Numeri 21:1-35
21 Ge kgoši ya Aradi ya Mokanana yeo e bego e dula Negebe e ekwa gore Baisiraele ba tlile ka tsela ya Atharima, e ile ya lwa le bona gomme ya thopa ba bangwe ba bona.
2 Ka gona Baisiraele ba enela Jehofa ba re: “Ge e ba o ka dira gore re fenye batho ba, gona re tla fediša le metse ya bona.”
3 Jehofa a kwa kgopelo ya Baisiraele gomme a dira gore ba fediše Bakanana le metse ya bona. Ke moka ba reela lefelo leo leina ba re ke Horoma.*
4 Ge Baisiraele ba dutše ba sepela ka tsela ya Lewatle le Lehwibidu ba etšwa Thabeng ya Horo, gore ba tle ba fete nageng ya Edomo, ba ile ba lapa mo tseleng.
5 Ke moka setšhaba se ile sa dulela go bolela gampe ka Modimo le Moshe sa re: “Ke ka baka la’ng le re ntšhitše nageng ya Egepeta gore re tle re hwele mo lešokeng? Mo ga go na dijo le meetse e bile re hloile senkgwa se sa go se re selo.”
6 Ka gona Jehofa a romela dinoga tšeo di nago le mpholo ke moka tša dulela go loma Baisiraele gomme ba bantšhi ba bona ba hwa.
7 Mafelelong setšhaba sa tla go Moshe sa re: “Re dirile sebe, ka gobane re boletše gampe ka Jehofa le ka wena. Rapela Jehofa o re kgopelele gore a tloše dinoga tše mo go rena.” Ke moka Moshe a rapelela setšhaba.
8 Ka gona, Jehofa a re go Moshe: “Dira noga ya mpholo ya maitirelo gomme o e fege koteng. Motho yo mongwe le yo mongwe yo a lomilwego ke noga o tla swanelwa ke go e lebelela gore a phele.”
9 Kapejana Moshe a dira noga ya koporo a e fega koteng. E be e re ge motho a lomilwe ke noga gomme a lebelela noga yeo ya koporo, o be a phela.
10 Ka morago ga moo Baisiraele ba tloga ba yo hloma ditente Obothe.
11 Ke moka ba tloga Obothe ba yo hloma ditente Iye-abarimi, lešokeng leo le lego ka bohlabela, ka pele ga Moaba.
12 Ge ba tloga moo ba yo hloma ditente kgauswi le Moedi wa Tsereda.
13 Go tloga moo ba yo hloma ditente tikologong ya Arinoni, yeo e lego lešokeng leo le fihlago mollwaneng wa Baamore. Arinoni ke mollwane wa Moaba, yeo e lego magareng ga Moaba le naga ya Baamore.
14 Ke ka baka leo puku ya Dintwa tša Jehofa e bolelago ka lefelo leo le bitšwago Fahebe leo le lego kua Sufa le meedi ya Arinoni.
15 Meedi yeo e elela thoko ya motse wa Ari le mollwaneng wa Moaba.”
16 Go tloga moo ba ya Beera. Moo ke mo go nago le sediba seo Jehofa a ilego a bolela le Moshe ka sona a re: “Kgoboketša setšhaba gore ke se nee meetse.”
17 Ka yona nako yeo Baisiraele ba ile ba opela koša ye:
“Wena sediba, etšwa meetse! Lena se opeleleng!
18 Wena sediba seo se epilwego ke baetapele ba Baisiraele,Seo se epilwego ke matona ka molamo wa molaodi, le ka melamo ya bona.”
Ka morago ga moo, Baisiraele ba tloga lešokeng ba ya Matana.
19 Go tloga Matana ba ya Nahaliele, gomme go tloga Nahaliele ba ya Bamothe.
20 Go tloga Bamothe ba ya moeding wo o lego nageng ya Moaba, tikologong yeo e nago le dithaba ya Pisiga yeo e lebanego le Jeshimone.
21 Baisiraele ba roma batho go Sihoni e lego kgoši ya Baamore gore ba e botše gore:
22 “Re kgopela go feta mo nageng ya gago. Re ka se tsene tšhemong goba serapeng sa meterebe, le gona re ka se nwe meetse a sediba le ge e le sefe. Re tla sepela tseleng yeo e bitšwago tsela ya kgoši go fihlela re fetile nageng ya gago.”
23 Eupša Sihoni ga se a ka a dumelela Baisiraele gore ba fete nageng ya gagwe. Go e na le moo, o ile a kgoboketša mašole a gagwe ka moka gore a yo lwa le Baisiraele lešokeng, ke moka a fihla Jahatsa a thoma go lwa le bona.
24 Eupša Baisiraele ba mo fenya ntweng, ke moka ba tšea naga ya gagwe go tloga ka moedi wa Arinoni go fihla ka wa Jaboko, woo o lego kgauswi le naga ya Baamoni. Eupša ga se ba ka ba tšea Jatsera ka gobane ke mollwane wa naga ya Baamoni.
25 Ka gona Baisiraele ba tšea metse yeo ka moka ya Baamore kua Heshibone, le metsana ka moka yeo e lego kgauswi le yona gomme ba thoma go dula go yona.
26 Heshibone e be e le motse wa Kgoši Sihoni yoo e bego e le kgoši ya Baamore, e bile ke yena a kilego a lwa le kgoši ya Moaba a e amoga naga ya yona ka moka go fihla ka Arinoni.
27 Ke ka baka leo batho ba ilego ba thoma go o kwera ba re:
“Etlang Heshibone.
Anke motse wa Sihoni o agwe gomme o tie.
28 Ka gobane mollo o tšwile Heshibone, gomme kgabo ya mollo ya tšwa motseng wa Sihoni.
O fišitše motse wa Ari kua Moaba, wa fiša beng ba mafelo a phagamego a kua Arinoni.
29 O wa madimabe wena Moaba! Lena batho ba Kemoshi le tlo fedišwa!
Yena o tla dira barwa ba gagwe gore ba dule ba tšhaba, gomme barwedi ba gagwe ba tla thopša ke Sihoni kgoši ya Baamore.
30 A re ba hlaseleng.Heshibone e tla fedišwa go fihla ka Diboni,A re e hlaseleng go fihla kua Nofa,Gomme mollo o tla tšhuma go fihla kua Medeba.”
31 Ka gona Baisiraele ba thoma go dula nageng ya Baamore.
32 Ke moka Moshe a roma banna ba bangwe gore ba yo hlola motse wa Jatsera. Ka gona ba thopa metse ya kgauswi le yona gomme ba raka Baamore bao ba bego ba dula moo.
33 Ka morago ga moo, ba boela morago ba sepela ka tsela yeo e yago Bashani. Ke moka Ogo kgoši ya Bashani a tšwa le mašole a gagwe ka moka gore a yo lwa le bona kua Edirei.
34 Bjale Jehofa a re go Moshe: “O se ke wa mmoifa ka gobane ke tla dira gore o fenye yena, mašole a gagwe ka moka le naga ya gagwe, gomme o mo dire tšeo o di dirilego Sihoni kgoši ya Baamore, yoo a bego a dula Heshibone.”
35 Ka gona ba mmolaya, ba bolaya barwa ba gagwe gotee le mašole a gagwe ka moka go fihlela go se na motho yo a phologilego, ke moka ba tšea le naga ya gagwe.
Mengwalo ya tlase
^ Leina le le ra gore, “Go Fediša.”
