Numeri 8:1-26
8 Jehofa a bolela le Moshe a re:
2 “Botša Arone o re: ‘Ge o laeta mabone, mabone a šupago a swanetše go bonegela lefelo leo le lego ka pele ga sehlomelamabone.’”
3 Arone o ile a dira bjalo. O ile a laeta mabone gore a bonegele lefelo leo le lego ka pele ga sehlomelamabone, go ya le ka mokgwa woo Jehofa a bego a laetše Moshe.
4 Sehlomelamabone se be se dirilwe ka gauta go tloga fase go ya godimo. Se be re dirilwe ka mokgwa woo Jehofa a bontšhitšego Moshe ponong gore se dirwe ka gona.
5 Jehofa a bolela gape le Moshe a re:
6 “Tšea Balefi mo go Baisiraele o ba hlwekiše.
7 O ba hlwekiše ka tsela ye: O ba gaše ka meetse gore ba hlweke,* ke moka ba kote meriri ya mebele ya bona ka moka ka legare, ba hlatswe diaparo tša bona gomme ba itlhwekiše.
8 Ke moka ba tšee powana le sebego sa yona sa mabele sa folouru yeo e šitšwego gabotse yeo e tswakilwego le makhura, gomme wena o tšee powana e nngwe yeo o tlago go e diriša bakeng sa sebego sa sebe.
9 O tliše Balefi pele ga taberenakele gomme o kgoboketše setšhaba ka moka sa Baisiraele.
10 Ge o tliša Balefi pele ga Jehofa, Baisiraele ba bee matsogo a bona godimo ga dihlogo tša Balefi.
11 Arone a neele Balefi pele ga Jehofa e le sebego sa go tšokotšwa seo se tšwago go Baisiraele e le gore mošomo wa bona e be go hlankela tirelong ya Jehofa.
12 “Ke moka Balefi ba bee matsogo a bona godimo ga dihlogo tša dipoo. Ka morago ga moo, poo e tee e neelwe Jehofa e le sebego sa sebe gomme e nngwe e be sebego sa go fišwa e le gore Balefi ba lebalelwe dibe tša bona.
13 O dire gore Balefi ba eme pele ga Arone le barwa ba gagwe gomme Arone a neele Balefi go Jehofa e le sebego sa go tšokotšwa.
14 O kgethe Balefi gare ga Baisiraele, gomme Balefi bona e tla ba ba ka.
15 Ke moka Balefi ba tle go hlankela taberenakeleng ka morago ga ge o ba hlwekišitše e bile o ba neetše e le sebego sa go tšokotšwa.
16 Ka gobane ke ba kgethile go Baisiraele gore e be dimpho tša ka. Ke ikgethela bona legatong la bana ka moka ba mathomo ba Baisiraele.
17 Ka gobane ngwana yo mongwe le yo mongwe wa mathomo go Baisiraele ke wa ka, le leitšibulo le lengwe le lengwe la phoofolo ke la ka. Ke ile ka kgetha* maitšibulo gore e be a ka letšatšing la ge ke be ke bolaya leitšibulo le lengwe le le lengwe nageng ya Egepeta.
18 Ke kgetha Balefi gore e be ba ka legatong la maitšibulo ka moka a Baisiraele.
19 Ke tla nea Arone le barwa ba gagwe Balefi e le dimpho. Ba tla šoma taberenakeleng gore ba thuše baperisita e le gore Baisiraele ba lebalelwe dibe. Ka gona Baisiraele ba se ke ba batamela lefelo le lekgethwa, ka gore ge go ka ba le motho yo a batamelago moo, Baisiraele ba tla otlwa ka baka la seo.”
20 Moshe, Arone le setšhaba ka moka sa Baisiraele ba dira dilo ka moka tšeo Jehofa a bego a di laetše Moshe mabapi le Balefi.
21 Ka gona Balefi ba itlhwekiša ba ba ba hlatswa diaparo tša bona. Ka morago ga moo, Arone a ba neela pele ga Jehofa e le sebego sa go tšokotšwa. Ke moka Arone a dira sehlabelo e le gore dibe tša bona di lebalelwe gomme ba hlweke.
22 Ka morago ga moo Balefi ba tla taberenakeleng go tlo dira mošomo wa bona ba hlahlwa ke Arone le barwa ba gagwe. Batho ba dira dilo ka moka go ya le ka mokgwa woo Jehofa a bego a laetše Moshe mabapi le Balefi.
23 Bjale Jehofa a bolela le Moshe a re:
24 “Balefi ba swanetše go dira se se latelago: Monna wa mengwaga e 25 go ya godimo a be sehlopheng sa batho bao ba hlankelago taberenakeleng.
25 Eupša ge a na le mengwaga e 50 a tšwe sehlopheng seo, gomme a se sa hlwa a hlankela.
26 A thuše banababo ge ba šoma ka taberenakeleng, eupša yena a se ke a newa mošomo kamoo taberenakeleng. Se ke seo o swanetšego go se dira mabapi le Balefi le mešomo ya bona.”
