Numeri 22:1-41
22 Ke moka Baisiraele ba tloga ba yo hloma ditente leganateng la Moaba ka pele ga Noka ya Jorodane go lebana le Jeriko.
2 Bjale Balaka morwa wa Tsiporo a bona dilo ka moka tšeo Baisiraele ba di dirilego Baamore.
3 Ke moka Bamoaba ba boifa Baisiraele kudu ka gobane e be e le ba bantšhintšhi. Bamoaba ba tšhošwa kudu ke setšhaba sa Baisiraele.
4 Bjale Bamoaba ba bolela le banna ba bagolo ba Midiane ba re: “Setšhaba se se tlo fediša rena le naga ya rena ka moka, go no swana le ge poo e eja bjang nageng ya bo fetša.”
Ka nako yeo Balaka morwa wa Tsiporo e be e le kgoši ya Moaba.
5 Balaka a romela batho go Bileama morwa wa Beoro kua Phethore yeo e lego kgauswi le Noka ya Eforate, moo ke mo setšhaba sa gagwe se bego se dula gona. Ke moka ba re go Bileama: “Tseba gore go na le setšhaba seo se tšwilego Egepeta gomme se tletše lefase le ka moka e bile se dula kgauswi le naga ya ka.
6 Ke kgopela gore o tle hle, o tle o nthogele setšhaba se gore se tle se welwe ke dilo tše mpe, ka gobane se na le matla go mpheta. Mohlomongwe nka se fenya, ka se raka mo nageng, ka gobane ke tseba gabotse gore yo o mo šegofatšago o a šegofatšwa, gomme yo o nyakago a welwa ke dilo tše mpe di a mo wela.”
7 Ka gona banna ba bagolo ba Moaba le ba Midiane ba sepela ba swere selo sa go tlo patela Bileama gore a roge setšhaba gore se tle se welwe ke dilo tše mpe,* gomme ba ya go Bileama ba mmotša dilo tšeo Balaka a di boletšego.
8 Ge ba mmotša a re go bona: “Robalang mo bošegong bjo gomme ke tla le botša seo Jehofa a tlago go mpotša sona.” Ka gona dikgošana tša Moaba tša dula le Bileama.
9 Ke moka Modimo a iponagatša go Bileama a re: “Banna ba bao ba nago le wena ke bomang?”
10 Bileama a araba Modimo wa nnete a re: “Balaka morwa wa Tsiporo, e lego kgoši ya Moaba, o ba romile mo go nna gore ba tle ba mpotše ba re:
11 ‘Go na le setšhaba seo se tšwilego Egepeta gomme se tletše lefase ka moka. Bjale ke kgopela gore o tle o nthogele sona gore se tle se welwe ke dilo tše mpe. Mohlomongwe nka kgona go lwa le sona gomme ka se raka mo nageng.’”
12 Eupša Modimo a re go Bileama: “O se ke wa sepela le bona. O se ke wa roga setšhaba seo, ka gobane se šegofaditšwe.”
13 Ka morago ga moo Bileama a tsoga mesong gomme a botša dikgošana tša Balaka a re: “Eyang nageng ya gabo lena ka gobane Jehofa o ganne ke sepela le lena.”
14 Ka gona dikgošana tšeo tša Moaba tša sepela tša boela go Balaka tša re: “Bileama o ganne go tla le rena.”
15 Eupša Balaka a romela gape dikgošana tše dingwe tše dintšhi kudu le tše di hlomphegago go feta tšela tša pele.
16 Dikgošana tšeo tša tla go Bileama tša re go yena: “Balaka morwa wa Tsiporo o re: ‘Hle ke kgopela gore o se ke wa dumelela selo se go thibela go tla go nna,
17 ka gobane ke tla go putsa kudu e bile ka dira selo se sengwe le se sengwe seo o rego ke se dire. Bjale etla hle, o nthogele setšhaba se.’”
18 Eupša Bileama a araba bahlanka ba Balaka a re: “Le ge Balaka a be a ka nnea ntlo ya gagwe yeo e tletšego silifera le gauta, ke be nka se kgone go tshela taelo ya Jehofa Modimo wa ka, e ka ba e le e kgolo goba e le e nyenyane.
19 Eupša ke kgopela gore le lena le robaleng mo bošegong bjo, e le gore ke tle ke kwe gore ke eng se sengwe gape seo Jehofa a tlago go mpotša sona.”
20 Ke moka Modimo a iponagatša go Bileama bošegong bjoo a re go yena: “Ge e ba banna ba ba tlile go go bitša, gona sepela le bona. Eupša o bolele feela seo ke tlago go go botša sona.”
21 Ka gona Bileama a tsoga mesong a beakanya tonki ya gagwe gomme a sepela le dikgošana tša Moaba.
22 Eupša Modimo a galefela Bileama ka ge a be a eya moo, ke moka morongwa wa Jehofa a ema tseleng gore a mo thibele. Bjale Bileama o be a nametše tonki ya gagwe a na le bahlokomedi ba gagwe ba babedi.
23 Ke moka ge tonki e bona morongwa wa Jehofa a eme tseleng a swere tšhoša ya gagwe ka seatla, ya leka go arogela ka thoko ga tsela gore e ye ka tšhemong, eupša Bileama a thoma go itia tonki yeo gore a e bušetše tseleng.
24 Ka gona morongwa wa Jehofa a ema tseleng e tshesane magareng ga dirapa tše pedi tša meterebe tšeo di bego di na le maboto ao a dirilwego ka maswika ka mahlakoreng a mabedi.
25 Ge tonki yeo e bona morongwa wa Jehofa, e ile ya ikgohla ka leboto ke moka ya pitlaganya leoto la Bileama le leboto, gomme Bileama a e itia gape.
26 Bjale morongwa wa Jehofa a feta gape, gomme a ema lefelong leo le pitlaganego moo go bego go se na tsela ya go arogela ka go le letona goba ka go le letshadi.
27 Ge tonki e bona morongwa wa Jehofa ya khunama Bileama a sa e nametše, gomme Bileama a galefa kudu, a no dulela go e itia ka lepara la gagwe.
28 Mafelelong Jehofa a dira gore tonki yeo e bolele, gomme ya re go Bileama: “Ke go dirile’ng moo e bilego o mpetha gararo?”
29 Bileama a fetola tonki yeo a re: “Ke ka gobane o ntirile setlaela. E bile ge nkabe ke swere tšhoša nkabe ke go bolaile!”
30 Ke moka tonki yeo ya re go Bileama: “Kgane ga se nna tonki ya gago yeo o e nametšego bophelo bja gago ka moka go fihlela le lehono le? Na ke be ke ehlwa ke go dira dilo tše?” Bileama a araba a re: “Aowa!”
31 Ke moka Jehofa a bula Bileama mahlo gomme a bona morongwa wa Jehofa a eme tseleng a ntšhitše tšhoša ya gagwe a e swere ka seatla. Kapejana Bileama a khunama gomme a inamišetša sefahlego sa gagwe fase.
32 Ke moka morongwa wa Jehofa a re go yena: “Ke ka baka la’ng o iteile tonki ye ya gago gararo? Ke tlile mo go tlo go thibela ka gobane leeto le la gago ga le dumelelane le seo ke se nyakago.
33 Tonki ye e mpone gomme ya leka go ntšhirogela ka makga a a mararo. Ge nkabe e se ya leka go ntšhirogela, nkabe gona bjale ke šetše ke go bolaile gomme ka tlogela tonki ye e phela.”
34 Ke moka Bileama a re go morongwa wa Jehofa: “Ke dirile sebe ka gobane ke be ke sa tsebe gore ke wena o bego o eme mo tseleng go tlo kopana le nna. Gona ge e ba leeto le le sa go thabiše, e re ke boele morago.”
35 Eupša morongwa wa Jehofa a re go Bileama: “Sepela le banna ba, eupša o se ke wa bolela selo ntle le seo ke tlago go go botša sona.” Ke moka Bileama a sepela le dikgošana tša Balaka.
36 Ge Balaka a ekwa gore Bileama o tlile, o ile a kopana le yena kapejana motseng wa Moaba, woo o lego kgauswi le Moedi wa Arinoni, mollwaneng wa tikologo yeo.
37 Ke moka Balaka a re go Bileama: “Na ga se ka romela batho gore ba tle ba go bitše? Ke ka baka la’ng o se wa tla? Na o be o nagana gore nka se kgone go go nea moputso o mogolo?”
38 Bileama a re go Balaka: “Ke nna yo ke tlile go wena. Eupša nka se dumelelwe go bolela seo nna ke se nyakago. Ke tla bolela feela seo Modimo a tlago go mpotša gore ke se bolele.”
39 Ka gona Bileama a sepela le Balaka gomme ba fihla Kiriathe-hutsothe.
40 Balaka a dira dihlabelo ka dikgomo le dinku gomme a iša tše dingwe go Bileama le go dikgošana tšeo di bego di na le yena.
41 Ge go esa Balaka a tšea Bileama a mo iša Bamothe-baali, gore ge a le moo a kgone go bona setšhaba ka moka sa Baisiraele.
Mengwalo ya tlase
^ Goba “ba swere selo sa go patela dilo tša botemona.”
