Numeri 30:1-16
30 Ke moka Moshe a bolela le baetapele ba meloko ya Baisiraele a re: “Jehofa o ntaetše a re:
2 Ge e ba motho a ka enela Jehofa goba a dira keno ya gore a ka se dire selo se sengwe, gona a se ke a fetoša seo a se boletšego. A dire se sengwe le se sengwe seo a tshepišitšego go se dira.
3 “Ge e ba mosadi a ka enela Jehofa goba a dira keno ya gore a ka se dire selo se sengwe ge e sa le yo moswa e bile a dula ntlong ya tatagwe,
4 ke moka tatagwe a tseba ka keno yeo ya gagwe goba keno yeo a e dirilego ya gore a ka se dire selo se sengwe gomme tatagwe a se ganane le tšona, gona dikeno tša gagwe ka moka di ka se fetoge. Le gona keno e nngwe le e nngwe yeo a e dirilego ya gore a ka se dire selo se sengwe, e tla no dula e le bjalo.
5 Eupša ge e ba tatagwe a ka ganetša dikeno ka moka tšeo a di dirilego ka morago ga gore a kwe ka tšona, gona dikeno tšeo di tla fetoga. Jehofa o tla mo lebalela ka gobane tatagwe o mo ganeditše.
6 “Eupša ge e ba a ka nyalwa a sa dirile keno goba a tshepišitše go dira selo se itšego ntle le gore a naganišiše gabotse ka taba yeo,
7 ke moka monna wa gagwe a kwa ka keno yeo gomme a se ganetšane le yona letšatšing leo a e kwago, gona dikeno tša gagwe di ka se fetoge, le keno ya gagwe ya gore a ka se dire dilo tše dingwe e ka se fetoge.
8 Eupša ge monna wa gagwe a ka ganetša keno yeo a e dirilego ka morago ga gore a kwe ka yona, gona o tla dira gore keno yeo mosadi wa gagwe a e dirilego goba tshepišo yeo a e dirilego ntle le go naganišiša, di se sa šoma, gomme Jehofa o tla lebalela mosadi yoo.
9 “Eupša ge mohlologadi goba mosadi yo a hladilwego a ka dira keno, gona o tla dira selo se sengwe le se sengwe seo a itlamilego go se dira.
10 “Eupša ge e ba mosadi a ka dira keno goba a ikana gore a ka se dire selo se sengwe mola a sa nyetšwe,
11 ke moka monna wa gagwe a kwa ka keno yeo gomme a se mo ganetše goba go mo thibela, gona keno ya gagwe ya gore a ka se dire dilo tše dingwe goba dikeno tša gagwe ka moka di ka se fetoge.
12 Eupša ge e ba monna wa gagwe a ka fediša keno yeo a e dirilego goba keno ya gore a ka se dire selo se sengwe letšatšing leo a di kwelego, gona dikeno tšeo di ka se sa šoma. Monna wa gagwe o di fedišitše gomme Jehofa o tla lebalela mosadi yoo.
13 Keno e nngwe le e nngwe yeo mosadi a e dirago ya gore a ka se dire selo se sengwe goba keno le ge e le efe yeo a e dirago, monna wa gagwe a ka kgetha go dumelelana le yona goba go e fediša.
14 Eupša ge monna wa gagwe a ka se ganetše dikeno tšeo gwa ba gwa feta matšatši a mantšhi, gona o tla ba a dumelelana le dikeno tša mosadi wa gagwe ka moka goba dikeno tša gagwe ka moka tša gore a ka se dire selo se sengwe. Monna yoo ge a ka se ganetše dikeno tšeo letšatšing leo a kwago mosadi wa gagwe a di dira, o tla be a bontšha gore o dumelelana le tšona.
15 Eupša ge monna a ka ganetša dikeno tšeo ka morago ga letšatši leo a di kwelego ka lona, gona o tla ikarabela ka molato wa mosadi wa gagwe.
16 “Tše ke ditaelo tšeo Jehofa a di laetšego Moshe tša mabapi le monna le mosadi wa gagwe le tša mabapi le tate le morwedi wa gagwe wa moswa yo a sa dulago ntlong ya tatagwe.”
