
12 Ka morago Jehofa a bolela le Moshe le Arone a re: “Ka ge le se la ba le tumelo go nna e bile le se la dira gore ke be yo mokgethwa pele ga Baisiraele, gona e ka se be lena le tlago go tsenya setšhaba se nageng yeo ke tlago go se nea yona.”
13 Meetse ao ke a Meriba,* ka gobane Baisiraele ba ile ba omanya Jehofa, ke moka yena a ba bontšha gore ke yo mokgethwa.
14 Ke moka Moshe a roma batho a le kua Kadeshe gore ba ye go kgoši ya Edomo ba mmotše ba re: “Bana beno ba Baisiraele ba re: ‘Wena o tseba gabotse mathata ka moka ao a re wetšego.
15 Botatago rena ba ile ba ya Egepeta gomme rena ra fetša mengwaga e mentšhi re dula moo Egepeta. Le gona Baegepeta ba ile ba tlaiša rena le botatago rena.
16 Mafelelong re ile ra llela Jehofa gomme a re kwa, a romela morongwa a re ntšha Egepeta, bjale šefa re mo Kadeshe, e lego motse wo o lego mollwaneng wa naga ya gago.
17 Re kgopela o re dumelele re fete mo nageng ya gago. Re ka se fete mašemong goba serapeng sa meterebe, le gona re ka se nwe meetse a sedibeng le ge e le sefe. Re tla sepela tseleng yeo e bitšwago Tsela ya Kgoši ntle le go arogela ka go le letona goba le letshadi go fihlela re fetile mo nageng ya gago.’”
18 Eupša kgoši ya Edomo ya re go bona: “Le se ke la feta mo nageng ya ka ka gobane ge le ka feta ke tlo le hlasela ka tšhoša.”
19 Baisiraele ba re go yena: “Re tla sepela ka tsela e kgolo, le gona ge e ba rena le diruiwa tša rena re ka nwa meetse a gago, re tla a patela. Re no nyaka feela go feta mo nageng ya gago re itshepelela ka maoto.”
20 Kgoši ya Edomo ya no dulela gore: “Le ka se fete mo.” E ile ya ya go kopana le Baisiraele e sepela le batho ba bantšhi le mašole a matla.
21 Ka gona, kgoši ya Edomo ya gana go dumelela Baisiraele ba feta nageng ya yona, gomme Baisiraele ba boela morago ba sepela ka tsela e nngwe.
22 Setšhaba ka moka sa Baisiraele sa tloga Kadeshe sa ya Thabeng ya Horo.
23 Ke moka Jehofa a bolela le Moshe le Arone Thabeng ya Horo, kgauswi le mollwane wa naga ya Edomo a re:
24 “Arone o tla hlokofala gomme a bolokwa go swana le borakgolokhukhu ba gagwe. A ka se tsene nageng yeo ke tlago go e nea Baisiraele, ka gobane wena le yena le ile la se kwe taelo ya ka ya mabapi le meetse a Meriba.
25 Tšea Arone le morwa wa gagwe Eleasara gomme o tle le bona Thabeng ya Horo.
26 O hlobole Arone diaparo tša gagwe tša boperisita gomme o di apeše morwa wa gagwe Eleasara, ke moka Arone yena o tla hwela moo.”
27 Ka gona Moshe a dira ka mokgwa woo Jehofa a bego a laetše, ba namela Thaba ya Horo setšhaba ka moka se ba lebeletše.
28 Ke moka Moshe a hlobola Arone diaparo tša gagwe tša boperisita a di apeša morwa wa gagwe Eleasara. Ka morago ga moo Arone a hwela moo thabeng, ke moka Moshe le Eleasara ba theoga moo thabeng.
29 Ge Baisiraele ka moka ba ekwa gore Arone o hlokofetše, ba ile ba mo llela matšatši a 30.
Mengwalo ya tlase
^ Leina le le ra gore, “Go Lwa.”
