Numeri 36:1-13
-
Melao ya go nyala basadi bao ba tšeago bohwa (1-13)
36 Banna bao e lego dihlogo tša malapa a moloko wa Gileada morwa wa Makiri morwa wa Manase, e lego malapa a barwa ba Josefa, ba ya go Moshe gomme ba bolela le yena gotee le dikgošana, e lego dihlogo tša malapa a Baisiraele.
2 Ba re: “Jehofa o laetše wena mong wa rena gore o abe naga ka matengwa e be bohwa bja Baisiraele, le gona Jehofa o laetše wena mong wa rena gore o tšee bohwa bja Tselofehadi ngwanabo rena o bo nee barwedi ba gagwe.
3 Ge e ba ba ka nyalwa ke banna ba molokong o mongwe wa Isiraele, gona bohwa bja basadi bao le bjona bo tlo tlošwa go bohwa bja botatago rena gomme bja išwa go bohwa bja moloko woo ba tla bego ba nyetšwe go wona. Ka go realo bohwa bja rena bjoo re bo neilwego go dirišwa matengwa bo tla fokotšega.
4 Bjale ka Ngwaga wa Tokologo* wa Baisiraele, bohwa bja basadi bao le bjona bo tsenywe go bohwa bja moloko woo ba tla bego ba nyetšwe go wona, ka go realo bohwa bja bona bo tlošwe go bohwa bja moloko wa botatago rena.”
5 Ke moka Moshe a botša Baisiraele seo Jehofa a mmoditšego sona, a re: “Seo moloko wa barwa ba Josefa o se bolelago ke nnete.
6 Jehofa o boletše mabapi le barwedi ba Tselofehadi a re: ‘Ba ka nyalwa ke motho le ge e le ofe yo ba mo ratago. Eupša ba nyalwe feela ke ba lapa la moloko wa botatago bona.
7 Go se be le bohwa bja Baisiraele bjo bo tlošwago molokong o mongwe bja išwa go o mongwe, ka gobane Baisiraele ga se ba swanela go fetiša bohwa bja moloko wa borakgolokhukhu ba bona.
8 Morwedi yo mongwe le yo mongwe yo a hwetšago bohwa go meloko ya Baisiraele, a nyalwe ke motho yo a tšwago lapeng la moloko wa tatagwe, e le gore Baisiraele ba se ke ba fetiša bohwa bja borakgolokhukhu ba bona.
9 Go se be le bohwa bjo bo tlošwago molokong o mongwe bja išwa go o mongwe, ka gobane meloko ya Baisiraele ga se ya swanela go fetiša bohwa bja yona.’”
10 Barwedi ba Tselofehadi ba dira ka mokgwa wo Jehofa a bego a laetše Moshe.
11 Ka gona barwedi ba Tselofehadi e lego Maala, Thiritsa, Hogola, Milika le Noa ba nyalwa ke barwa ba boramogolo wa bona goba ba borangwane wa bona.
12 Ba nyalwa ke banna bao ba tšwago malapeng a Manase morwa wa Josefa gore bohwa bja bona bo dule bo le molokong wa lapa la tatago bona.
13 Tše ke ditaelo le melao yeo Jehofa a e neilego Baisiraele a diriša Moshe leganateng la Moaba kgauswi le Noka ya Jorodane kua Jeriko.
Mengwalo ya tlase
^ Goba “Ngwaga wa Khunologo.” Bona Tlhaloso ya Mantšu.
