Numeri 9:1-23
9 Ka ngwaga wa bobedi, kgweding ya pele ya ge Baisiraele ba tšwile nageng ya Egepeta, Jehofa o ile a bolela le Moshe lešokeng la Sinai, a re:
2 “Baisiraele ba swanetše go lokišetša sehlabelo sa Paseka ka nako e beilwego.
3 Ka letšatši la bo-14 la kgwedi yona ye, mantšiboa pele e eba leswiswi,* le e lokišetše ka nako ya yona yeo e beilwego. Le e lokišetše go ya ka melao le ka mokgwa woo le laetšwego gore le e lokišetše ka gona.”
4 Ka gona Moshe a botša Baisiraele gore ba lokišetše sehlabelo sa Paseka.
5 Ba lokišetša sehlabelo sa Paseka lešokeng la Sinai ka letšatši la bo-14 la kgwedi ya pele, mantšiboa pele e eba leswiswi. Baisiraele ba dira dilo ka moka tšeo Jehofa a di laetšego Moshe.
6 Bjale go be go na le batho ba bangwe bao ba ilego ba se kgone go lokišetša sehlabelo sa Paseka letšatšing leo, ka gobane ba be ba se ba hlweka ka ge ba ile ba kgwatha setopo. Ka gona ba tla pele ga Moshe le Arone letšatšing leo.
7 Ke moka batho bao ba re go Moshe: “Le ge re se ra hlweka ka baka la go kgwatha setopo, eupša ke ka baka la’ng re thibelwa go neela Jehofa sehlabelo ka nako ya sona e beilwego gotee le Baisiraele ba bangwe?”
8 Ka gona Moshe a re go bona: “Emang moo, e reng ke botšišeng Jehofa gore o reng ka lena.”
9 Ke moka Jehofa a re go Moshe:
10 “Botša Baisiraele o re: ‘Motho le ge e le ofe mo go lena goba melokong ya lena yeo e sa tlago, ge a ka se hlweke ka baka la go kgwatha setopo goba ge a ka etela kgole, o swanetše go no lokišetša Jehofa sehlabelo sa Paseka.
11 Ba lokišetše sehlabelo seo ka letšatši la bo-14 la kgwedi ya bobedi, mantšiboa pele e eba leswiswi. Ba se je ka dinkgwa tše di sa omelwago le merogo ya go galaka.
12 Ba se ke ba šadiša selo go fihla mesong, ba se ke ba roba lerapo le ge e le lefe la nku. Ba lokišetše sehlabelo seo go ya ka melao ka moka ya mabapi le Paseka.
13 Eupša ge motho a be a hlwekile goba a be a se a tšea leeto, gomme a se lokišetše sehlabelo sa Paseka, gona motho yoo a bolawe, ka gobane ga se a neela sehlabelo sa Jehofa ka nako ya sona e beilwego. Motho yoo o tla otlwa ka baka la sebe sa gagwe.
14 “‘Le gona ge e ba go na le motho yo e sego Moisiraele yo a dulago le lena, le yena a lokišetše Jehofa sehlabelo sa Paseka. A se lokišetše go ya ka molao wa sehlabelo sa Paseka le go ya ka tsela yeo se tlwaetšego go dirwa ka yona. Go be le molao o swanago bakeng sa Moisiraele le motho yo e sego Moisiraele.’”
15 Letšatšing la ge go hlongwa taberenakele, leru le be le khupetša taberenakele, e lego tente yeo e nago le maswika ao a ngwadilwego melao ya Modimo, eupša mantšiboa selo seo se bego se swana le mollo se be se khupetša taberenakele go fihla mesong.
16 Ka mehla leru le be le khupetša taberenakele mosegare, gomme bošego e khupetšwa ke selo seo se swanago le mollo.
17 Neng le neng ge leru le be le tloga ka godimo ga tente, Baisiraele ba be ba hlomolla ditente ke moka ba tloga, gomme ge leru leo le be le ema ka godimo ga tente, ba be ba hloma ditente tša bona gona moo.
18 Ge Jehofa a be a laela Baisiraele gore ba tloge, ba be ba hlomolla ditente, gomme ge Jehofa a be a ba laela gore ba dule, ba be ba di hloma. Nako e nngwe le e nngwe ge leru le be le le ka godimo ga taberenakele, ba be ba dula ba hlomile ditente.
19 Ge leru le be le fetša matšatši a mantšhi le le ka godimo ga taberenakele, Baisiraele ba be ba ekwa taelo ya Jehofa gomme ba sa sepele.
20 Ka dinako tše dingwe leru le be le fetša matšatši a sego kae le le ka godimo ga taberenakele. Ba be ba dula ba hlomile ditente ka ge ba laetšwe ke Jehofa, gomme ba be ba di hlomolla ge Jehofa a be a ba laela gore ba dire bjalo, ke moka ba sepela.
21 Ka dinako tše dingwe leru le be le dula le le moo go tloga mantšiboa go fihla mesong. Ge leru le be le tloga mesong ba be ba hlomolla ditente gomme ba sepela. Ba be ba di hlomolla gomme ba sepela go sa šetšwe gore ke mosegare goba ke bošego.
22 Go sa šetšwe gore leru leo le be le dutše godimo ga taberenakele ka matšatši a mabedi, kgwedi goba go feta moo, Baisiraele ba be ba dula ba hlomile ditente gomme ba sa sepele. Eupša ge le be le šutha ba be ba hlomolla ditente gomme ba sepela.
23 Ba be ba hloma ditente ge Jehofa a be a ba laela gore ba dire bjalo, ke moka ba di hlomolla ge Jehofa a be a ba laela gore ba dire bjalo gomme ba sepela. Ba be ba dula ba ekwa Jehofa ka go latela taelo yeo Jehofa a bego a ba nea yona a diriša Moshe.
Mengwalo ya tlase
^ Phetolelo ya lentšu ka lentšu e re, “magareng ga mantšiboa a mabedi.”
