Numeri 28:1-31
28 Ka morago ga moo Jehofa a re go Moshe:
2 “Botša Baisiraele o re: ‘Le eleng hloko gore le ntlišetša sebego, e lego senkgwa sa ka. Dibego tša ka tša go fišwa ka mollo tša monkgo o bose wo o tlago go nna di neelwe ka dinako tša tšona tšeo di beilwego.’
3 O ba botše o re: ‘Sebego sa go fišwa ka mollo seo le tlago go se nea nna Jehofa ke se: Letšatši le lengwe le le lengwe le dire sebego sa go fišwa ka dinku tše pedi tše tona tšeo di phetšego gabotse tšeo e nngwe le e nngwe e nago le ngwaga o tee.
4 Le neele nku e nngwe mesong gomme e nngwe le e neele mantšiboa pele e eba leswiswi.*
5 Le neele le sebego sa mabele sa folouru yeo e šitšwego gabotse ya mo e ka bago khilograma e tee yeo e tswakilwego ka lithara e tee ya makhura a mohlware ao a sego a tswakwa le selo.
6 E be sebego sa go fišwa seo le se neelago ka mehla, seo se ilego sa thoma go neelwa Thabeng ya Sinai e le sebego sa go fišwa ka mollo sa monkgo o bose wo o yago go Jehofa,
7 le sebego sa sona sa dino sa lithara e tee bakeng sa nku e nngwe le e nngwe e tona. O tšhele bjala lefelong le lekgethwa e le sebego sa dino sa Jehofa.
8 O tla neela nku e nngwe e tona mantšiboa pele e eba leswiswi. O e neele e le sebego sa go fišwa ka mollo sa monkgo o bose wo o yago go Jehofa gotee le sebego sa mabele seo se swanago le sa mesong le sebego sa gona sa dino.
9 “‘Eupša ka letšatši la Sabatha le neele dinku tše pedi tše tona tšeo di phetšego gabotse tšeo e nngwe le e nngwe e nago le ngwaga o tee, le sebego sa mabele sa folouru yeo e šitšwego gabotse ya dikhilograma tše e ka bago tše pedi yeo e tswakilwego ka makhura gotee le sebego sa sona sa dino.
10 Se ke sebego sa go fišwa sa letšatši la Sabatha, se neelwe le sebego sa dino le sebego sa go fišwa seo se neelwago ka mehla.
11 “‘Mathomong a kgwedi e nngwe le e nngwe le neeleng Jehofa sebego sa go fišwa ka dipowana tše pedi, nku e tee e tona le dikwana tše šupago tšeo di phetšego gabotse, tšeo e nngwe le e nngwe e nago le ngwaga o tee,
12 le sebego sa mabele sa folouru yeo e šitšwego gabotse yeo e tswakilwego ka makhura ya dikhilograma tše e ka bago tše tharo le seripa bakeng sa poo e nngwe le e nngwe, le sebego sa mabele sa folouru yeo e šitšwego gabotse yeo e tswakilwego ka makhura ya dikhilograma tše e ka bago tše pedi bakeng sa nku e nngwe le e nngwe e tona,
13 gotee le sebego sa mabele sa folouru yeo e šitšwego gabotse yeo e tswakilwego ka makhura ya mo e ka bago khilograma e tee bakeng sa nku e nngwe le e nngwe e tona e le sebego sa go fišwa, e lego sebego sa go tšhungwa ka mollo sa monkgo o bose wo o yago go Jehofa.
14 Dibego tša tšona tša dino e be beine ya dilithara tše pedi bakeng sa poo, le ya ka godimo ga lithara bakeng sa nku e tona gotee le ya lithara e tee bakeng sa kwana e tona. Seo ke sebego sa go fišwa sa kgwedi le kgwedi mo ngwageng.
15 Le gona go oketša go sebego sa go fišwa seo se neelwago ka mehla gotee le sebego sa sona sa dino, go neelwe putšanyana e le sebego sa sebe seo se yago go Jehofa.
16 “‘Letšatšing la bo-14, kgweding ya pele, e tla ba Paseka ya Jehofa.
17 Ka letšatši la bo-15 la kgwedi ye, e tla ba monyanya. Go tla jewa dinkgwa tše di sa omelwago ka matšatši a šupago.
18 Letšatšing la pele e tla ba kopano e kgethwa. Le se ke la dira mošomo le ge e le ofe o boima.
19 Le neeleng Jehofa sebego sa go fišwa ka mollo ka dipowana tše pedi, nku e tee e tona le dikwana tše tona tše šupago tšeo e nngwe le e nngwe e nago le ngwaga o tee. Le swanetše go neela ka diphoofolo tšeo di phetšego gabotse.
20 Le di neeleng le dibego tša mabele tša folouru yeo e šitšwego gabotse yeo e tswakilwego ka makhura. Bakeng sa poo e be folouru ya dikhilograma tše e ka bago tše tharo le seripa, gomme bakeng sa nku e tona e be folouru ya dikhilograma tše e ka bago tše pedi.
21 Bakeng sa kwana e nngwe le e nngwe e tona ya tše šupago o neele ka folouru ya mo e ka bago khilograma e tee.
22 O neele le ka pudi e tee ya sebego sa sebe gore o lebalelwe dibe.
23 Go oketša go sebego sa go fišwa sa mesong seo se neelwago ka mehla e le sebego sa go fišwa, o neele le tšona tše.
24 Le neele dibego tšeo ka tsela e swanago letšatši le lengwe le le lengwe ka matšatši a šupago e le dijo, e le sebego sa go fišwa ka mollo sa monkgo o bose wo o yago go Jehofa. Se neelwe le sebego sa go fišwa sa ka mehla gotee le sebego sa sona sa dino.
25 Letšatšing la bošupa le be le kopano e kgethwa. Le se ke la dira mošomo le ge e le ofe o boima.
26 “‘Letšatšing la ge le neela dienywa tša lena tšeo di butšwitšego pele, e lego ge le neela Jehofa sebego sa mabele ao le sa tšwago go a buna, le swareng kopano e kgethwa monyanyeng wa lena wa dibeke. Le se ke la dira mošomo le ge e le ofe o boima.
27 Le neeleng sebego sa go fišwa sa monkgo o bose wo o yago go Jehofa ka dipowana tše pedi, nku e tee e tona le dikwana tše tona tše šupago tšeo e nngwe le e nngwe ya tšona e nago le ngwaga o tee.
28 Le neeleng le sebego sa tšona sa mabele sa folouru yeo e šitšwego gabotse ye e tswakilwego ka makhura. Bakeng sa poo e nngwe le e nngwe le neele folouru ya dikhilograma tše e ka bago tše tharo le seripa, gomme bakeng sa nku e tona le neele folouru ya mo e ka bago dikhilograma tše pedi.
29 Bakeng sa kwana e nngwe le e nngwe e tona ya dikwana tšeo tše šupago, e be folouru ya mo e ka bago khilograma.
30 Le neeleng le putšanyana e tee gore Modimo a le lebalele dibe.
31 Le di neeleng go oketša go sebego sa go fišwa seo le se neelago ka mehla le sebego sa sona sa mabele. Le neeleng diphoofolo tšeo di phetšego gabotse gotee le dibego tša tšona tša dino.
Mengwalo ya tlase
^ Phetolelo ya lentšu ka lentšu e re, “magareng ga mantšiboa a mabedi.”
