Numeri 31:1-54
31 Ke moka Jehofa a re go Moshe:
2 “Otla Bamidiane ka baka la seo ba se dirilego Baisiraele. Ka morago ga moo o tla hwa gomme wa bolokwa le batho ba geno.”
3 Ka gona Moshe a re go setšhaba: “Lokišang mašole gore a yo lwa le Bamidiane, gore a phethe taelo ya Jehofa gomme a lefetše Bamidiane.
4 Le romeleng mašole a 1 000 (sekete) go tšwa molokong o mongwe le o mongwe wa Baisiraele.”
5 Ka gona go tšwa go ba dikete melokong ya Baisiraele, gwa romelwa ba 1 000 (sekete) go tšwa molokong o mongwe le o mongwe, ke moka ya ba mašole a 12 000 (dikete tše lesomepedi) ao a itokišeleditšego go ya ntweng.
6 Ke moka Moshe a romela mašole a 1 000 (sekete) go tšwa molokong o mongwe le o mongwe, a a romela ntweng gotee le Finease morwa wa moperisita Eleasara. Finease o be a swere didirišwa tše kgethwa le diphalafala tša go hlaba mokgoši wa ntwa.
7 Ba lwa le Bamidiane, feela bjalo ka ge Jehofa a be a laetše Moshe gomme ba bolaya monna yo mongwe le yo mongwe.
8 Ba bolaya dikgoši tše hlano tša Midiane gotee le ba bangwe ga sehlogo. Dikgoši tšeo tša Midiane e be e le Efi, Rekema, Tsuri, Huru le Reba. Le gona ba ile ba bolaya le Bileama morwa wa Beoro ka tšhoša.
9 Eupša Baisiraele ba thopa basadi ba Midiane le bana ba bona. Ba tšea le diruiwa ka moka tša bona gotee le dilo ka moka tša bona.
10 Le gona ba fiša metse ya bona ka moka yeo ba bego ba dula go yona gotee le dikampa tša bona ka moka.
11 Le gona ba tšea dilo ka moka tšeo batho ba bego ba na le tšona gotee le diruiwa tša bona, gomme ba thopa le batho.
12 Ke moka ba tliša batho bao ba ba thopilego go Moshe, go moperisita Eleasara le go setšhaba ka moka sa Baisiraele, ba tliša le dilo ka moka tšeo ba bego ba di tšere go Bamidiane gomme ba ba nea tšona. Setšhaba seo se be se le ditenteng leganateng la Moaba kgauswi le Noka ya Jorodane kua Jeriko.
13 Ka morago ga moo Moshe, moperisita Eleasara le dikgošana ka moka tša Baisiraele, ba yo kopana le bona ka ntle ga ditente.
14 Eupša Moshe a galefela banna bao ba bego ba kgethilwe go etelela pele mašole, e lego balaodi ba ba dikete le balaodi ba ba makgolo bao ba bego ba etšwa ntweng.
15 Ka gona Moshe a re go bona: “Ke ka baka la’ng le tlogetše basadi ka moka ba phela?
16 Ke bona bao ba ilego ba latela keletšo ya Bileama gomme ba goketša Baisiraele gore ba se ke ba botegela Jehofa ka go rapela modimo wa seswantšho wa kua Peoro, moo Jehofa a ilego a otla setšhaba ka moka sa Baisiraele.
17 Bjale bolayang bana ka moka ba bašemane, le be le bolaye le mosadi yo mongwe le yo mongwe yo a kilego a robala le monna.
18 Eupša le ka tlogela banenyana ka moka bao ba sa kago ba robala le monna.
19 Lena le hlomeng ditente ka ntle ga ditente matšatši a šupago. Yo mongwe le yo mongwe yo a bolailego motho le yo mongwe le yo mongwe yo a kgwathilego motho yo a bolailwego ga sehlogo, a itlhwekiše ka letšatši la boraro le ka letšatši la bošupa. Seo se dirwe ke lena le batho bao le ba thopilego.
20 Le hlwekišeng seaparo se sengwe le se sengwe, selo se sengwe le se sengwe seo se dirilwego ka letlalo, selo se sengwe le se sengwe se se dirilwego ka boya bja pudi le selo se sengwe le se sengwe se se dirilwego ka kota.”
21 Ke moka moperisita Eleasara a bolela le mašole ka moka ao a bego a ile ntweng a re: “Jehofa o neile Moshe molao wo:
22 ‘Gauta, silifera, koporo, tšhipi, thini,* morodi,
23 le dilo ka moka tšeo di ka kgonago go bewa mollong, le di fetiše mollong gomme di tla hlweka. Le hlwekišeng dilo tše ka meetse ao a dirago gore di hlweke pele ga Modimo. Selo se sengwe le se sengwe seo se ka se kgonego go dula mollong, le se hlatswe ka meetse.
24 Le hlatswe diaparo tša lena ka letšatši la bošupa gomme le hlweke, ka morago ga moo le tle ditenteng.’”
25 Ke moka Jehofa a re go Moshe:
26 “Wena, moperisita Eleasara le dihlogo tša malapa a Baisiraele, le bale dilo ka moka tšeo di tšerwego go Bamidiane gotee le diruiwa le batho bao ba thopilwego.
27 Le arole dilo tšeo ka dikarolo tše pedi, tše dingwe e be tša batho bao ba tšwago ntweng gomme tše dingwe e be tša setšhaba ka moka.
28 Go mašole ao a tšwago ntweng, o tšee motho o tee go batho ba bangwe le ba bangwe ba 500 (makgolo a mahlano), o tšee le seruiwa setee go diruiwa tše dingwe le tše dingwe tše 500 (makgolo a mahlano), e lego dikgomo, ditonki, dinku le dipudi, gomme o di nee Jehofa.
29 Le di tšee go karolo yeo ba e ntšhitšego gomme le di nee moperisita Eleasara gore e be moneelo wa Jehofa.
30 Go karolo yeo e neilwego Baisiraele le tšee motho o tee go batho ba 50. Le tšee le seruiwa setee go tše 50, e lego dikgomo, ditonki, dipudi le dinku gotee le mehuta ka moka ya diruiwa gomme le di nee Balefi, e lego bao ba dirago mešomo yeo e sepedišanago le taberenakele ya Jehofa.”
31 Ka gona Moshe le moperisita Eleasara ba dira feela bjalo ka ge Jehofa a be a laetše Moshe.
32 Dilo ka moka tšeo mašole a di tšerego go Bamidiane e be e le dinku le dipudi tše 675 000 (dikete tše makgolotshela-masomešupa-hlano),
33 dikgomo tše 72 000 (dikete tše masomešupa-pedi),
34 le ditonki tše 61 000 (dikete tše masometshela-tee).
35 Basadi bao ba bego ba sa ka ba robala le monna, e be e le ba 32 000 (dikete tše masometharo-pedi).
36 Karolo yeo e bego e abetšwe bao ba bego ba ile ntweng e ile ya ba dinku le dipudi tše 337 500 (dikete tše makgolotharo-masometharo-šupa-makgolohlano).
37 Dinku le dipudi tšeo di ilego tša newa Jehofa e be e le tše 675 (makgolotshela-masomešupa-hlano).
38 Dikgomo e be e le tše 36 000 (dikete tše masometharo-tshela), gomme tšeo di ilego tša newa Jehofa go tšona e be e le tše 72.
39 Ditonki e be e le tše 30 500 (dikete tše masometharo-makgolohlano), gomme tšeo di ilego tša newa Jehofa go tšona e be e le tše 61.
40 Batho bao ba bego ba thopilwe e be e le ba 16 000 (dikete tše lesometshela), gomme bao ba ilego ba newa Jehofa go bona e be e le ba 32.
41 Ke moka Moshe a fa moperisita Eleasara moneelo woo wa Jehofa, feela bjalo ka ge Jehofa a be a laetše Moshe.
42 Go karolo yeo e bego e le ya Baisiraele yeo Moshe a ilego a e arola go karolo yeo e bego e le ya banna bao ba tšwago ntweng e be e le
43 dinku le dipudi tše 337 500 (dikete tše makgolotharo-masometharo-šupa-makgolohlano),
44 dikgomo tše 36 000 (dikete tše masometharo-tshela),
45 ditonki tše 30 500 (dikete tše masometharo-makgolohlano),
46 le batho bao ba bego ba thopilwe ba 16 000 (dikete tše lesometshela).
47 Ke moka go karolo yeo e bego e le ya Baisiraele, Moshe a tšea motho o tee go ba 50 le phoofolo e tee go tše 50 gomme a di nea Balefi, e lego bao ba bego ba dira mešomo yeo e sepedišanago le taberenakele ya Jehofa, feela bjalo ka ge Jehofa a be a laetše Moshe.
48 Banna bao ba kgethilwego gore ba etelele pele mašole a dikete, e lego balaodi ba ba dikete le balaodi ba ba makgolo, ba ya go Moshe,
49 gomme ba re go yena: “Rena bahlanka ba gago re badile banna bao re ba hlokometšego bao ba bego ba ile ntweng, gomme ga go le o tee yo go begilwego gore ga a gona mo go rena.
50 Ka gona anke yo mongwe le yo mongwe wa rena a neele seo a se hweditšego e be sebego sa Jehofa, e lego dilo tša gauta, maseka a maotong le a matsogong, dipalamonwana, mangina le dilo tša go ikgabiša, e le gore Jehofa a tle a re lebalele dibe.”
51 Ka gona Moshe le moperisita Eleasara ba amogela gauta yeo go tšwa go bona, e lego dilo ka moka tša go ikgabiša.
52 Gauta ka moka ya moneelo wo ba o neetšego Jehofa e ile ya ba ditšhelete tša silifera tše 16 750 (dikete tše lesometshela-makgološupa-masomehlano), go tšwa go balaodi ba ba dikete le balaodi ba ba makgolo.
53 Mašole ka moka a ile a hwetša dilo tšeo a bego a di tšere go Bamidiane.
54 Ka gona Moshe le moperisita Eleasara ba amogela gauta yeo go tšwa go balaodi ba ba dikete le balaodi ba ba makgolo, gomme ba e tliša ka taberenakeleng e le gore Baisiraele ba tle ba gopole seo Jehofa a ba diretšego sona.
Mengwalo ya tlase
^ Thini ke mohuta o mongwe wa tšhipi.
