Numeri 33:1-56
33 Ye ke pego ya Baisiraele ya ge ba be ba etšwa nageng ya Egepeta ba sepela ka dihlopha tša bona ba eteletšwe pele ke Moshe le Arone.
2 Moshe a boloka pego ya lefelo le lengwe le le lengwe leo Baisiraele ba tlogilego go lona go ya ka taelo ya Jehofa. Ge ba be ba tloga lefelong le lengwe ba eya go le lengwe, ba be ba sepela ka mokgwa wo:
3 Ka letšatši la bo-15 la kgwedi ya pele, ba ile ba tloga Ramasese. Ka morago ga lona letšatši leo la Paseka, ba ile ba tšwa ba sa boife selo gomme Baegepeta ka moka ba ba lebeletše.
4 Ka nako yeo Baegepeta ba be ba boloka bana ba bona ka moka ba mathomo bao Jehofa a bego a ba bolaile, ka gobane Jehofa o be a ahlotše medimo ya bona le go e otla.
5 Ka gona Baisiraele ba tloga Ramasese ba yo hloma ditente kua Sukothe.
6 Ke moka ba tloga Sukothe ba yo hloma ditente Ethama yeo e lego mafelelong a lešoka.
7 Ke moka ba tloga Ethama ba boela morago thoko ya Pihahirothe yeo e lebanego le Baali-tsefone, ba hloma ditente kgauswi le Migidolo.
8 Ka morago ga moo ba tloga Pihahirothe gomme ba sepela gare ga lewatle ba leba lešokeng, ba sepela matšatši a mararo lešokeng la Ethama ke moka ba hloma ditente Mara.
9 Ke moka ba tloga Mara ba fihla Elima. Moo Elima go be go na le didiba tše 12 tša meetse le mehlare ya mepalema e 70. Ka gona ba hloma ditente moo.
10 Ka morago ga moo ba tloga Elima ba yo hloma ditente kgauswi le Lewatle le Lehwibidu.
11 Ke moka ba tloga Lewatleng le Lehwibidu ba yo hloma ditente lešokeng la Sini.
12 Ba tloga lešokeng la Sini ba yo hloma ditente Dofaka.
13 Ka morago ba tloga Dofaka ba yo hloma ditente Alushi.
14 Ke moka ba tloga Alushi ba yo hloma ditente Rafidima, mo ke moo setšhaba se bego se se na meetse a go nwa.
15 Ka morago ga moo ba tloga Rafidima ba yo hloma ditente lešokeng la Sinai.
16 Ba tloga lešokeng la Sinai ba yo hloma ditente Kibirothe-hatafa.
17 Ke moka ba tloga Kibirothe-hatafa ba yo hloma ditente Hatserothe.
18 Ka morago ga moo ba tloga Hatserothe ba yo hloma ditente Rithima.
19 Ke moka ba tloga Rithima ba yo hloma ditente Rimone-peretse.
20 Ba tloga Rimone-peretse ba yo hloma ditente Libina.
21 Ka morago ba tloga Libina ba yo hloma ditente Risa.
22 Ke moka ba tloga Risa ba yo hloma ditente Kehelatha.
23 Ba tloga Kehelatha ba yo hloma ditente Thabeng ya Shefere.
24 Ka morago ga moo ba tloga Thabeng ya Shefere ba yo hloma ditente Harada.
25 Ba tloga Harada ba yo hloma ditente Makhelothe.
26 Ke moka ba tloga Makhelothe ba yo hloma ditente Tahathe.
27 Ka morago ga moo ba tloga Tahathe ba yo hloma ditente Thera.
28 Ba tloga Thera ba yo hloma ditente Mithika.
29 Ka morago ba tloga Mithika ba yo hloma ditente Hashemona.
30 Ke moka ba tloga Hashemona ba yo hloma ditente Moserothe.
31 Ba tloga Moserothe ba yo hloma ditente Bene-jaakane.
32 Ka morago ga moo ba tloga Bene-jaakane ba yo hloma ditente Horo-hagidigada.
33 Ke moka ba tloga Horo-hagidigada ba yo hloma ditente Jotobatha.
34 Ka morago ba tloga Jotobatha ba yo hloma ditente Abarona.
35 Ke moka ba tloga Abarona ba yo hloma ditente Etsione-gebere.
36 Ka morago ga moo ba tloga Etsione-gebere ba yo hloma ditente lešokeng la Tsini, e lego Kadeshe.
37 Ka morago ba tloga Kadeshe ba yo hloma ditente Thabeng ya Horo, mollwaneng wa naga ya Edomo.
38 Ke moka moperisita Arone a rotogela Thabeng ya Horo a laelwa ke Jehofa gomme a hwela moo. E be e le letšatšing la pele la kgwedi, kgweding ya bohlano, ka ngwaga wa bo-40 ka morago ga ge Baisiraele ba tlogile nageng ya Egepeta.
39 Arone o be a na le mengwaga e 123 (lekgolo-masomepedi-tharo) ge a be a hwela Thabeng ya Horo.
40 Bjale kgoši ya kua Aradi ya Mokanana yeo e bego e dula Negebe, nageng ya Kanana, e ile ya kwa gore Baisiraele ba a tla.
41 Ka morago ba ile ba tloga Thabeng ya Horo ba yo hloma ditente Tsalamona.
42 Ka morago ga moo ba tloga Tsalamona ba yo hloma ditente Punone.
43 Ke moka ba tloga Punone ba yo hloma ditente Obothe.
44 Ke moka ba tloga Obothe ba yo hloma ditente Iye-abarimi mollwaneng wa Moaba.
45 Ka morago ba tloga Iyimi ba yo hloma ditente Diboni-gada.
46 Ka morago ga moo ba tloga Diboni-gada ba yo hloma ditente Alamone-dibilathaima.
47 Ke moka ba tloga Alamone-dibilathaima ba yo hloma ditente dithabeng tša Abarimi ka pele ga Thaba ya Nebo.
48 Mafelelong ba tloga dithabeng tša Abarimi ba yo hloma ditente leganateng la Moaba kgauswi le Noka ya Jorodane kua Jeriko.
49 Ba ile ba dula ba hlomile ditente kgauswi le Noka ya Jorodane, go tloga Bethe-jeshimothe go fihla Abele-shithima leganateng la Moaba.
50 Jehofa a bolela le Moshe leganateng la Moaba kgauswi le Noka ya Jorodane kua Jeriko, a re:
51 “Botša Baisiraele o re: ‘Le tshele Noka ya Jorodane le ye nageng ya Kanana.
52 Le rake batho ka moka bao ba dulago nageng yeo, le fediše diswantšho tša bona ka moka tša maswika le diswantšho tša bona ka moka tša tšhipi, le be le fediše le mafelo ao ba rapelago medimo ya bona ya maaka go ona.*
53 Le tšeeng naga yeo le dule go yona ka gobane ke tla le nea yona gore e be ya lena.
54 Le diriše matengwa go ikarolela naga gore e be bohwa bja lena go ya ka meloko ya lena le malapa a lena. Go bao e lego ba bantšhi le oketše bohwa bja bona, gomme go bao e sego ba bantšhi le fokotše bohwa bja bona. Moo matengwa a šupago gona, ke moo motho a tlago go ya gona. Le ikarolele naga go ya ka meloko ya botatago lena.
55 “‘Ge e ba le ka se rake batho bao ba dulago nageng yeo le yago go yona, gona bao le tlago go ba tlogela ba tla ba bjalo ka dilo tša go le fahla ka mahlong le bjalo ka meetlwa ya go le hlaba mathokong a dimpa tša lena, ba tla le hlakiša nageng yeo le tlago go dula go yona.
56 Le lena ke tla le dira seo ke nagannego go ba dira sona.’”
Mengwalo ya tlase
^ Phetolelo ya lentšu ka lentšu e re, “mafelo a bona a phagamego a makgethwa.”
